Aposetolo Edia Kara

19 Apolo+ be Korinto dekenai ia noho neganai, Paulo be gunika gabudia dekenai ia hanaia lao bona Efeso dekenai ia diho mai.+ Unuseniai hahediba taudia haida ia davaria, 2 bona idia dekenai ia gwau: “Umui be abidadama taudia ai umui lao neganai, lauma helaga umui abia, a?”+ Idia haere: “Lasi, lauma helaga abia dalana be ai do kamonai lasi.” 3 Ia gwau: “Vadaeni dahaka bapatiso umui abia?” Idia haere: “Ioane ese ia karaia bapatisona.”+ 4 Paulo ia gwau: “Ioane ena bapatiso ese helalo-kerehai toana ia hahedinaraia,+ taunimanima ia hamaoroa ia murinai do ia mai tauna idia abidadama henia totona,+ unai be Iesu.” 5 Unai idia kamonai neganai, Lohiabada Iesu ena ladanai bapatiso idia abia. 6 Bona Paulo ese ena imana be idia latanai ia atoa neganai, lauma helaga idia abia,+ bona gado idauidau ai idia hereva bona idia peroveta matamaia.+ 7 Unai tatau ibounai be 12 bamona.

8 Paulo be hua toi lalonai sinagoga dekenai ia mai,+ bona mai gari lasi ida ia hereva, bona lalona veria dalanai Dirava ena Basileia ia harorolaia.+ 9 To haida be edia lalona idia ha-aukaia, idia ura lasi Paulo ena hereva idia abidadama henia. Hutuma vairanai Lohiabada ena dala idia gwauraia dika,+ vadaeni Paulo be idia amo ia raka siri+ bona hahediba taudia be ia danu ia hakaudia lao. Bona dina ta ta ai, Turano ena sikuli rumana ai ia haroro. 10 Lagani rua lalonai unai bamona ia karaia, unai dainai Asia provinsi dekenai idia noho Iuda bona Grik taudia ibounai ese Lohiabada ena hereva idia kamonai.

11 Dirava be Paulo ena imana amo siahu kara badadia ia karaia noho,+ 12 unai dainai taunimanima ese Paulo ena muko bona dabua be gorere taudia dekenai idia abia lao neganai,+ edia gorere ia ore bona lauma dikadia ese taunimanima idia rakatania.+ 13 To Iuda taudia haida be vaia idia loaloa bona taunimanima amo demoni idia lulua, bona lauma dikadia ese ia biagudia taudia dekenai Lohiabada Iesu ena ladana idia gaukaralaia toho, idia gwau: “Paulo ese ia harorolaia tauna Iesu ena ladanai umui lau oda henia, umui raka-lasi.”+ 14 Iuda taudia edia dubu biaguna ta ladana Sikeva ena natudia memero 7 be unai bamona idia karaia. 15 To lauma dikana be idia dekenai ia gwau: “Lau be Iesu+ bona Paulo lau diba,+ to umui be daika?” 16 Vadaeni lauma dikana ese ia biagua tauna be idia dekenai ia roho daekau, idia ta ta ia heatu henia bona idia ia halusia, bena ruma amo kopina kavakava* idia heau raka-lasi, mai bero ida. 17 Efeso dekenai idia noho Iuda bona Grik taudia ibounai ese unai sivarai idia kamonai neganai, idia gari dikadika, bona Lohiabada Iesu ena ladana idia hanamoa bada. 18 Bona idia abidadama taudia momo idia mai bona edia kara dika idia gwauraia hedinarai. 19 Oibe, meamea karadia idia karaia taudia momo be edia buka idia haboua bona taunimanima ibounai vairanai idia gabua.+ Unai buka edia davana idia haboua bona idia davaria edia davana be siliva moni 50,000. 20 Danu Iehova* ena siahu dainai ena hereva be ia bada ia lao bona ia goada.+

21 Unai gaudia ibounai idia vara murinai, Paulo ese ena lalona ia hadaia, Makedonia+ bona Akaia dekenai ia lao murinai, Ierusalema dekenai do ia lao.+ Ia gwau: “Unuseniai lau lao murinai, Roma dekenai do lau lao danu.”+ 22 Vadaeni ena durua taudia rua, Timoteo+ bona Erasito,+ be Makedonia dekenai ia siaia lao, to ia be Asia ena provinsi ai nega sisina ia noho.

