Aposetolo Edia Kara

9 Saulo, Lohiabada ena hahediba taudia ia hagaria noho bona ia ura dikadika idia ia alaia tauna,+ be hahelaga tauna badana dekenai ia lao, 2 bona ia noia Damaseko ena sinagoga totona revareva do ia torea, unai amo Lohiabada ena dala idia badinaia tatau bona hahine do ia dogoatao,* bona Ierusalema dekenai do ia abia mai.+

3 Damaseko kahirakahira ia lao noho lalonai, karaharaga guba amo diari ta be ia latanai ia diho,+ 4 bona tano ai ia moru bena ia kamonai, gado ta be ia dekenai ia gwau: “Saulo e, Saulo e, dahaka dainai lau oi dagedage henia noho?” 5 Ia henanadai: “Tau badana e, oi be daika?” Ia gwau: “Lau be Iesu,+ oi dagedage henia noho tauna.+ 6 Oi toreisi bona siti lalonai oi vareai, bona ta ese oi dekenai do oi karaia gauna do ia hadibaia.” 7 Vadaeni ia ida idia lao taudia be idia hoa bona idia hereva diba lasi, oibe, gado ta regena idia kamonai, to tau ta idia itaia lasi.+ 8 Bena Saulo be tano amo ia toreisi, ena be ena matana idia kehoa, to gau ta ia itaia lasi. Unai dainai ena imana idia dogoatao bona Damaseko dekenai idia hakaua lao. 9 Bona dina toi lalonai gau ta ia itaia lasi+ bona gau ta ia ania bona inua lasi.

10 Damaseko ai, hahediba tauna ta ladana Anania ia noho,+ bona Lohiabada be matahanai lalonai ia dekenai ia gwau: “Anania e!” Ia gwau: “Lohiabada e, lau inai.” 11 Lohiabada be ia dekenai ia gwau: “Oi toreisi, bona dala ladana Maoromaoro dekenai oi lao bona Iuda ena ruma dekenai tau ta ladana Saulo oi tahua, ia be Taso tauna.+ Ia be ia guriguri noho, 12 bona matahanai lalonai tau ta ladana Anania ia itaia, ia vareai bona ena imana be ia latanai ia atoa, unai amo ia itaia diba.”+ 13 To Anania ia haere: “Lohiabada e, taunimanima momo amo unai tau ena sivarai lau kamonai vadaeni, Ierusalema ai ia ese emu helaga taudia ia hahisia bada. 14 Bona dubu biagudia amo gwaumaoro ia abia, bona ia mai emu ladanai idia boiboi taudia ibounai ia dogoatao* totona.”+ 15 To Lohiabada be ia dekenai ia gwau: “Oi lao! Badina inai tauna be lau abia hidi vadaeni hodu bamona,+ ia ese bese idauidau, king taudia bona Israela besena dekenai egu ladana do ia gwauraia.+ 16 Egu ladana dainai, do ia davaria hisihisi ibounai be ia dekenai do lau hahedinaraia.”+

17 Vadaeni Anania ia lao, ruma lalonai ia vareai bona ena imana be Saulo latanai ia atoa bona ia gwau: “Egu tadikaka Saulo e, dala ai oi mai neganai oi dekenai ia hedinarai tauna, Lohiabada Iesu, ese lau ia siaia, unai amo do oi itaia lou diba bona lauma helaga amo do oi honu.”+ 18 Bona maoromaoro gwarume unana bamona gaudia be ena matana amo idia moru, bena ia itaia lou diba. Vadaeni ia toreisi bona bapatiso ia abia. 19 Bona aniani haida ia ania bona goada ia abia lou.

Bona Damaseko ai hahediba taudia ida dina haida ia noho.+ 20 Bena maoromaoro sinagoga lalodiai Iesu ia harorolaia, ia gwau inai tauna be Dirava ena Natuna. 21 To ia idia kamonai taudia ibounai idia hoa bona idia gwau: “Inai tauna ese Ierusalema ai Iesu ena ladanai idia boiboi taudia* ia dagedage henia bada, ani?+ Bona iniseni ia mai, badina ia ura Iesu ena hahediba taudia ia dogoatao bona ia abia lao* dubu biagudia dekenai, ani?”+ 22 To Saulo be ena hesiai gaukara lalonai ia goada ia lao, bona Damaseko dekenai idia noho Iuda taudia idia hoa bona daradara, badina ia hamomokania goevagoeva Iesu be Keriso.+

