Revareva ta Filipi Taudia Dekenai

1 Ai Keriso ena hesiai taudia, Paulo bona Timoteo ese umui, Keriso Iesu ida umui hakapua helaga taudia, elda bona hesiai taudia+ Filipi+ dekenai, inai revareva ai torea:

2 Mani Dirava iseda Tamana bona Lohiabada Iesu Keriso amo, hebogahisi hereadaena bona maino umui abia.

3 Egu guriguri ibounai lalonai umui lau laloatao neganai, hanaihanai Dirava lau tanikiu henia. 4 Unai guriguri ta ta be mai moale ida lau gwauraia,+ 5 badina umui ese dina ginigunana amo ema bona hari, sivarai namona harorolaia gaukarana umui durua.* 6 Inai lau diba momokani, Dirava ese umui huanai ia hamatamaia gaukara namona do ia hagugurua+ Keriso Iesu ena dina ai.+ 7 Umui ibounai be unai bamona lau laloa be maoro, badina egu kudouna ai umui lau laloa noho bona lau ida Dirava ena hebogahisi hereadaena ita abia hebou. Badina dibura ruma ai lau noho+ bona kota vairanai sivarai namona lau hamomokania bona ena maoro lau gwauraia hedinarai neganai, umui be lau ida umui noho.+

8 Dirava ia diba lau be umui ibounai lau reaia momokani, Keriso Iesu ese umui ia lalokau henia bamona umui lau lalokau henia. 9 Bona lau gurigurilaia noho gauna be inai, emui lalokau do ia bada ia lao noho,+ mai diba maoromaoro+ bona laloparara bada ida,+ 10 unai amo mai anina bada gaudia do umui diba,+ vadaeni kerere lasi ida do umui noho bona ma haida do umui hahekwakwanaia lasi+ ela bona Keriso ena dina. 11 Bona kara maoromaoro ena huahua amo do umui honu, unai be Iesu Keriso amo do ia vara,+ bona unai ese Dirava dekenai hairai bona hanamoa ia henia.

12 Tadikaka e, lau ura umui diba, lau dekenai idia vara hekwakwanai ese sivarai namona harorolaia gaukarana idia durua. 13 Unai amo taunimanima ibounai bona king ena gadi taudia do idia diba,+ lau be Keriso lau hesiai henia dainai dibura ruma ai lau noho.+ 14 Bona seini amo lau idia guia dainai, Lohiabada idia hesiai henia tadikaka momo be lalogoada idia abia, bona boga-auka idia hahedinaraia noho bona mai gari lasi ida Dirava ena hereva idia harorolaia.

15 Momokani, haida be idia mama bona mai kara helulu ida Keriso ena sivarai idia harorolaia, to ma haida be mai lalohadai maorona ida idia karaia. 16 Idia be lalokau dainai Keriso idia gwauraia hedinarai bona idia diba iniseniai lau noho ena badina be sivarai namona ena maoro lau hamomokania totona.+ 17 To unai mama bona kara helulu taudia edia haroro gaukara be mai lalohadai maorona ida idia karaia lasi, to lau be dibura ruma ai lau noho lalonai, idia ura egu hisihisi idia habadaia. 18 Unai ese dahaka ia havaraia? Herevana mai lalohadai dikana ida eiava mai momokani ida idia haroro, to Keriso idia harorolaia noho bona unai lau moalelaia bada. Oibe, do lau moale noho, 19 badina lau diba emui noinoi goadagoada karana+ bona Iesu Keriso ese ita dekenai ia henia lauma helaga ena heduru+ amo hahemauri do lau abia. 20 Unai be lauegu ura momokani bona lau ura lasi do lau hemarai. To mai gari lasi ida lau haroro noho, unai amo Keriso be hari hanamoa do ia abia, guna ia abia bamona. Ia be lau* dainai hanamoa do ia abia, herevana lau mauri eiava lau mase.+

21 Bema lau mauri, Keriso totona egu mauri do lau gaukaralaia,+ bona bema lau mase, lau dekenai unai danu be mai ena namo.+ 22 Bema tanobada* dekenai lau mauri noho, egu gaukara amo huahua momo lau havaraia diba. To edena lau abia hidi be lau gwauraia hedinarai lasi. 23 Unai gaudia rua amo lau diba lasi edena do lau abia hidi, to lau ura lau lao bona Keriso ida lau noho,+ oibe, unai be do ia namo herea.+ 24 To, umui dainai tanobada dekenai lau mauri noho be namo. 25 Unai dainai lau diba lau be do lau mauri noho, oibe, umui ibounai ida do lau noho, unai amo Dirava ena hesiai gaukara dekenai do umui goada umui lao bona emui abidadama dainai do umui moale. 26 Vadaeni lau be umui ida ma do lau noho neganai, emui moale Keriso Iesu dekenai be do ia bada momokani.

27 Namona be Keriso ena sivarai namona hegeregerena dala maorona dekenai umui raka.+ Unai amo herevana umui itaia totona lau mai eiava lasi, lau ese emui sivarai do lau kamonai, umui be umui lalotamona,+ bona sivarai namona abidadama henia karana ai ta ta ida umui gaukara hebou noho, 28 bona emui inai taudia dainai umui gari lasi. Unai gaudia ibounai ese idia hamomokania idia be do idia ore,+ to umui be hahemauri do umui abia+ bona unai be Dirava amo. 29 Keriso dainai unai hahenamo umui abia, ia umui abidadama henia sibona lasi, to danu ia dainai hisihisi umui abia.+ 30 Lau dekenai umui itaia hegeregerena, umui danu be unai bamona hekwakwanai umui davaria noho,+ bona hari umui kamonai bamona unai lau do davaria noho.