23 Unai nega ai, Lohiabada ena dala dainai heiriheiri bada ia vara.+ 24 Tau ta ladana Demetrio be siliva gaukara ia karaia tauna, ia ese siliva amo Diana* ena dubu maragidia ia karaia, unai amo ia ida idia gaukara taudia ese moni momo idia abia.+ 25 Idia bona unai gaudia idia karaia taudia ma haida ia haboua bona ia gwau: “Tatau e, umui diba inai gaukara dainai ita taga. 26 Danu, umui itaia bona umui kamonai inai tauna Paulo, be Efeso sibona dekenai lasi,+ to kahirakahira Asia ena provinsi ibounai lalonai taunimanima momo edia lalona ia veria bona lalohadai ma ta idia abia dae. Ia gwau imana amo idia karaia dirava be dirava momokanidia lasi.+ 27 Unai be maoro lasi, dika taunimanima ese iseda bisinesi idia gwauraia dika. Do idia laloa dirava hahine hereadaena Diana ena dubu be anina lasi. Asia ena provinsi bona tanobada ibounai dekenai taunimanima ese ia idia tomadiho henia, to Paulo ena hereva dainai taunimanima ese ia do idia hanamoa lou lasi.” 28 Unai idia kamonai neganai, idia badu dikadika, bona idia boiboi badabada: “Efeso taudia edia dirava hahinena Diana be hereadae!”

29 Vadaeni siti lalonai heiriheiri bada ia vara bona nega tamona steidiam lalonai idia heau vareai, bona Gaio bona Arisitako,+ Paulo idia bamoa Makedonia taudia unai, idia veridia vareai danu. 30 Paulo ia ura ia vareai taunimanima ia hereva henia totona, to hahediba taudia ese idia koua. 31 Gadara bona aria idia naria taudia haida, Paulo ena turadia unai, ese ia dekenai hereva idia siaia bona idia noia goadagoada steidiam lalonai do ia vareai lasi, dika ena mauri ia haboioa. 32 Idia haboua taudia idia daradara dainai, gau idauidau idia boiboilaia. Bona idia momo be idia haboua ena badina idia diba lasi. 33 Vadaeni hutuma huana amo Alesana idia hakaua raka-lasi, bona Iuda taudia ese ia idia doria lao vaira kahanai. Bena Alesana ese ena imana amo toa ia karaia, ia ura ia vara gauna ia herevalaia. 34 To idia laloparara ia be Iuda tauna neganai, idia ibounai be mai lalotamona ida hora rua lalonai idia boiboi: “Efeso taudia edia dirava hahinena Diana be hereadae!”

35 Siti naria tauna ese hutuma edia boiboi ia hadokoa murinai, ia gwau: “Efeso siti taudia e, taunimanima ibounai idia diba, ita be Diana hereadaena ena dubu bona guba amo ia moru kaivakukuna ita gimaia taudia, ani? 36 Ta ese unai gaudia ia hakoikoia diba lasi dainai, namona be emui boiboi umui hadokoa bona umui kara haraga lasi. 37 Badina iniseniai umui mailaia tatau be dubu amo idia henaohenao lasi, bona iseda dirava hahinena ena ladana idia hadikaia lasi. 38 Unai dainai, bema Demetrio+ bona ena gaukara taudia idia ura tau ta be kota dekenai idia abia lao, kota dinadia idia noho, bona gavana taudia danu idia noho. Vadaeni ta ta idia samania diba. 39 To bema umui ura gau ma haida umui gwauraia, namona be taravatu hegeregerena idia karaia hebouna ta ai, unai do umui hamaoromaoroa. 40 Hari ia vara gauna dainai, ita idia samania diba, do idia gwau ita be gavamani ita gwau-edeede henia, badina inai hutuma edia heiriheiri karana ena badina ta ita gwauraia diba lasi.” 41 Bona unai gaudia ia gwauraia murinai, hebou taudia ia siaia lao.