Revareva ta Galatia Taudia Dekenai

1 Lau Paulo, aposetolo tauna ta, ese inai aposetolo gaukara be taunimanima amo eiava tau ta amo lau abia lasi, to Iesu Keriso+ bona iseda Tamana Dirava+ amo lau abia. Ia ese Iesu be mase amo ia hatorea isi lou. 2 Lau bona lau ida idia noho tadikaka ibounai ese Galatia ai idia noho kongrigeisen ibounai ai tore henia.

3 Namona be Dirava iseda Tamana bona Lohiabada Iesu Keriso amo hebogahisi hereadaena bona maino umui abia. 4 Iseda kara dika dainai Iesu Keriso be sibona ia henia,+ inai nega oromana* dikana amo ita ia ruhaia totona,+ iseda Dirava bona Tamana ena ura hegeregerena,+ 5 ia dekenai hairai ia noho ela bona hanaihanai. Amen.

6 Lau hoa badina Keriso ena hebogahisi hereadaena amo umui ia boiria Tauna amo umui raka siri haraga bona sivarai namona idauna umui badinaia.+ 7 Sivarai namona idauna ma ta be lasi, to haida ese umui dekenai hekwakwanai idia havaraia noho,+ bona idia ura Keriso ena sivarai namona idia hagagevaia. 8 To, bema ai ta eiava guba amo aneru ta be umui dekenai sivarai namona ia harorolaia, bona unai be guna ai harorolaia sivarai namona amo ia idau, vadaeni unai tauna ese dika ia davaria be namo. 9 Ai hereva vadaeni bamona, hari lau hereva lou, bema ta be umui dekenai sivarai namona ia harorolaia, bona unai be guna umui abia dae gauna amo ia idau, vadaeni unai tauna ese dika ia davaria be namo.

10 Lau ura taunimanima edia lalonamo eiava Dirava ena lalonamo lau abia toho, a? Eiava lau ura taunimanima lau hamoalea, a? Bema lau be taunimanima lau hamoalea noho, lau be Keriso ena hesiai tauna lasi. 11 Tadikaka e, lau ura umui diba, umui dekenai lau harorolaia sivarai namona be taunimanima amo lasi.+ 12 Oibe, unai be taunimanima amo lau abia lasi bona tau ta ese lau dekenai ia hadibaia lasi, to Iesu Keriso ese lau dekenai ia hahedinaraia.

13 Oibe, guna Iuda tomadiho lau badinaia neganai, lau karaia karadia edia sivarai umui kamonai vadaeni.+ Lau ese Dirava ena kongrigeisen lau dagedage henia bada bona lau ura hadikaia ore.+ 14 Bona Iuda tomadiho lalonai lau goada lau lao, bona egu bese taudia huanai lau be egu mauri lagani tamona taudia bamona lasi, badina lau be mai ura bada ida egu tamadia edia sene karadia lau badinaia.+ 15 To Dirava dainai lau vara bona ena hebogahisi hereadaena amo lau ia boiria,+ bona ia laloa namona be 16 lau ia gaukaralaia ena Natuna lau gwauraia hedinarai totona bona bese idauidau taudia dekenai ena sivarai namona do lau harorolaia.+ Lau lao haraga lasi ma ta dekenai sisiba lau abia totona. 17 Ierusalema dekenai lau lao lasi, aposetolo taudia ai idia lao guna taudia lau itaia totona, to Arabia dekenai lau lao bena Damaseko dekenai lau giroa lou.+

18 Bena lagani toi murinai Ierusalema dekenai lau daekau lao,+ Kepa*+ lau vadivadi henia totona bona ia ida dina 15 lau noho. 19 Aposetolo taudia ma haida lau itaia lasi, to Lohiabada ena tadina Iamesi+ sibona. 20 Dirava ena vairanai umui lau hamaoroa momokani, umui dekenai lau torea gaudia be koikoi herevadia lasi.

21 Unai murinai lau be Suria bona Kilikia edia gabu haida dekenai lau lao.+ 22 To Iudea ai idia noho Keristani kongrigeisen be lau idia diba lasi. 23 To inai hereva sibona idia kamonai: “Guna ita ia dagedage henia tauna+ be hari inai tomadiho, guna ia ura hadikaia gauna, ena sivarai namona ia harorolaia.”+ 24 Vadaeni lau dainai Dirava idia hanamoa matamaia.