Samuela Iharuana

19 Haida ese Ioaba idia hamaoroa: “King be Abesaloma totona ia taitai bona ia lalohisihisi noho.”+ 2 Vadaeni ena be unai dina ai tuari dekenai idia kwalimu, to taunimanima ibounai idia lalohisihisi, badina idia kamonai king be ena natuna totona ia taitai noho. 3 Unai dina ai taunimanima be mai regerege lasi ida siti dekenai idia giroa lou,+ tuari ai idia lusi bona idia hemarai taudia bamona. 4 King be ena vairana ia koua bona mai gado bada ida ia taitai noho, ia gwau: “Egu natuna Abesaloma! Abesaloma egu natuna, egu natuna!”+

5 Bena Ioaba be ruma lalonai ia vareai bona king dekenai ia gwau: “Hari dina oi ese emu hesiai taudia ibounai oi hahemaraidia, idia ese oi, emu natudia memero,+ emu natudia kekeni,+ emu adavadia, bona emu adavana ma haida+ idia hamauria. 6 Oi ese oi idia inai henia taudia oi lalokau henia bona oi idia lalokau henia taudia oi inai henia, badina hari dina oi hahedinaraia, emu tuari biagudia bona hesiai taudia be anina lasi oi dekenai, badina lau diba momokani, bema Abesaloma be hari dina ia mauri bona ai ibounai ai mase, unai be do ia namo oi dekenai. 7 Harihari oi toreisi, oi lao bona emu hesiai taudia oi hagoadaia, badina Iehova ena ladanai lau gwauhamata, bema oi lao lasi, hari hanuaboi tau ta be oi ida do ia noho lasi. Bona unai ena dika ese oi matamata negana amo ema bona hari oi davaria dika ibounai do ia hereaia.” 8 Unai dainai king ia toreisi bona siti ena geiti badinai ia helai bona taunimanima ibounai idia hamaoroa, idia gwau: “King be siti ena geiti badinai ia helai noho.” Bena taunimanima ibounai be king vairanai idia lao.

To Abesaloma idia durua Israela taudia be edia gabu dekenai idia heau lao.+ 9 Israela ena iduhu ibounai lalonai idia noho taudia ibounai idia hepapahuahu noho, idia gwau: “King ese ai be emai inai taudia amo ia hamauria,+ bona Filistia taudia amo ai ia hamauria danu, to hari Abesaloma dainai ia be inai tano amo ia heau vadaeni.+ 10 Bona Abesaloma, ita horoa tauna unai,+ be tuari lalonai ia mase.+ Vadaeni dahaka dainai gau ta umui karaia lasi king umui mailaia lou totona?”

11 King Davida ese hahelaga taudia, Sadoka+ bona Abiatara,+ dekenai inai hereva ia siaia, ia gwau: “Iuda ena tau badadia dekenai umui hereva umui gwau,+ ‘Dahaka dainai umui sibona ese gau ta umui karaia lasi king be ena ruma dekenai umui mailaia lou totona? Egu ruma dekenai lau idia hamaoroa vadaeni, Israela taudia ibounai idia ura lau giroa mai. 12 Umui be lauegu tadikaka, lauegu rara tamona taudia. Dahaka dainai umui sibona be gau ta umui karaia lasi king umui mailaia lou totona?’ 13 Bona namona be Amasa dekenai umui gwau,+ ‘Oi be egu rara tamona tauna, ani? Bema Ioaba ena gabu oi abia bona egu tuari biaguna ai oi lao lasi, vadaeni Dirava ese lau ia panisia be namo.’”+

14 King ese unai hereva amo Iuda taudia ibounai edia lalona ia veria, bona idia ese ia dekenai hereva idia siaia, idia gwau: “Oi giroa mai, oi bona emu hesiai taudia ibounai.”

15 Vadaeni king be ia giroa lou matamaia bona Ioridane dekenai ia ginidae, bona Iuda taudia be Gilegala dekenai idia mai,+ unai amo king do idia hedavari henia bona Ioridane ai do idia abia hanaia. 16 Bena Gera ena natuna Simei,+ ia be Beniamina tauna Bahurimi amo, be Iuda taudia ida ia diho lao haraga King Davida ia hedavari henia totona, 17 bona Beniamina iduhuna amo tatau 1,000 ese ia idia bamoa. Bona Siba,+ Saulo ena ruma bese ena hesiai tauna unai, bona ena natudia memero 15 bona hesiai taudia 20 be idia diho lao haraga, bona king be Ioridane dekenai ia do ginidae lasi neganai, idia ginidae guna. 18 Ia* be sinavai ena dobu lasi kahana amo ia hanaia lao, king ena ruma bese ia hakaua hanai bona king ena ura ibounai ia badinaia totona. To Gera ena natuna, Simei, be Ioridane ia hanaia gwauraia neganai, king vairanai ia tui diho. 19 Ia be king dekenai ia gwau: “Mani egu kerere oi gwauatao, bona egu lohia bona king e, guna Ierusalema oi rakatania negana ai, oi dekenai lau karaia kerere oi laloatao lasi.+ Mani king ese unai gaudia ia laloaboio, 20 badina lau, emu hesiai tauna, lau diba lau kerere vadaeni. Unai dainai hari dina Iosepa ena bese amo lau be tau ginigunana lau diho mai, egu lohia bona king lau hedavari henia totona.”

