Aposetolo Edia Kara

25 Festo+ be ena provinsi dekenai ia ginidae bona gavana gaukarana ia hamatamaia, bena dina toi murinai Kaisarea amo Ierusalema dekenai ia daekau lao. 2 Bona dubu biagudia bona Iuda ena tau badadia ese ia dekenai Paulo samania herevana idia gwauraia.+ Vadaeni Festo idia noia, 3 edia ura do ia kamonai bona Paulo be Ierusalema dekenai do ia siaia mai. To edia palani be dala ai Paulo do idia naria bona idia alaia.+ 4 To Festo ese ia hamaorodia Paulo be Kaisarea dekenai do ia noho bona ia danu be kahirakahira unuseni do ia lao. 5 Ia gwau: “Unai dainai umui huanai idia noho lohia taudia be lau danu idia mai be namo, bona bema unai tauna be kerere ta ia karaia, vadaeni ia do idia samania.”+

6 Unuseniai dina 8 eiava 10 ia noho murinai, Kaisarea dekenai ia diho lao bona murina dinana ai hahemaoro sea dekenai ia helai bena oda ia henia Paulo idia hakaua vareai totona. 7 Vadaeni Paulo ia vareai neganai, Ierusalema amo idia diho mai Iuda taudia be ia idia hagegea, bona ia dekenai samania hereva metaudia momo idia gwauraia, to unai hereva idia hamomokania diba lasi.+

8 To Paulo be idia dekenai ia gwau: “Lau be Iuda taudia edia Taravatu* lau utua lasi, eiava dubu helaga bona Kaisara dekenai kerere ta lau karaia lasi.”+ 9 Festo ia ura Iuda taudia ia hamoalea dainai,+ Paulo dekenai ia gwau: “Oi ura Ierusalema dekenai oi daekau bona unai hereva dainai lau vairanai oi do idia hahemaoro henia, a?” 10 To Paulo ia haere: “Lau be Kaisara ena hahemaoro sea vairanai lau gini, bona iniseniai lau do idia hahemaoro henia. Iuda taudia dekenai kerere ta lau karaia lasi, bona oi danu be unai oi lalopararalaia noho. 11 Bema lau be kerere ta lau karaia momokani bona unai dainai lau idia hamasea be maoro,+ vadaeni lau abia dae, lau mase be maoro. To bema inai taudia ese lau dekenai idia gwauraia samania hereva be anina lasi, tau ta be maoro lasi lau be idia dekenai ia henia totona. Lau ura Kaisara ese egu kota do ia kamonai!”+ 12 Bena Festo be sisiba henia taudia ida ia hebou murinai, ia gwau: “Oi ura Kaisara ese emu kota ia kamonai dainai, Kaisara dekenai do oi lao.”

13 Dina haida idia ore murinai, King Agripa* bona Berenike be Kaisarea dekenai idia ginidae, Festo idia hanamoa totona. 14 Idia be dina haida unuseniai do idia noho dainai, Festo be king dekenai Paulo ena sivarai ia herevalaia. Ia gwau:

“Feliki ese tau ta be dibura rumana lalonai ia rakatania, 15 bona lau be Ierusalema dekenai lau noho neganai, dubu biagudia bona Iuda taudia edia tau badadia be ena sivarai idia gwauraia,+ bona lau idia noia ia do lau panisia totona. 16 To idia dekenai lau gwau, Roma taudia edia kara be, ia kerere tauna be ena samania taudia edia ura hegeregerena idia hahemaoro henia haraga lasi. To ia be edia vairanai do ia gini guna, bona idia gwauraia samania hereva dainai idia do ia haere henia.+ 17 Vadaeni iniseniai idia ginidae neganai, lau naria lasi, to murina dinana ai, hahemaoro sea dekenai lau helai bona oda lau henia unai tauna do idia hakaua vareai. 18 Ia idia samania taudia idia gini neganai, lau laloa ia karaia kara dika haida do idia gwauraia, to idia gwauraia lasi.+ 19 Edia tomadiho karana bona ia mase vadaeni tauna ta ladana Iesu dainai idia hepapahuahu,+ badina Paulo ia gwau Iesu be ia mauri noho.+ 20 Edia hepapahuahu hamaoromaoroa dalana lau diba lasi dainai, Paulo lau nanadaia bema ia ura Ierusalema dekenai ia lao bona unuseniai unai hereva dainai do idia hahemaoro henia.+ 21 To Paulo ia noinoi ia do ai dogoatao noho ela bona Augusto Ginigunana* ese ena disisen ia karaia.+ Unai neganai oda lau henia, do ia noho ela bona Kaisara dekenai ia lau siaia.”

22 Bena Agripa be Festo dekenai ia gwau: “Lau danu lau ura unai tauna ena hereva lau kamonai.”+ Festo ia gwau: “Kerukeru ena hereva do oi kamonai.” 23 Unai dainai, murina dinana ai, Agripa bona Berenike be mai hekokoroku bona regerege bada ida idia mai bona hebou rumana lalonai idia vareai, bona tuari biagudia bona siti tau badadia be idia ida idia mai, vadaeni Festo be oda ia henia neganai, Paulo idia hakaua vareai. 24 Bona Festo ia gwau: “King Agripa bona ai ida umui hebou taudia ibounai e, hari umui itaia noho tauna dainai, Iuda taudia hutuma Ierusalema ai bona iniseniai be lau idia noia idia gwau, inai tauna ia mase be namo.+ 25 To lau diba ia be kerere ta ia karaia lasi ia mase totona.+ Unai dainai inai tauna ia ura Augusto Ginigunana ese ena kota do ia kamonai neganai, egu lalona lau hadaia ia do lau siaia. 26 To lau diba lasi ia dainai dahaka hereva do lau torea bona egu Lohia dekenai do lau siaia. Unai dainai ia be umui vairanai lau mailaia, bona oi, King Agripa vairanai danu, unai amo iena kara ita tahua murinai, do lau diba dahaka hereva do lau torea. 27 Badina lau laloa ia maoro lasi bema dibura tauna ta lau siaia, to iena kerere lau gwauraia hedinarai lasi.”