23 Dina momo idia ore murinai, Iuda taudia idia haboua bona palani idia karaia Saulo idia hamasea totona.+ 24 To Saulo be edia palani ia diba. Danu, dina bona hanuaboi ai geiti idia gimaia namonamo, ia idia hamasea totona. 25 Unai dainai hanuaboi ai ena hahediba taudia ese ia idia abia lao bona bosea ta lalonai ia guia bona magu ena matu amo idia hadihoa.+

26 Ierusalema ai ia ginidae neganai,+ ia hekwarahi hahediba taudia ia bamodia totona, to idia ibounai be ia dekenai idia gari, badina idia abia dae lasi ia be hahediba tauna ta ai ia lao. 27 Vadaeni, Banaba+ ese Saulo ia durua bona aposetolo taudia dekenai ia hakaua lao. Bona Banaba ese ia hamaorodia, Saulo be dala ai Lohiabada ia itaia+ bona Lohiabada ese ia hereva henia. Danu ia hamaorodia, Damaseko ai Saulo be mai gari lasi ida Iesu ena ladanai ia haroro.+ 28 Vadaeni idia ida ia noho bona mai gari lasi ida Ierusalema ai ia loaloa,* bona Lohiabada ena ladanai ia haroro. 29 Ia be Grik gado ai idia hereva Iuda taudia ida ia herevahereva bona hepapahuahu. To idia ese dala idia tahua ia idia alaia mase totona.+ 30 Tadikaka be unai idia diba neganai, ia idia abia diho Kaisarea dekenai bona Taso dekenai idia siaia lao.+

31 Vadaeni Iudea, Galilea, bona Samaria tanodia ibounai dekenai kongrigeisen taudia+ be maino negana ai idia noho bona idia goada. Bona idia be Iehova* gari henia dalanai idia raka, bona lauma helaga ese idia ia hagoadaia dainai,+ kongrigeisen ia bada ia lao.

32 Petero be gabu ibounai dekenai ia loaloa neganai, Luda ai idia noho helaga taudia dekenai ia lao danu.+ 33 Unuseniai tau ta ladana Aenea ia davaria, ia paralais dainai, lagani 8 lalonai ena mahuta patana sibona dekenai ia hekure. 34 Petero be ia dekenai ia gwau: “Aenea e, Iesu Keriso ese oi ia hanamoa.+ Oi toreisi bona emu mahuta patana oi atoa namonamo.”+ Bena maoromaoro ia toreisi. 35 Luda bona Sarona Kourana ai idia noho taudia ibounai ese ia idia itaia neganai, Lohiabada idia abidadama henia.

36 Iopa ai hahediba hahine ta ia noho, ena ladana be Tabita, to Grik gado ai, ena ladana be “Doreka.”* Ia be kara namodia momo ia karaia bona hebogahisi dainai ogogami taudia ia durua. 37 To unai nega ai ia gorere bona ia mase. Unai dainai ena tauanina idia hagoevaia bona ataiai daiutuna lalonai idia hahekurea. 38 Luda be Iopa kahirakahira dainai, hahediba taudia idia kamonai Petero be Luda dekenai ia noho neganai, tatau rua idia siaia ia idia noia totona. Idia gwau: “Mani emu kara ai dekenai oi mai haraga.” 39 Bena Petero ia toreisi bona idia ida ia lao. Ia ginidae neganai, ataiai daiutuna dekenai idia hakaua daekau, bona vabu ibounai be ia vairanai idia taitai bona Doreka ia mauri neganai, ia turia dabua ibounai be ia dekenai idia hahedinaraia. 40 To Petero ese taunimanima ibounai be murimuri dekenai ia siaia lao,+ bena ia tui diho, bona ia guriguri. Bena mase tauanina ia itaia bona ia gwau: “Tabita e, oi toreisi!” Vadaeni Tabita be matana ia kehoa, bona Petero ia itaia neganai, ia toreisi bona ia helai.+ 41 Petero ese Tabita ena imana ia abia bona ia veria isi, bena helaga taudia bona vabu ia boiridia, bona idia dekenai ia hahedinaraia Tabita be ia mauri.+ 42 Vadaeni Iopa dekenai idia noho taudia ibounai ese unai sivarai idia kamonai bona momo be Lohiabada idia abidadama henia.+ 43 Petero be dina haida lalonai Iopa dekenai, Simona, animal kopina gaukaralaia tauna ida ia noho.+