Revareva ta Heberu Taudia Dekenai

9 Gwaubou gunana lalonai, hesiai gaukara helagana ena taravatu idia noho bona inai tanobada ai ia be mai ena helaga gabuna ta.+ 2 Palai ruma ta idia karaia, bona ena daiutu ginigunana ai, lamepa atoa gauna,+ teibolo ta, bona paraoa helagana* danu idia noho,+ bona unai idia gwauraia Helaga Gabuna.+ 3 To keten iharuana murinai+ be daiutu ta ia noho, idia gwauraia Helaga Herea.+ 4 Unai daiutu lalonai bonana namona gabua gauna+ bona golo amo idia koua+ hegege Taravatu Maua+ idia noho. Bona unai maua lalonai golo hodu mai ena mana+ bona Arona ena itotohi, ia latanai raurau idia tubu gauna,+ bona taravatu nadi palaka rua idia noho.+ 5 Bona Taravatu Maua latanai, kerubi mai edia hairai idia noho, bona edia laulau ese maua ena koua gauna ia koua.+ To hari be unai gaudia ibounai herevalaia negana lasi.

6 Unai gaudia be unai dala ai idia karaia murinai, hahelaga taudia be nega ibounai daiutu ginigunana lalonai idia vareai, hesiai gaukara helagana idia karaia totona.+ 7 To hahelaga tauna badana sibona be lagani ta ta ibounai lalonai nega tamona, daiutu iharuana lalonai ia vareai.+ Bona rara danu ia abia vareai bona ia bouboulaia,+ ia sibona totona,+ bona idia diba lasi dainai kara dika idia karaia taudia totona.+ 8 Lauma helaga ese ia hahedinaraia goevagoeva, palai ruma ginigunana* ia do noho lalonai, helaga gabuna* dekenai vareai dalana be ia do hedinarai lasi.+ 9 Unai palai ruma be hari idia vara gaudia ia laulaulaia,+ bona ema bona hari boubou gaudia bona harihari gaudia be Dirava dekenai idia henia noho.+ To unai gaudia ese hesiai gaukara helagana ia karaia tauna ena lalomamina ia hagoevaia momokani lasi.+ 10 Unai boubou gaudia bona harihari gaudia be aniani bona inuinu gaudia bona hahegoeva karana* totona.+ Idia be tauanina gaudia, taravatu ese ia gwauraia gaudia unai,+ bona unai idia badinaia ela bona Dirava ese gau ibounai do ia hamaoromaoroa negana.

11 To Keriso ia mai neganai, ia be idia guguru vadaeni gau namodia edia hahelaga tauna badana. Bona palai ruma badana bona hereadaena dekenai ia vareai, unai palai ruma be taunimanima ese idia karaia lasi, bona ia be inai tanobada gauna lasi. 12 Keriso be helaga gabuna ai ia vareai neganai, nanigosi bona boromakau natuna edia rara ia abia vareai lasi, to ia sibona ena rara+ be nega tamona sibona unuseniai ia abia vareai, bona ia ese ita ia hamauria ela bona hanaihanai.+ 13 Hahelaga taudia ese nanigosi bona boromakau edia rara+ idia gaukaralaia bona boromakau natuna ena kahu be miro taudia latanai idia negea lao mai, unai amo Dirava vairanai idia goeva.+ 14 To Keriso ena rara ese unai ia hereaia.+ Keriso be ia goeva momokani, bona noho hanaihanai lauma helaga amo, ia ese Dirava dekenai sibona ia henia. Iena rara ese iseda lalomamina ia hagoevaia bona ita be mase karadia ita karaia lou lasi.+ Unai dainai ita be mauri Diravana ena hesiai gaukara helagana ita karaia diba.+

15 Ia be gwaubou matamatana ena medieita,*+ ia be ia mase dainai, ena mauri davalaia boubou amo, gwaubou gunana henunai idia noho taudia be edia kara dika amo ia ruhadia.+ Unai amo dala ia kehoa Dirava ese ia boiria taudia be ia gwauhamatalaia noho hanaihanai ahuna do idia abia.+ 16 Bema tau ta be Dirava ida gwaubou ia karaia, unai tauna ia mase be namo, 17 badina mase amo gwaubou be mai ena siahu, bema gwaubou ia karaia tauna be ia do mauri noho, ia karaia gwaubou be siahu lasi. 18 Unai hegeregerena, rara bubua karana amo gwaubou ia gaukara matamaia. 19 Mose ese Taravatu ena oda ibounai be taunimanima ibounai dekenai ia gwauraia murinai, ia ese boromakau natuna bona nanigosi edia rara ia abia bona ranu ida ia mikisia. Bena husopo dekenai idia kwatua wulu kakakaka ia gaukaralaia, rara be buka* bona taunimanima ibounai dekenai ia negea lao mai totona, 20 ia gwau: “Inai rara ese Dirava ida umui karaia gwaubou* ia hamomokania, ia ura unai gwaubou umui badinaia noho.”+ 21 Ia ese palai ruma bona tomadiho totona idia gaukaralaia gaudia ibounai dekenai danu rara ia negea lao mai.+ 22 Oibe, Taravatu* hegeregerena, kahirakahira gau ibounai be rara amo idia hagoevaia,+ bona bema rara idia bubua lasi, kara dika gwauatao karana be lasi.+

23 Unai dainai, guba gaudia idia laulaulaia gaudia+ be animal bouboulaia karana amo idia hagoevaia be gau badana,+ to animal boubou ia hereaia boubou gauna ese guba gaudia idia hagoevaia. 24 Badina Keriso be taunimanima ese idia karaia helaga gabuna ta lalonai ia vareai lasi,+ unai be gau korikorina ena laulau sibona,+ to ia be guba lalonai ia vareai,+ unai amo ita totona Dirava vairanai ia hedinarai.+ 25 Lagani ta ta lalonai hahelaga tauna badana be helaga gabuna lalonai rara ia abia vareai, to unai be sibona ena rara lasi.+ To Keriso be unai bamona ia karaia lasi, ia be boubou gauna bamona sibona ia henia, bona nega momo unai ia karaia lasi. 26 Bema unai bamona ia karaia, taunimanima idia vara negana amo ema bona hari, ia be nega momo hisihisi do ia abia. To hari nega oromana* ena dokona ai, ia be nega tamona sibona ia hedinarai, unai amo sibona ia bouboulaia karana amo kara dika ia kokia.+ 27 Taunimanima ibounai be nega tamona sibona do idia mase, to unai murinai hahemaoro do idia abia. 28 Unai hegeregerena, Keriso danu be nega tamona ia sibona ia henia, taunimanima momo edia kara dika huaia totona.+ Bona nega iharuana ia mai neganai, unai be kara dika kokia totona lasi, to idia do ia hamauria totona idia naria taudia ese ia do idia itaia.+