Sivarai Iharuana

34 Iosaia+ ena mauri lagani be 8 neganai, ia be king ai ia lao, bona lagani 31 lalonai Ierusalema ai ia lohia.+ 2 Iehova ena vairanai kara maorona ia karaia bona ena sene tauna Davida ena kara ibounai ia badinaia, bona unai dala ia rakatania lasi.

3 Iosaia ena lohia lagani namba 8 ai, ia do mero neganai, ena sene tauna Davida ena Dirava ia tahua matamaia.+ Bona ena lohia lagani namba 12 ai, ia ese ataiai gabudia*+ bona au helagadia,* bona kaivakuku idauidau+ be Iuda bona Ierusalema amo ia kokidia.+ 4 Ma danu, idia ese Bala ena boubou patadia be iena vairanai idia utudia, bona unai pata latadiai idia gini bonana namo muramura gabua patadia idia utua diho danu. Bona ia ese au helagadia* ia utua maragimaragi, bona imana amo idia karaia kaivakukudia bona auri kaivakukudia ia hamakohidia ela bona pauda bamona bona unai gaudia idia tomadiho henia taudia idia guria gabuna latanai sisina sisina ia negea lao mai.+ 5 Bona Bala diravadia edia hahelaga taudia edia turia be edia boubou patadia latanai ia gabua.+ Oibe, ia ese Iuda bona Ierusalema ia hagoevaia.

6 Bona Manase, Eparaima,+ Simeona, ela bona Napatali edia siti ta ta, bona unai siti idia hagegea gabudia, idia hadikaia gabudia unai, dekenai 7 Iosaia ese boubou patadia ia hadikaia bona au helagadia* bona imana amo idia karaia kaivakukudia ia hamakohia+ ela bona pauda bamona. Bona ia ese Israela ena tano ibounai lalonai idia noho bonana namo muramura gabua patadia ibounai ia utua diho,+ bena Ierusalema dekenai ia giroa lou.

8 Iosaia ena lohia lagani namba 18, tano bona dubu helaga ia hagoevaia negana ai, Asalaia ena natuna Sapana,+ siti gunalaia tauna Maseaia, bona Ioahasa ena natuna mero Ioa, rekodi torea tauna unai, ia siaidia iena Dirava Iehova ena ruma idia hanamoa totona.+ 9 Idia be hahelaga tauna badana Hilekaia dekenai idia lao bona Dirava ena ruma dekenai idia abia mai moni be ia dekenai idia henia, unai moni be iduara idia naria Levi taudia ese Manase taudia, Eparaima taudia, Israela taudia oredia,+ Iuda taudia, Beniamina taudia, bona Ierusalema ai idia noho taudia ibounai amo idia gogoa. 10 Bena idia ese unai moni be Iehova ena ruma dekenai idia karaia gaukara idia naria taudia dekenai idia henia. Bona Iehova ena ruma ai idia gaukara taudia ese unai moni do idia gaukaralaia dubu idia hanamoa totona. 11 Idia ese unai moni be gaukara idauidau idia karaia taudia bona ruma haginia taudia dekenai idia henia, unai amo nadi bona au do idia hoia du dogoatao gaudia bona Iuda ena king taudia ese idia hanamoa lasi rumadia do idia hanamoa totona.+

12 Bona unai tatau ese gaukara idia karaia namonamo.+ Unai tatau idia gunalaia taudia be idia abia hidi Levi taudia, idia be Iahata bona Obadaia, Merari besena amo,+ bona Sekaraia bona Mesulama, idia be Kohata besena amo.+ Bona idia ibounai be miusiki gadaralaia namonamo taudia,+ 13 bona idia be nadi utua taudia idia naria bona hesiai gaukara idauidau idia karaia taudia ibounai idia naria. Bona Levi taudia haida be seketere gaukara, ofesa gaukara, bona geiti idauidau naria gaukara idia karaia.+

14 Idia ese Iehova ena ruma dekenai idia abia mai moni idia kokia noho lalonai,+ hahelaga tauna Hilekaia ese Iehova ena Taravatu bukana ia davaria,+ unai buka be Dirava ese Mose dekenai ia henia.+ 15 Vadaeni Hilekaia be seketere tauna Sapana ia hamaoroa: “Lau ese Iehova ena ruma ai Taravatu bukana lau davaria.” Vadaeni Hilekaia ese unai buka be Sapana dekenai ia henia. 16 Bena Sapana be king dekenai buka ia abia lao bona ia hamaoroa: “Emu hesiai taudia ese oi henia gaukara ibounai idia karaia noho. 17 Idia ese Iehova ena ruma ai ia noho moni ibounai idia gogoa, bona idia abia hidi tatau bona gaukara idia karaia taudia dekenai unai moni idia henia vadaeni.” 18 Seketere tauna Sapana ese king ma ia hamaoroa: “Hahelaga tauna Hilekaia ese lau dekenai buka ta ia henia.”+ Bena Sapana ese king ena vairanai ia duahia matamaia.+

