Samuela Ginigunana

14 Dina ta, Saulo ena natuna Ionatana+ ese ena hesiai tauna, iena tuari kohu ia huaia tauna unai, ia hamaoroa: “Oi mai bona unai kahana dekenai ita hanaia lao, Filistia tuari tatau idia kamepa gabuna ai.” To ia ese ena tamana ia hamaoroa lasi. 2 Unai nega ai, Saulo be Migirona ai ia noho, unai be Gibea kahirakahira,+ ena palai ruma be pomogranet* au henunai. Bona tuari tatau 600 be ia danu idia noho.+ 3 (Bona Ahaisa be epodi*+ ia atoa. Ia be Ahitubu ena natuna,+ Ahitubu be Ikaboda+ ena tadikaka, Ikaboda be Pineha+ ena natuna, bona Pineha be Eli+ ena natuna, ia be Iehova ena hahelaga tauna Silo+ dekenai.) Bona tuari tatau idia diba lasi Ionatana be ia lao vadaeni. 4 Ionatana ese Filistia tuari taudia idia kamepa gabuna ia lao henia totona, ia ura hanaia gabuna ena huanai nadi badadia rua, isena ena toana bamona idia noho, nadi badana ta be kahana ta ai bona ma ta be kahana ma ta ai. Ta ena ladana be Bose, bona ma ta ena ladana be Seneha. 5 Nadi badana ta be not kahana ai du ta bamona ia gini bona Mikimasa ia vaira henia, bona ma ta be saut kahana ai Geba ia vaira henia.+

6 Bena Ionatana be ena tuari kohu huaia tauna dekenai ia gwau: “Oi mai bona inai kopina idia utua lasi tatau edia noho gabuna dekenai ita hanaia lao.+ Reana Iehova be ita do ia durua, badina gau ta ese Iehova do ia koua lasi, ena be momo eiava haida sibona idia tuari.”+ 7 Unai neganai iena tuari kohu huaia tauna be ia dekenai ia gwau: “Emu kudouna ena ura hegeregerena oi kara. Oi ura gabudia dekenai oi lao. Oibe, oi lao gabudia dekenai, lau be oi ida do lau lao.” 8 Bena Ionatana ia gwau: “Ita be unai tatau dekenai do ita hanaia lao bona idia ese ita do idia itaia. 9 Bema ita dekenai idia gwau, ‘Umui gini noho ela bona ai be umui dekenai do ai mai!’ Vadaeni eda gabu dekenai do ita gini bona idia dekenai do ita daekau lao lasi. 10 To bema idia gwau, ‘Ai dekenai umui daekau mai!’ Vadaeni do ita daekau lao, badina Iehova ese idia be iseda imana dekenai do ia atoa. Unai be toa ta ita dekenai.”+

11 Bena idia ruaosi be Filistia tuari taudia idia kamepa gabuna dekenai idia hedinarai. Vadaeni Filistia taudia idia gwau: “Itaia, inai Heberu taudia be idia hunia noho guri amo idia raka-lasi noho.”+ 12 Vadaeni Filistia tatau be Ionatana bona ena tuari kohu huaia tauna dekenai idia gwau: “Ai dekenai umui daekau mai, bona umui do ai hadibaia!”+ Karaharaga Ionatana be ena tuari kohu huaia tauna dekenai ia gwau: “Lau oi badinaia, badina Iehova ese idia be Israela taudia edia imana ai do ia atodia.”+ 13 Bona Ionatana be ena imana bona aena amo ia rau daekau, bona iena tuari kohu huaia tauna be iena murina ai. Bena Ionatana be Filistia taudia ida ia tuari matamaia. Bona ia hamasedia lasi taudia be iena tuari kohu huaia tauna ese ia hamasedia. 14 Ionatana bona ena tuari kohu huaia tauna ese unai tatau idia tuari henia negana ginigunana ai, idia ese tatau 20 bamona idia hamasedia, unai be tano ena kahana ta lalonai.*

15 Bena tuari kamepa ai idia noho taudia bona kamepa idia gimaia Filistia tuari tatau ibounai, bona tuari totona idia lao tuari taudia+ danu idia gari dikadika. Bona tano ia marere matamaia, bona Dirava ese Filistia taudia dekenai gari bada ia havaraia. 16 Beniamina tanona Gibea+ ai, Saulo ena gima taudia idia itaia, gabu ibounai dekenai daradara bada ia vara noho.+

