Samuela Iharuana

24 Ta ese Davida ena lalona ia veria Israela taudia do ia duahia, ia gwau: “Oi lao, Israela bona Iuda taudia oi duahia.”+ Unai neganai, Iehova ena badu mai siahuna be Israela taudia latanai ia diho lou.+ 2 Vadaeni king be ia ida ia noho tuari biaguna Ioaba+ dekenai ia gwau: “Mani Israela ena iduhu ibounai, Dano amo ela bona Bere-sieba dekenai oi lao,+ bona tatau* oi rejistaia, unai amo edia namba do lau diba.” 3 To Ioaba be king dekenai ia gwau: “Iehova emu Dirava ese tuari taudia edia namba be nega 100 ia habadaia diba, bona egu lohia bona king ese unai do ia itaia, to dahaka dainai egu lohia bona king ia ura unai bamona ia karaia?”

4 To king ena hereva ese Ioaba bona tuari biagudia edia hereva ia koua. Vadaeni Ioaba bona tuari biagudia be king ena vairana amo idia lao, Israela taudia idia rejistaia totona.+ 5 Idia ese Ioridane idia hanaia bona Aroere dekenai idia kamepa,+ oibe, koura huanai ia noho siti ena idiba kahanai idia kamepa, bona idia lao Gado taudia edia tano ai, bena Iasera dekenai idia lao.+ 6 Unai murinai idia lao Gileada+ bona Tatimi-hodosi tanona dekenai, bena Dano-iana dekenai idia lao bona unuseni amo Sidono dekenai idia lao.+ 7 Bena Turo ena magu goadana dekenai idia lao,+ bona Hivi bona Kanana taudia edia siti ibounai dekenai idia lao,+ bona dokonai Bere-sieba+ ai idia ginidae, unai be Negebe ai,+ Iuda tanona dekenai. 8 Idia be tano ibounai idia raka hanaia bona hua 9 bona dina 20 ena dokona ai, Ierusalema dekenai idia ginidae. 9 Ioaba ese idia rejista taudia edia namba be king dekenai ia henia. Israela tuari taudia goadadia ibounai be 800,000, idia ibounai be mai edia tuari kaia, bona Iuda tuari taudia be 500,000.+

10 To Davida ese tatau ia duahia murinai, ena lalomamina* ese ia kota henia.+ Bena Davida be Iehova dekenai ia gwau: “Inai kara lau karaia dainai, egu kara dika be bada herea.+ Bona Iehova e, mani emu hesiai tauna ena dika oi gwauatao,+ badina lau be kavakava karana momokani lau karaia.”+ 11 Daba ai Davida ia toreisi neganai, Iehova ese peroveta tauna Gado,+ Davida ena matahanai itaia tauna unai, dekenai ia gwau: 12 “Oi lao bona Davida oi hamaoroa, ‘Iehova be inai bamona ia gwau: “Oi vairanai gau toi do lau atoa. Namona be ta oi abia hidi, bona unai be oi dekenai do lau mailaia.”’”+ 13 Vadaeni Gado be Davida dekenai ia mai bona ia gwau: “Lagani 7 lalonai emu tano ai hitolo bada do ia vara, a?+ Eiava emu inai taudia ese oi idia lulua noho lalonai, idia amo hua toi do oi heau, a?+ Eiava emu tano taudia dekenai dina toi lalonai gorere dikana do ia vara, a?+ Namona be oi laloa namonamo, vadaeni lau ia siaia Tauna do lau haere henia diba.” 14 Vadaeni Davida be Gado dekenai ia gwau: “Lau lalometau bada. Mani Iehova ese ita dekenai dika ia mailaia,+ badina iena hebogahisi karana be bada herea,+ to namo lasi taunimanima ese ita dekenai dika idia mailaia.”+

15 Bena Iehova ese Israela taudia edia latanai gorere dikana ia siaia+ daba amo ela bona ia makaia dinana ia ore, vadaeni Dano amo ela bona Bere-sieba+ dekenai taunimanima 70,000 idia mase.+ 16 Ierusalema hadikaia totona aneru ese ena imana amo Ierusalema ia poinia neganai, Iehova ia lalohisihisi matamaia,+ badina unai gorere dikana ia mailaia, bona taunimanima dekenai unai dika ia mailaia aneruna dekenai ia gwau: “Vadaeni! Emu imana oi atoa diho.” Iehova ena aneru be Arauna ena witi moia gabuna kahirakahira ia gini.+ Arauna be Iebusu tauna.+

17 Davida ia itaia aneru ese taunimanima ia hamasea neganai, ia be Iehova dekenai ia gwau: “Lau be kara dika lau karaia, bona kerere lau karaia danu. To inai mamoe+ be dahaka idia karaia? Namona be lau bona egu tamana ena bese taudia dekenai dika oi mailaia.”+

18 Vadaeni unai dina ai Gado be Davida dekenai ia mai, bona ia dekenai ia gwau: “Oi daekau lao, bona Iebusu tauna Arauna ena witi moia gabuna dekenai Iehova totona boubou patana ta oi haginia.”+ 19 Vadaeni Davida be Gado ena hereva ia badinaia bona ia daekau lao, Iehova ena oda hegeregerena. 20 Arauna ia itaia king bona ena hesiai taudia be ia dekenai idia mai noho neganai, Arauna be maoromaoro ia raka-lasi bona king dekenai ia tui diho bona ena vairana be tano dekenai ia atoa diho. 21 Arauna ia henanadai: “Dahaka dainai egu lohia bona king be ena hesiai tauna dekenai ia mai?” Davida ia haere: “Oi amo witi moia gabuna lau hoia totona, unai amo Iehova dekenai boubou patana lau haginia diba, bena taunimanima ese idia abia gorerena do ia doko.”+ 22 To Arauna be Davida dekenai ia gwau: “Namona be egu lohia bona king ese witi moia gauna* ia abia bona ena matana ai dahaka be namo ia bouboulaia diba. Bona gabua boubou totona boromakau be inai, bona witi momoru kokia auna bona boromakau edia huaia auna be lahi au totona oi abidia. 23 King e, inai gaudia ibounai be oi dekenai lau henia.” Bena Arauna be king dekenai ia gwau: “Mani Iehova emu Dirava ese oi ia lalonamo henia.”

24 To, king be Arauna dekenai ia gwau: “Lasi, namona be ena davana korikori do lau henia. Lau abia kava gaudia be Iehova egu Dirava dekenai gabua bouboudia bamona do lau henia lasi.” Vadaeni Davida ese witi moia gabuna bona boromakau be 50 siliva sikel* amo ia hoidia.+ 25 Bona unuseniai Davida ese Iehova dekenai boubou patana ia haginia+ bona gabua bouboudia bona maino karaia bouboudia ia henia. Bena tano totona ia gwauraia noinoi be Iehova ese ia haere henia,+ bona Israela taudia ese idia abia gorerena ia doko.