Revareva ta Roma Taudia Dekenai

15 Namona be ita abidadama goada taudia ese abidadama manoka taudia do ita durua,+ idia ia tohoa gaudia idia haheaukalaia totona. Bona ita sibona hamoalea karadia ita karaia lasi.+ 2 Namona be ita ta ta ese iseda dekena tauna ita hamoalea bona kara namodia do ita karaia ia ita hagoadaia totona.+ 3 Badina Keriso danu ese sibona ia hamoalea lasi,+ Toretore Helagadia ai idia torea bamona, ia gwau: “Oi idia gwauraia dika taudia ese lau idia gwauraia dika danu.”+ 4 Badina guna Toretore Helagadia dekenai idia torea herevadia ibounai be ita hadibaia totona idia torea.+ Bona unai hereva ese ita idia durua ita haheauka totona,+ bona Toretore Helagadia ese ita dekenai goada ia henia, unai amo helaro ita abia.+ 5 Namona be haheauka bona goada ia henia Diravana ese umui ibounai dekenai, Keriso Iesu ena laloa dalana ia henia. 6 Unai amo umui ibounai be mai gadona tamona ida,+ iseda Lohiabada Iesu Keriso ena Dirava bona Tamana do umui hanamoa.

7 Unai dainai umui ese ta ta do umui abia dae,+ Keriso ese ita ia abia dae hegeregerena,+ vadaeni taunimanima ese Dirava do idia hanamoa. 8 Lau gwau, Keriso be kopina utua taudia edia hesiai tauna ai ia lao,+ unai amo ia hahedinaraia Dirava ena hereva be momokani, bona Dirava ese edia sene taudia dekenai ia gwauraia gwauhamatadia be ia ese ia hamomokania.+ 9 Bona bese idauidau taudia be Dirava ena hebogahisi dainai ia idia hanamoa diba.+ Toretore Helagadia ai idia torea bamona, ia gwau: “Unai dainai bese idauidau taudia huanai lau ese oi do lau gwauraia hedinarai bona ane amo emu ladana do lau hanamoa.”+ 10 Bona ma ia gwau: “Bese idauidau taudia e, Dirava ena taunimanima ida umui moale.”+ 11 Bona ma ia gwau: “Bese idauidau ibounai e, Iehova* umui hanamoa, bona namona be taunimanima ibounai ese ia idia hanamoa.”+ 12 Bona Isaia ia gwau danu: “Iese ena bese amo ramuna ta do ia hedinarai,+ bona ia ese bese idauidau taudia do ia lohiaia,+ bona do ia karaia gau namodia totona, mai edia ura ida do idia naria.”+ 13 Namona be helaro ia henia Diravana ese emui abidadama dainai, umui be moale bona maino bada amo ia hahonua, vadaeni lauma helaga ena siahu amo emui helaro be do ia bada ia lao.+

14 Lauegu tadikaka e, lau diba momokani umui danu be kara namodia amo umui honu, bona umui be diba ibounai amo umui honu bona danu umui ta ta umui sisiba henia* diba. 15 To inai revareva amo umui dekenai gau haida lau gwauraia hedinarai, umui lau hadibaia lou totona. Dirava ese lau dekenai hebogahisi hereadaena ia hahedinaraia dainai, unai lau karaia, 16 oibe, unai be lau dekenai ia henia dainai, bese idauidau taudia dekenai lau be Keriso Iesu ena hesiai tauna ai lau lao.+ Dirava ena sivarai namona harorolaia gaukara helagana lau karaia noho,+ unai amo bese idauidau taudia lau durua diba, Dirava ese ia abia dae boubou gauna ai idia lao totona, unai be lauma helaga ese ia hahelagaia gauna.

17 Lau be Keriso Iesu ena hahediba tauna bona Dirava lau hesiai henia lalonai lau moale be mai ena badina. 18 Lau be gau idauna ta do lau herevalaia lasi, to inai sivarai sibona do lau herevalaia, Keriso be lau amo ia gaukara, bese idauidau taudia idia kamonai totona. Ia ese egu hereva bona egu kara, 19 bona toa bona hoa kara badadia,+ bona lauma helaga ena siahu amo unai ia hagugurua. Lau be Ierusalema amo ela bona Iluriko dekenai lau loaloa, Keriso ena sivarai namona lau harorolaia guguru totona.+ 20 Unai dala amo egu ura gauna lau karaia, unai be Keriso ena ladana idia kamonai vadaeni gabudia dekenai sivarai namona do lau harorolaia lasi, unai amo tau ta ese ia haginia vadaeni badina latanai badina ma ta lau haginia lasi. 21 To Toretore Helagadia ai idia torea bamona: “Iena sivarai ta idia abia lasi taudia ese ia do idia itaia, bona iena sivarai idia do kamonai lasi taudia be do idia laloparara.”+

22 Unai dainai nega momo unai gaukara ese lau ia koua umui dekenai lau mai totona. 23 To unai kahadia ai gabu ibounai dekenai lau haroro vadaeni, bona lagani momo* lalonai lau ura bada umui dekenai lau mai. 24 Unai dainai Sipania dekenai do lau lao neganai, umui do lau itaia, bona umui ida nega sisina egu noho lau moalelaia murinai, lau umui abia lao bona dala ai umui rakatania diba. 25 To hari lau ura Ierusalema dekenai lau lao, helaga taudia lau hesiai henia totona.+ 26 Makedonia bona Akaia ai idia noho tadikaka be mai moale ida edia kontribusen idia henia, Ierusalema ai helaga taudia huanai idia noho ogogami taudia totona.+ 27 Momokani, mai moale ida unai idia karaia, to Ierusalema ai idia noho helaga taudia dekenai idia be mai edia abitorehai. Badina bema bese idauidau taudia be idia amo Dirava ena gaudia idia abia, idia danu be mai edia maduna edia kohu amo Ierusalema ai idia noho helaga taudia idia durua totona.+ 28 Unai gaukara lau haorea bona idia dekenai unai kontribusen lau henia murinai, umui dekenai do lau mai, bena gabeai Sipania dekenai do lau lao. 29 Danu, lau diba lau be umui dekenai lau mai neganai, Keriso ena hanamoa bada do lau mailaia.

30 Vadaeni egu tadikaka e, iseda Lohiabada Iesu Keriso amo bona lauma helaga ese ia havaraia lalokau amo umui lau hagoadaia, lau ida Dirava do ita guriguri henia goadagoada, lau ia durua totona.+ 31 Unai amo Dirava ese Iudea ai idia noho abidadama lasi taudia amo lau do ia hamauria+ bona Ierusalema ai egu hesiai gaukara, helaga taudia totona be idia ese do idia abia dae.+ 32 Vadaeni Dirava ena ura hegeregerena, mai moale ida umui dekenai lau mai bona umui ida goada matamata do ita abia. 33 Maino ia henia Diravana be umui ibounai ida ia noho be namo.+ Amen.