17 Saulo be ia ida idia noho tuari tatau dekenai ia gwau: “Mani taunimanima umui duahia, bona do ita itaia daika be ita danu ia noho lasi.” Vadaeni taunimanima idia duahia neganai, idia itaia Ionatana bona ena tuari kohu huaia tauna be idia noho lasi. 18 Vadaeni Saulo be Ahaisa+ dekenai ia gwau: “Dirava momokanina ena Maua oi abia mai kahirakahira!” (Badina unai nega ai Dirava momokanina ena Maua be Israela taudia dekenai ia noho.) 19 Bona Saulo be hahelaga tauna ia hereva henia noho lalonai, Filistia taudia edia kamepa lalonai daradara ia bada ia lao. Bena Saulo be hahelaga tauna dekenai ia gwau: “Oi karaia gaukarana oi hadokoa.” 20 Vadaeni Saulo bona ia danu idia noho tuari tatau ibounai idia haboua bona tuari totona idia lao, bena idia itaia Filistia taudia be idia tuari heheni, bona daradara be bada herea. 21 Danu, guna Filistia taudia idia bamoa bona edia kamepa dekenai idia daekau lao Heberu taudia haida be Israela edia kahanai idia lao, idia be Saulo bona Ionatana edia hakaua henunai idia noho. 22 Eparaima ena ororo gabudia ai idia hunia Israela tatau ibounai+ idia kamonai, Filistia taudia idia heau vadaeni, bona idia danu be tuari lalonai idia vareai bona Filistia taudia idia luludia. 23 Vadaeni unai dina ai Iehova ese Israela taudia ia hamauria,+ bona idia tuari ela bona Betavene idia hanaia.+

24 To unai dina ai Israela tatau idia manoka momokani, badina Saulo ese idia dekenai gwauhamata metauna ia henidia, ia gwau: “Tau ta do ia aniani lasi ela bona dina ia diho bona ela bona egu inai taudia edia kerere davana lau henia. Do ia aniani tauna be dika do ia davaria!” Unai dainai tuari tatau idia aniani lasi.+

25 Bona tuari tatau ibounai be au momo gabunai idia vareai, bona tano dekenai hani ia noho. 26 Idia ese hani idia itaia ia veve diho noho, to ta ese ia abia lasi bona ia ania lasi, badina unai gwauhamata metauna dainai idia gari. 27 To Ionatana ia diba lasi ena tamana ese tuari tatau be gwauhamata metauna henunai ia atodia,+ vadaeni ena itotohi ena dorina amo hani ia abia. Bona ia ania neganai, ena matana idia diari. 28 Unai neganai tuari tauna ta ia gwau: “Emu tamana ese tuari tatau be gwauhamata metauna ta henunai ia atodia, ia gwau: ‘Hari dina aniani ia ania tauna be dika do ia davaria!’+ Unai dainai tuari tatau idia manoka momokani.” 29 To Ionatana ia gwau: “Egu tamana ese inai tano ai dika bada ia mailaia. Itaia, lau ese inai hani sisina lau mamia dainai, egu matana idia diaridiari. 30 Bema hari dina tuari tatau ese edia inai taudia amo idia abia aniani idia ania,+ do ita kwalimu momokani. Bona Filistia taudia momo herea ita hamasedia diba.”

31 Unai dina ai idia ese Filistia taudia idia hamasea noho, Mikimasa amo ela bona Aialono+ dekenai, bona tuari tatau be idia manoka momokani. 32 Unai dainai idia be tuari amo idia abia gaudia totona mai mataganigani ida idia kara matamaia, bona mamoe bona boromakau bona boromakau natudia idia abia bona tano latanai idia alaia, bona vamu mai rarana idia ania.+ 33 Vadaeni unai sivarai be Saulo dekenai idia gwauraia: “Itaia, taunimanima be vamu mai rarana idia ania dainai Iehova dekenai idia kara dika.”+ Unai neganai ia gwau: “Umui be mai abidadama ida umui kara lasi. Harihari lau dekenai nadi badana ta umui doria mai.” 34 Bena Saulo ia gwau: “Taunimanima huanai umui lao bona idia dekenai umui gwau, ‘Umui ta ta ese emui boromakau tau bona mamoe umui mailaidia bona iniseniai umui alaia bona umui ania. Namo lasi vamu mai rarana umui ania karana amo Iehova dekenai umui kara dika.’”+ Vadaeni unai hanuaboi ai idia ta ta ese edia boromakau tau idia mailaia bona unuseniai idia alaia. 35 Bona Saulo ese Iehova dekenai boubou patana ia haginia.+ Unai be Iehova dekenai ia haginia boubou patana ginigunana.

