Aposetolo Edia Kara

11 Vadaeni Iudea ai, aposetolo taudia bona tadikaka idia kamonai, idau bese taudia danu ese Dirava ena hereva idia abia dae. 2 Unai dainai Petero be Ierusalema dekenai ia daekau mai neganai, kopina utua karana idia badinaia taudia+ be ia danu idia hepapahuahu matamaia, 3 idia gwau: “Oi be kopina utua lasi taudia edia ruma lalonai oi vareai bona idia ida oi aniani.” 4 Unai neganai Petero ese ia vara gauna be idia dekenai ia gwauraia hedinarai namonamo, ia gwau:

5 “Iopa siti ai lau guriguri noho lalonai, matahanai ta lau itaia, gau ta ena toana be dabua badana ta bamona ia hedinarai, ena kona 4 dekenai idia dogoatao bona guba amo lau dekenai ia diho mai.+ 6 Lau itaia unai dabua lalonai tanobada ai idia noho aena 4 animal idauidau, dagedage animal idauidau, idia rau gaudia idauidau, bona guba manudia idia noho. 7 Danu, gadona ta lau kamonai ia gwau: ‘Petero e, oi toreisi, oi alaia bona oi ania!’ 8 To lau gwau: ‘Lohiabada e, lasi momokani. Badina nega ta miro eiava goeva lasi gauna ta be egu uduna lalonai lau atoa lasi.’ 9 Nega iharuana unai gadona be guba amo ia hereva, ia gwau: ‘Namo lasi Dirava ese ia hagoevaia vadaeni gaudia oi gwauraia miro.’ 10 Unai gadona be nega ihatoina ia hereva, bena gau ibounai be guba dekenai idia daekau. 11 Danu unai nega tamona lalonai, tatau toi be ai noho rumana dekenai idia ginidae. Tau ta ese Kaisarea amo lau dekenai ia siaidia mai.+ 12 Bena lauma helaga ese lau ia hamaoroa, idia ida do lau lao, bona do lau daradara lasi. To inai tadikaka 6 danu be lau ida idia lao, bona unai tauna ena ruma lalonai ai vareai.

13 “Unai tauna ese ai ia hamaoroa, ia be aneru ta ia itaia ena ruma lalonai ia gini bona ia gwau: ‘Tatau haida be Iopa dekenai oi siaia bona Simona, ena ladana ma ta be Petero do idia boiria.+ 14 Bona ia ese umui dekenai hereva haida do ia gwauraia, unai amo oi bona emu ruma taudia ibounai be mauri umui abia diba.’ 15 To lau hereva matamaia neganai, lauma helaga be idia latanai ia diho, nega ginigunana ai ita abia hegeregerena.+ 16 Unai negai, Lohiabada ena hereva lau laloatao, ia gwau: ‘Ioane be ranu amo bapatiso ia karaia,+ to umui be lauma helaga amo bapatiso do umui abia.’+ 17 Unai dainai, bema Dirava ese idia dekenai davana lasi harihari gauna ia henia, ita, Lohiabada Iesu Keriso ita abidadama henia taudia dekenai ia henia bamona, vadaeni lau be daika Dirava lau koua totona?”*+

18 Unai gaudia idia kamonai neganai, hepapahuahu karana idia hadokoa* bona Dirava idia hanamoa, idia gwau: “Dirava ese idau bese taudia dekenai dala ia kehoa idia helalo-kerehai totona, unai amo idia danu mauri idia abia diba.”+

19 Stefano ena mase murinai, dagedage bada ia vara dainai, momo be Poinikia, Kupro, bona Antioka dekenai idia lao,+ to Iuda taudia sibona dekenai idia haroro.+ 20 To idia huanai tatau haida be Kupro bona Kurene taudia, bona idia be Antioka dekenai idia mai bona Grik gado ai idia hereva taudia idia haroro henia. Idia ese Lohiabada Iesu ena sivarai namona idia harorolaia. 21 Ma danu, Iehova* ena imana be idia ida ia noho, bona hutuma be abidadama taudia ai idia lao bona Lohiabada murinai idia raka.+

22 Edia sivarai be Ierusalema ai idia noho kongrigeisen taudia ese idia kamonai bona Banaba+ be Antioka dekenai idia siaia lao. 23 Ia ginidae bona Dirava ena hebogahisi hereadaena ia itaia neganai, ia moale bona idia ibounai ia hagoadaia, mai kudouna ibounai ida Lohiabada do idia abidadama henia noho totona.+ 24 Banaba be tau namona, abidadama tauna bona ia be lauma helaga amo ia honu. Unai dainai hutuma be Lohiabada idia abidadama henia.+ 25 Vadaeni Banaba be Saulo tahua totona Taso dekenai ia lao.+ 26 Saulo ia davaria murinai, Antioka dekenai ia hakaua mai. Bona lagani tamona lalonai kongrigeisen taudia ida idia hebou bona hutuma idia hadibaia. Bona Antioka ai, Dirava ena hakaua henunai, hahediba taudia ese nega ginigunana inai ladana Keristani idia abia.+

27 Unai nega ai, peroveta taudia+ be Ierusalema amo Antioka dekenai idia diho mai. 28 Idia ta ladana Agabo+ ia toreisi bona lauma helaga ena siahu amo ia gwau, tanobada ibounai dekenai hitolo bada do ia vara,+ bona momokani, unai be Klaudio ena nega ai ia vara. 29 Vadaeni hahediba taudia ese edia lalona idia hadaia, idia ta ta dekenai ia noho gauna hegeregerena,+ heduru gaudia be Iudea ai idia noho tadikaka dekenai do idia siaia.+ 30 Vadaeni unai bamona idia karaia, Banaba bona Saulo amo unai gaudia be elda taudia dekenai idia siaia lao.+