21 Unai neganai Seruia ena natuna,+ Abisai,+ ia gwau: “Simei be unai kara dainai ia mase be namo, ani? Badina ia ese Iehova ena horoa tauna ia gwauraia dika.”+ 22 To Davida ia gwau: “Seruia ena natudia e,+ inai ena anina be dahaka umui dekenai, ma umui ese hari dina lau umui gwau-edeede henia. Hari dina Israela ai ta ita alaia mase be namo, a? Lau be Israela ena king ai lau lao lou, a?” 23 Bena king be Simei dekenai ia gwau: “Oi be do oi mase lasi.” Bona king ese ia dekenai unai gwauhamata metauna ia karaia.+

24 Saulo ena tubuna, Mefiboseta,+ danu be king hedavari henia totona ia diho lao. Ia be ena aena ia huria lasi* eiava ena besoso ia utua lasi eiava ena dabua ia huria lasi, King ia lao dinana amo ela bona ia giroa mai namonamo dinana. 25 Mefiboseta be Ierusalema ai king hedavari henia totona ia mai neganai, king be ia dekenai ia gwau: “Mefiboseta e, dahaka dainai lau ida oi lao lasi?” 26 Unai neganai Mefiboseta ia gwau: “Egu lohia bona king e, egu hesiai tauna+ ese lau ia koia. Badina lau* ese ia lau hamaoroa, ‘Mani egu doniki oi abia hegaegae, do lau guia bona king dekenai do lau lao,’ badina egu* aena idia dika.+ 27 To ia ese egu lohia bona king dekenai egu ladana ia hadikaia.+ To egu lohia bona king be Dirava momokanina ena aneru ta bamona, badina ia aonega, unai dainai emu ura hegeregerena lau oi kara henia. 28 Badina egu lohia bona king ese egu tamana ena ruma bese taudia ibounai ia hamasedia ore diba. To oi ese emu hesiai tauna be oi ida idia aniani hebou taudia ida teibolo tamona dekenai oi atoa.+ Vadaeni lau dekenai dahaka maoro ia noho king amo gau ta lau noia totona?”

29 To king be ia dekenai ia gwau: “Dahaka dainai inai gauna oi herevalaia noho? Egu lalona lau hadaia vadaeni, oi bona Siba huanai unai tano do umui haria.”+ 30 Unai neganai Mefiboseta be king dekenai ia gwau: “Egu lohia e, namona be unai tano ibounai ia abia, lau be hegeregere badina egu lohia bona king be ena ruma dekenai mai maino ida ia giroa lou namonamo vadaeni.”

31 Gileada tauna Barasilai+ be Rogelima amo ia diho mai, king be Ioridane sinavai ena dobu lasi kahana dekenai ia hakaua lao totona. 32 Barasilai be ia buruka momokani, ena mauri lagani be 80, bona king be Mahanaimi dekenai ia noho neganai, Barasilai ese ia dekenai aniani ia henia,+ badina ia be taga bada tauna. 33 Unai dainai king be Barasilai dekenai ia gwau: “Lau ida oi hanaia lao bona Ierusalema ai oi dekenai aniani do lau henia.”+ 34 To Barasilai be king dekenai ia gwau: “Lauegu mauri lagani be bada, dahaka dainai king ida Ierusalema dekenai do lau daekau lao? 35 Hari lauegu mauri lagani be 80.+ Lau ese namo bona dika edia idau lau gwauraia diba, a? Lau, emu hesiai tauna, ese lau ania bona inua gaudia edia mamina lau mamia diba, a? Lau ese ane idia abia tatau bona hahine edia gado regena lau kamonaia noho diba, a?+ Vadaeni dahaka dainai lau, emu hesiai tauna, be egu lohia bona king dekenai metau gauna ai do lau lao? 36 Lau, emu hesiai tauna, ese king be Ioridane dekenai lau hakaua mai sibona be hegeregere. Dahaka dainai king ese lau dekenai unai bamona davana do ia henia? 37 Mani lau giroa lou bona egu gabu dekenai lau mase, egu tamana bona sinana edia guria gabuna kahirakahira ai.+ To emu hesiai tauna Kimuhamu be inai.+ Mani ia be egu lohia bona king ida ia hanaia lao, bona dahaka be namo oi dekenai, unai hegeregerena ia oi kara henia.”

38 Unai dainai king ia gwau: “Kimuhamu be lau ida do ia hanaia lao, bona dahaka be namo oi dekenai, unai hegeregerena ia do lau kara henia. Bona herevana lau dekenai dahaka oi noia, oi totona do lau karaia.” 39 Vadaeni taunimanima ibounai be Ioridane idia hanaia matamaia, bona king ia hanaia neganai, ia ese Barasilai ia kisi henia+ bona ia hanamoa bona Barasilai be ena noho gabuna dekenai ia giroa lou. 40 King be Gilegala dekenai ia hanaia lao neganai,+ Kimuhamu be ia ida ia hanaia. Iuda taudia ibounai bona Israela besena ena kahana ta ese king idia abia hanaia.+

41 Bena Israela taudia ma haida be king dekenai idia lao bona idia gwau: “Dahaka dainai emai tadikaka, Iuda taudia unai, ese hehuni dalanai oi idia abia lao bona oi bona emu ruma bese taudia bona emu taunimanima ibounai be Ioridane amo idia abia hanaia?”+ 42 To Iuda taudia ibounai be Israela taudia idia haere henia, idia gwau: “Badina king be emai varavara.+ Dahaka dainai inai totona umui badu? Ai be king ena aniani ta ai ania, a? Eiava ai dekenai harihari gauna ta ia henia, a?”

43 To, Israela taudia ese Iuda taudia idia haere henia, idia gwau: “Aiemai iduhu be 10, unai dainai emai ahuna be bada Davida dekenai, to umui be lasi. Dahaka dainai mai hemataurai lasi ida ai umui kara henia? Ai be taunimanima ginigunadia king do ai abia hanaia totona, ani?” To Iuda taudia edia hereva ese Israela taudia edia hereva ia halusia.