Revareva ta Heberu Taudia Dekenai

7 Inai Melekisedeka be Salema ena king bona Ataiai Momokani Diravana ena hahelaga tauna. Aberahamo ese king haida ia halusia bona ia giroa lou neganai, Melekisedeka ese ia hedavari henia bona ia hanamoa,+ 2 bona Aberahamo ese kohu ibounai edia kahana 10 amo kahana ta be ia dekenai ia henia. Guna, ena ladana idia hahanaia “Kara Maoromaoro Ena King,” bona danu ia be Salema ena king, anina be “Maino Ena King.” 3 Ia be tamana lasi, sinana lasi, ena sene taudia edia ladadia ena lista be lasi, bona ena vara dinana bona mase dinana be ta ia diba lasi,* to Dirava ese ia be iena Natuna bamona ai ia halaoa, ia be hahelaga tauna ela bona hanaihanai.+

4 Mani umui laloa, unai tauna be siahu bada tauna. Iduhu kwarana Aberahamo ese tuari amo ia abia kohu namodia ena kahana 10 amo kahana ta be ia dekenai ia henia.+ 5 Momokani, Taravatu* hegeregerena, Levi ena bese amo+ hahelaga dagi idia abia taudia ese taunimanima amo kohu kahana 10 amo kahana ta idia gogoa,+ unai be edia tadikaka amo idia abia, herevana idia be Aberahamo ena bese taudia. 6 To Levi iduhu amo ia vara lasi tauna be Aberahamo amo kohu kahana 10 amo kahana ta ia abia, bena gwauhamata ia abia tauna, Aberahamo, ia hanamoa.+ 7 Taunimanima ibounai be inai hereva dekenai idia lalotamona, hanamoa ia henia tauna ese hanamoa ia abia tauna ia hereaia. 8 Levi taudia ese kohu kahana 10 amo kahana ta idia abia, to idia be do idia mase taudia. To kohu kahana 10 amo kahana ta ia abia tauna ma ta, Toretore Helagadia ia gwau bamona, ia be ia mauri noho.+ 9 Bona ita gwau diba, Levi be kohu kahana 10 amo kahana ta ia abia, to danu Aberahamo amo ia ese kohu kahana 10 amo kahana ta ia henia, 10 badina Melekisedeka ese Aberahamo ia hedavari henia neganai, Levi be ena sene taudia amo ia do vara lasi.+

11 Bema Levi hahelaga oreana amo taunimanima idia goevadae diba+ (unai be Dirava ese taunimanima dekenai ia henia Taravatu ena kahana ta), dahaka dainai Dirava ia gwau hahelaga tauna ma ta do ia toreisi, ia be Melekisedeka bamona+ to Arona bamona lasi? 12 Bema hahelaga gaukara idia haidaua, Taravatu danu idia haidaua be namo.+ 13 Inai sivarai ese ia herevalaia tauna be iduhu idauna amo, unai iduhu amo tau ta ese boubou patana dekenai hahelaga gaukara ia karaia lasi.+ 14 Ia hedinarai goevagoeva iseda Lohiabada be Iuda ena bese amo ia vara,+ to Mose be nega ta ia hereva lasi unai iduhu amo hahelaga taudia do idia mai.

15 Bona hahelaga tauna ma ta, Melekisedeka bamona+ ia toreisi neganai, unai ia hedinarai goevagoeva.+ 16 Ia be hahelaga tauna ai ia lao, Taravatu ese ia gwauraia iduhu dainai lasi, to ia dika diba lasi maurina ena siahu dainai, ia be hahelaga tauna ai ia lao.+ 17 Toretore Helagadia ena kahana ta ese ia be inai bamona ia herevalaia: “Oi be hahelaga tauna ela bona hanaihanai, Melekisedeka bamona.”+

18 Vadaeni Dirava ese taravatu gunana ia kokia, badina ia goada lasi bona anina namona ia havaraia lasi.+ 19 Taravatu ese gau ta ia hanamoa momokani lasi,+ to Dirava ese ia henia helaro namona ese gau ibounai ia hanamoa momokani,+ bona unai amo Dirava kahirakahira ita lao.+ 20 Danu, Dirava be mai gwauhamata ida Iesu dekenai hahelaga tauna ena dagi ia henia, 21 (momokani, tatau haida be hahelaga taudia ai idia lao bona Dirava ese idia dainai gwauhamata ia karaia lasi, to inai tau be hahelaga tauna ai ia lao, bona Dirava ese ia dainai gwauhamata ia karaia, ia gwau: “Iehova* be gwauhamata ta ia karaia, bona ena lalona do ia haidaua lasi,* ia gwau, ‘Oi be hahelaga tauna ela bona hanaihanai’”),+ 22 unai dainai Iesu be gwauhamata namo hereana ia hamomokania tauna ai ia lao.+ 23 Danu, momo be hahelaga taudia, to idia mase dainai edia gaukara ia doko, bona ma haida ese edia gabu idia abia.+ 24 To Iesu be ia noho hanaihanai dainai,+ ta ese iena gabu do ia abia lasi hahelaga gaukara karaia totona. 25 Unai dainai ia amo Dirava kahirakahira idia lao taudia do ia hamauria momokani, badina ia noho hanaihanai bona idia totona Dirava do ia noinoi henia.+

26 Unai bamona hahelaga tauna badana ita abia be maoro. Ia be Dirava ia abidadama henia, ia kerere lasi, ena kara be goeva,+ ia be kara dika taudia amo ia idau, bona ia be guba ataiai idia abia isi.+ 27 Ia be unai hahelaga taudia bamona lasi, dina ta ta ai, guna ia sibona ena kara dika totona bona gabeai taunimanima totona boubou gauna ia henia+ be anina lasi,+ badina ia ese ia sibona be boubou gauna bamona ia henia neganai, unai boubou gauna be nega tamona sibona ia henia.+ 28 Mai edia manoka taudia be Taravatu ese ia abia hidi hahelaga taudia badadia ai idia lao totona,+ to Taravatu murinai ia mai gauna, gwauhamata ena hereva unai,+ ese Natuna ta ia abia hidi, ia be goevadae tauna ai ia lao+ ela bona hanaihanai.