19 King be Taravatu bukana lalonai idia noho hereva ia kamonai neganai, ena dabua ia darea.+ 20 Vadaeni king ese Hilekaia, Sapana ena natuna Ahikama,+ Mikaia ena natuna Abidona, seketere tauna Sapana, bona king ena hesiai tauna Asaia dekenai oda ia henia: 21 “Inai buka lalonai idia noho hereva ibounai dainai, umui lao, bona lau, bona Israela bona Iuda taudia ibounai totona Iehova ena lalohadai umui tahua. Badina Iehova ena badu ita dekenai be ia bada momokani, badina Iehova ena hereva, inai buka lalonai idia torea hereva ibounai be iseda sene taudia ese idia badinaia lasi.”+

22 Vadaeni Hilekaia, bona king ese ia siaia taudia be peroveta hahinena Hulida dekenai idia lao.+ Hulida be Salumu ena adavana, Salumu ena tamana be Tikava, Harahasa ena natuna unai. Salumu be king ena dabua atoa gabuna ia naria. Hulida be Ierusalema ena gabu matamata dekenai ia noho, unuseniai ia idia hereva henia.+ 23 Hulida be idia dekenai ia gwau: “Israela ena Dirava, Iehova, be inai bamona ia hereva, ‘Lau dekenai umui ia siaia tauna umui hamaoroa: 24 “Iehova be inai bamona ia hereva, ‘Lau ese inai gabu bona iniseni idia noho taudia dekenai dika do lau mailaia,+ Iuda ena king ena vairanai buka ai idia duahia herevadia ibounai be do ia guguru.+ 25 Badina idia ese lau idia rakatania+ bona dirava ma haida dekenai boubou gaudia edia kwalahu idia karaia noho, unai amo edia imana amo idia karaia gaudia ibounai amo lau idia habadua noho,+ inai gabu dekenai egu badu do ia bada noho bona ta ese do ia koua lasi.’”+ 26 To Iuda ena king, Iehova ena lalohadai umui tahua totona umui ia siaia tauna unai, dekenai inai bamona umui hereva, “Oi kamonai herevadia dainai Israela ena Dirava, Iehova, be inai bamona ia gwau:+ 27 ‘Emu lalona oi giroa bona Dirava ena vairanai oi manau, badina oi kamonai lau ese inai gabu bona ena taunimanima totona lau gwau, idia be dika do idia davaria bona idia dainai taunimanima do idia gari dikadika, bona emu dabua oi darea bona egu vairanai oi taitai, lau ese unai lau kamonai danu,+ Iehova be unai bamona ia hereva. 28 Unai dainai oi be emu sene taudia ida do idia haboua,* bona oi be mai maino ida do idia guria, bona inai gabu bona idia noholaia taudia dekenai do lau mailaia dika be do oi itaia lasi.’”’”+

Bena unai hereva be king dekenai idia mailaia. 29 Vadaeni king be hereva ia siaia, bona Iuda bona Ierusalema ena tau badadia ibounai idia boiria.+ 30 Unai murinai, king be taunimanima ibounai, badadia bona maragidia, ida Iehova ena ruma dekenai ia daekau lao. Iuda ena tatau ibounai, Ierusalema ai idia noho taudia ibounai, hahelaga taudia, bona Levi taudia idia lao danu. Idia ibounai edia vairanai king ese Iehova ena ruma ai idia davaria taravatu bukana ia duahia.+ 31 King be ena gabu ai ia gini bona Iehova dekenai gwaubou ta ia karaia,+ ia ese Iehova bona ena oda herevadia, ena hadibaia herevadia, bona ena taravatu be mai kudouna ibounai bona mauri* ibounai ida ia badinaia,+ unai amo buka lalonai idia torea hereva ibounai hegeregerena ia karaia. Bona taunimanima ibounai be unai gwaubou dekenai idia lalotamona.+ 32 Ma danu, Iosaia ese Ierusalema ai bona Beniamina ai idia noho taudia ibounai ia hadibaia unai hereva dekenai idia lalotamona totona. Bona Ierusalema ai idia noho taudia be edia sene taudia edia Dirava ena gwaubou hereva idia badinaia.+ 33 Bena Iosaia ese Israela taudia edia tano ibounai amo kaivakuku dika hereadia ibounai ia kokia,+ bona Israela ai idia noho taunimanima ibounai ia hagoadaia edia Dirava Iehova idia hesiai henia totona. Iosaia ena mauri dinadia ibounai lalonai Israela taudia be edia sene taudia edia Dirava Iehova ena dala idia rakatania lasi.