Salamo

58 Tatau e, dahaka dainai kara maoromaoro totona umui hereva lasi?+

Kara maoromaoro ai hahemaoro umui karaia diba, a?+

 2 To emui kudouna ai palani dikana umui lalohadailaia,+

Bona tano ai dagedage karadia umui karaia.+

 3 Kara dika taudia be idia vara negana amo dala kererena* idia badinaia.

Idia be kerere taudia, idia vara negana amo koikoi daladia idia badinaia.

 4 Edia hereva be gaigai ena poisini bamona.+

Idia be taia kudima, kobra bamona, iena taiana ia koua.

 5 Ena be meamea tauna be mai ena diba gaigai ia hamanadaia totona,

To gaigai ese ena hereva do ia kamonai lasi.

 6 Dirava e, edia isena oi makohia!

Iehova e, inai laiona natudia edia aukina oi hamakohia!

 7 Idia be ranu bamona idia boio.

Namona be Dirava ese peva ia hegaegaelaia bona ena diba amo idia do ia pidia.

 8 Idia be kururu* bamona idia kaukau bona idia boio,

Idia be bogana ai ia mase beibi bamona, ia vara neganai dina ena diari ia itaia lasi bona ia mase.

 9 Au ginigini amo lahi oi karaia, to emu nanadu uro ia do siahu lasi neganai,

Dirava ese lai gubana amo ia paripari au ginigini bona ia kakoro au ginigini do ia kokia.+

10 Kara maoromaoro tauna do ia moale, badina ia itaia Dirava ese kara dika taudia edia davana ia henia.+

Iena aena be kara dika taudia edia rara lalonai do ia noho.+

11 Bena taunimanima do idia gwau: “Momokani kara maoromaoro tauna totona davana namona ia noho.+

Momokani tanobada ia hahemaoro henia Diravana ta ia noho.”+