36 Gabeai Saulo ia gwau: “Namona be Filistia taudia edia murinai ita diho lao bona hanuaboi ai ita tuari henidia bona hadikadia ore ela bona daba diarina ia hedinarai. Ta do ita hamauria lasi.” Unai neganai idia gwau: “Emu matana ai ia namo gauna oi karaia.” Bena hahelaga tauna ia gwau: “Namona be iniseniai Dirava momokanina ita noinoi henia.”+ 37 Bona Saulo be Dirava ia noinoi henia: “Lau be Filistia taudia edia murina amo do lau diho lao, a?+ Oi ese idia be Israela taudia edia imana ai do oi atodia, a?” To unai dina ai Dirava ese ia haere henia lasi. 38 Bena Saulo ia gwau: “Taunimanima gunalaia taudia e, iniseniai umui mai, bona umui tahua hari dina dahaka kara dika ia vara. 39 Badina Iehova, Israela taudia ia hamauria Diravana, dainai oi lau hamaoroa momokani, ena be egu natuna Ionatana be kara dikana ta ia karaia, ia mase be namo.” To taunimanima ese ia idia haere henia lasi. 40 Bena Israela taudia ibounai dekenai ia gwau: “Umui be kahana ta dekenai do umui gini, bona egu natuna Ionatana bona lau be kahana ma ta dekenai do ai gini.” Unai neganai taunimanima be Saulo dekenai idia gwau: “Emu matana ai ia namo gauna oi karaia.”

41 Vadaeni Saulo be Iehova dekenai ia gwau: “Israela ena Dirava e, Tumima*+ amo haere ta oi henia!” Vadaeni Tumima ese Ionatana bona Saulo ia poinia, bona Israela taudia ta be ia kerere lasi. 42 Bena Saulo ia gwau: “Lau bona egu natuna Ionatana huanai abia hidi* umui karaia.”+ Bona Ionatana idia abia hidi. 43 Bena Saulo be Ionatana dekenai ia gwau: “Lau oi hamaoroa, dahaka oi karaia?” Vadaeni Ionatana ese ia hamaoroa: “Lau ese egu itotohi ena dorina amo hani sisina lau abia bona lau ania.+ Harihari lau oi hamasea diba!”

44 Unai neganai Saulo ia gwau: “Ionatana e, bema oi mase lasi, Dirava ese lau ia panisia be namo.”+ 45 To tuari tatau be Saulo dekenai idia gwau: “Ionatana, Israela taudia dekenai kwalimu bada ia mailaia tauna unai, do ia mase, a?+ Lasi, unai do ia vara lasi! Iehova, ia mauri noho Diravana, ena ladana dekenai ai gwauhamata, iena kwara huina ta be tano dekenai do ia moru lasi, badina hari dina ia karaia karana dekenai Dirava ese ia durua.”+ Unai amo tuari tatau ese Ionatana idia hamauria, bona ia mase lasi.

46 Vadaeni Saulo ese Filistia taudia ia lulua karana ia hadokoa, bona Filistia taudia be edia tano dekenai idia lao.

47 Saulo ese Israela ibounai lalonai iena lohia siahuna ia hagoadaia bona kahana ibounai dekenai ena inai taudia ibounai ia tuari henidia, oibe, Moaba taudia,+ Amono taudia,+ Edoma taudia,+ Soba ena king taudia,+ bona Filistia taudia+ ia tuari henidia, bona ia lao gabudia ibounai dekenai ia halusidia. 48 Bona mai gari lasi ida ia tuari bona Amaleka taudia+ ia halusia bona Israela taudia be edia inai taudia amo ia hamauridia.

49 Saulo ena natudia memero be, Ionatana, Isivi bona Maliki-sua.+ Bona ena natudia kekeni be rua, badana ena ladana be Meraba+ bona maragina ena ladana be Mikala.+ 50 Saulo ena adavana ena ladana be, Ahinoama, ia be Ahimasa ena natuna kekeni. Saulo ena tuari biaguna ena ladana be Abinere,+ ia be Nere ena natuna. Nere be Saulo ena vavana. 51 Saulo ena tamana be Kisa,+ bona Abinere ena tamana be Nere,+ ia be Abiele ena natuna.

52 Saulo ena lohia negana lalonai, ia be nega momo Filistia taudia ida tuari badadia ia karaia.+ Saulo ese goada eiava gari lasi tauna ia itaia neganai, ena tuari oreana dekenai ia abia vareai.+