Ioane Ena Revareva Ihatoina

1 Lau, elda tauna,* ese egu lalokau tauna Gaio lau tore henia. Lau ese ia lau lalokau henia bada.

2 Egu lalokau turana e, lau guriguri gau ibounai dekenai hahenamo do oi davaria bona oi noho namo, hari oi noho namo hegeregerena. 3 Tadikaka idia mai bona idia gwau oi be hereva momokani oi badinaia noho neganai, lau moale bada herea.+ 4 Lau kamonai egu natudia be hereva momokani ai idia raka noho neganai, lau moale bada herea.*+

5 Egu lalokau turana e, tadikaka totona oi karaia gaudia amo emu abidadama oi hahedinaraia, ena be idia be idau taudia.+ 6 Idia ese oi hahedinaraia lalokauna be kongrigeisen dekenai idia sivarailaia. Idia oi siaia neganai, mani Dirava ia hamoalea dalana ai idia oi siaia lao.+ 7 Badina idia be Dirava ena ladana dainai gabu idauidau idia lao, bona idau bese taudia amo gau ta idia abia lasi.+ 8 Unai dainai ita be mai iseda maduna unai bamona taudia dekenai heabidae karana ita hahedinaraia totona,+ unai amo hereva momokani durua totona do ita gaukara hebou.+

9 Kongrigeisen dekenai revareva ta lau torea, to Diotrepe, nega momo ia ura idia huanai ia bada tauna, be mai hemataurai lasi ida ai gwauraia herevadia ia dadaraia.+ 10 Unai dainai bema lau mai, ia karaia noho karana do lau hahedinaraia, hegeregere ia ese ma haida dekenai emai ladana ia hadikaia.*+ Bona unai sibona lasi, to ia ura lasi mai hemataurai ida tadikaka ia abia dae.+ Bona tadikaka idia ura abia dae taudia ia koua toho bona kongrigeisen amo ia kokia.

11 Egu lalokau turana e, haheitalai dikadia oi tohotohoa lasi, to haheitalai namodia oi tohotohoa.+ Kara namo ia karaia tauna be Dirava amo.+ Kara dika ia karaia tauna be Dirava ia itaia lasi.+ 12 Tadikaka ibounai idia gwau Demetrio be kara namo tauna, bona hereva momokani ese unai ia hahedinaraia danu. Oibe, ai danu ese unai ai hamomokania, bona oi diba ai gwauraia herevana be momokani.

13 Lau ura oi dekenai gau momo lau herevalaia, to lau ura lasi revareva amo oi lau hereva henia. 14 To lau ura oi dekenai do lau mai haraga, unai amo ita ruaosi do ita herevahereva.

Mani maino be oi dekenai ia noho.

Emu turadia ese oi dekenai edia hanamoa hereva idia siaia. Mani iseda turadia ta ta dekenai egu hanamoa hereva oi henia.