Apokalupo—Ioane Ia Abia Herevana

22 Bona aneru ese mauri ranuna+ ena sinavai be lau dekenai ia hahedinaraia, ia be galasi bamona, bona Dirava bona Mamoe Natuna edia terona amo ia aru mai,+ 2 bona siti ena dala badana huanai ia aru lao. Sinavai ena kahana kahana dekenai mauri audia idia gini, unai mauri audia ese lagani ta ta ai huahua be nega 12 idia atoa, oibe, hua ta ta ibounai lalonai huahua idia atoa. Bona unai au edia raurau be bese idauidau hanamoa totona.+

3 Dirava ese unai siti hadikaia herevana ta do ia gwauraia lasi. Dirava bona Mamoe Natuna edia terona+ be unai siti lalonai do ia noho bona Dirava ena hesiai taudia ese ena hesiai gaukara helagana do idia karaia. 4 Bona idia ese iena vairana do idia itaia,+ bona iena ladana be edia baguna dekenai do ia noho.+ 5 Danu, hanuaboi be lasi,+ bona lamepa eiava dina ena diari idia abia be anina lasi, badina Iehova* Dirava ese idia dekenai diari do ia halasia,+ bona idia be do idia lohia ela bona hanaihanai.+

6 Aneru be lau dekenai ia gwau: “Inai hereva be taunimanima ese idia abia dae diba bona idia be momokani,+ oibe, Iehova,* peroveta taudia amo ia hereva Diravana,+ ese iena aneru ia siaia ena hesiai taudia dekenai kahirakahira do idia vara gaudia ia hahedinaraia totona. 7 Lau be do lau mai haraga.+ Inai lokua toretore ena peroveta herevadia ia badinaia tauna be do ia moale.”+

8 Lau, Ioane, ese unai gaudia lau kamonai bona itaia. Unai gaudia lau kamonai bona itaia neganai, lau dekenai unai gaudia ia hahedinaraia aneru ena aena badinai lau tui diho, lau tomadiho henia totona. 9 To ia ese lau ia hamaoroa: “Unai bamona oi karaia lasi! Lau be hesiai tauna sibona, oi bona emu tadikaka hegeregerena, idia be peroveta taudia bona inai lokua toretore ena hereva idia badinaia taudia. Dirava oi tomadiho henia.”+

10 Danu lau ia hamaoroa: “Inai lokua toretore ena peroveta herevadia do oi hunia lasi, badina abia hidi negana be kahirakahira. 11 Kara dika ia karaia tauna be do ia kara dika noho. Bona kara mirodia ia karaia tauna be kara mirodia do ia karaia noho. To kara maoromaoro tauna be kara maoromaoro ia karaia noho be namo, bona helaga tauna be ia helaga noho be namo.

12 “‘Lau be do lau mai haraga, bona taunimanima dekenai do lau henia davana be lau dekenai ia noho, ta ta edia kara hegeregerena davana do lau henia.+ 13 Lau be Alepa bona Omega,*+ ginigunana bona ginigabena, matamana bona dokona. 14 Edia dabua latadia idia huria taudia be idia moale,+ idia be mai edia maoro, mauri audia edia huahua idia ania totona,+ bona siti ena iduara amo siti lalonai idia vareai diba.+ 15 Murimuri ai be sisia,* meamea taudia, matabodaga taudia,* ala-ala taudia, kaivakuku tomadiho henia taudia, bona kara koikoi idia ura henia bona idia karaia noho taudia ibounai idia noho.’+

16 “‘Lau Iesu, ese egu aneru lau siaia, umui dekenai inai hereva ia gwauraia hedinarai totona, unai amo kongrigeisen taudia ia durua diba. Lau be Davida ena ramuna+ bona ena bese tauna bona ia diaridiari daba hisiuna.’”+

17 Bona lauma helaga bona headava matamata hahine+ idia hereva noho, idia gwau: “Mai!” Bona namona be inai hereva idia kamonai taudia idia gwau: “Mai!” Bona namona be ranu mase taudia do idia mai.+ Mauri ranu idia ura taudia ibounai ese mauri ranuna idia inua be namo, ia be davana lasi.+

18 “Lau ese inai lokua toretore ena peroveta hereva idia kamonai taudia ibounai dekenai lau gwauraia hedinarai gauna be inai: Bema tau ta ese inai gaudia edia latanai hereva ma haida ia atoa,+ Dirava ese mauri bukana lalonai ia torea hisihisidia be unai tauna latanai do ia atoa.+ 19 Bona bema tau ta ese mauri bukana ai idia noho peroveta herevadia edia hereva ta ia kokia, Dirava ese unai tauna ena ahuna do ia kokia. Anina be ia be mauri au edia huahua do ia ania lasi+ bona siti helagana lalonai do ia vareai lasi,+ unai gaudia be inai lokua toretore lalonai idia herevalaia vadaeni.

20 “Unai gaudia ia gwauraia hedinarai tauna ia gwau, ‘Oibe, lau be do lau mai haraga.’”+

“Amen! Lohiabada Iesu e, oi mai.”

21 Namona be Lohiabada Iesu ena hebogahisi hereadaena be helaga taudia ida ia noho.