Deuteronomi

24 “Bema tau ta be hahine ta ia adavaia, to tau be hahine ena kara dikana ta ia itaia dainai, ia moale lasi, namona be tau ese divos pepa ia torea,+ ia dekenai ia henia, bona iena ruma amo ia siaia lao.+ 2 Unai hahine be tau ena ruma ia rakatania murinai, tau ma ta ia adavaia diba.+ 3 Bema ena tau iharuana ese ia inai henia* bona divos pepa ia torea, bona ia dekenai ia henia bena iena ruma amo ia siaia lao, eiava bema unai hahine ena adavana iharuana ia mase, 4 ena adavana ginigunana, ia ia siaia lao tauna unai, be maoro lasi ia do ia adavaia lou totona, badina hahine be ia miro vadaeni, bona Iehova dekenai unai be kara dika rohoroho. Namo lasi Iehova emui Dirava ese umui dekenai ahuna bamona ia henia tano lalonai, kara dika umui abia vareai.

5 “Tau ta ia headava matamata neganai, ia be tuari dekenai do ia lao lasi eiava ia dekenai gaukara ma haida do idia henia lasi. Ia be lagani tamona lalonai unai gaukara ta do ia karaia lasi, to ena ruma dekenai ia noho bona ena adavana ia hamoalea.+

6 “Namo lasi ta ese witi moia nadi eiava ena ataiai nadi be ena abitorehai hamomokania gauna bamona ia abia,+ badina unai be hegeregere ia ese ta ena mauri durua gauna be ia amo ia kokia.

7 “Bema tau ta be ena Israela tadikaka ta ia henaoa bona ia kara auka henia bena ia hoihoilaia,+ namona be unai henaohenao tauna idia hamasea.+ Emui huana amo dika gauna umui kokia be namo.+

8 “Lepera gorere* be ia vara matamaia neganai, namona be Levi hahelaga taudia ese umui dekenai idia henia hadibaia hereva ibounai umui badinaia namonamo.+ Oibe, idia dekenai lau henia oda herevadia umui badinaia. 9 Aigupito amo umui raka-lasi neganai, Iehova emui Dirava ese Miriama dekenai ia karaia karana umui laloatao.+

10 “Bema emu dekena tauna dekenai oi henitorehai,+ namo lasi iena ruma lalonai oi vareai bona ena abitorehai hamomokania totona ia ura henia gauna oi abia. 11 Namona be murimuri ai oi gini, bona ia abitorehai tauna do ia raka-lasi bona ena abitorehai hamomokania gauna be oi dekenai do ia henia. 12 Bona bema tau ta be ia dabu, namo lasi ia henia dabua, hamomokania gauna unai, be oi dekenai ia noho ela bona murina dinana.+ 13 To dina ia diho neganai, oi dekenai ia henia dabua, hamomokania gauna unai, be ia dekenai oi henia lou be namo, bona ia be unai dabua ai do ia mahuta,+ bena ia ese oi do ia hanamoa. Bona Iehova emui Dirava ena vairanai, oi be kara maoromaoro oi karaia.

14 “Namo lasi davana abia totona ia gaukara ogogami tauna ena kohu be koikoi dalana amo umui abia, herevana ia be emui tadikaka eiava emui tano ta ai, emui siti lalodiai, ia noho idau tauna.+ 15 Namona be dina ia do diho lasi neganai, unai dina ena gaukara davana be ia dekenai oi henia,+ badina ia be ia dabu bona ia ura momokani ena gaukara davana ia abia. Dika Iehova ia boiboi henia bona oi ia samania, oi be oi kara dika unai.+

16 “Namo lasi natudia edia kara dika dainai tamadia idia hamasea, bona namo lasi tamadia edia kara dika dainai natudia idia hamasea.+ Ta be sibona ena kara dika dainai idia hamasea be namo.+

17 “Namo lasi idau tauna eiava tamana lasi natuna* edia kota herevana umui hagagevaia.+ Bona namo lasi vabu ta ena dabua be abitorehai hamomokania gauna bamona umui abia.+ 18 Namona be umui laloatao, umui be Aigupito ai igui hesiai taudia ai umui lao, bona unuseni amo Iehova emui Dirava ese umui ia ruhaia.+ Unai dainai umui lau oda henia inai umui karaia totona.

19 “Emui uma amo witi anina umui gogoa bona umui kwatua hebou witi umui laloaboio neganai, namo lasi umui giroa lou umui abia totona. To namona be idau taudia, tamana lasi natudia, bona vabu totona umui rakatania,+ unai amo Iehova emui Dirava ese umui karaia gaudia ibounai lalonai umui do ia hanamoa.+

20 “Emui olive auna umui botaia neganai, namo lasi au ena rigi danu umui botaia. Au dekenai idia do noho huahua be idau taudia, tamana lasi natudia, bona vabu totona do umui rakatania.+

21 “Emui vain uma amo greips umui gogoa neganai, namo lasi umui giroa lou umui rakatania gaudia umui gogoa totona. Namona be idau taudia, tamana lasi natudia, bona vabu totona umui rakatania. 22 Namona be umui laloatao, umui be Aigupito tano ai igui hesiai taudia ai umui lao. Unai dainai umui lau oda henia inai umui karaia totona.