Aposetolo Edia Kara

2 Pentekoste Ena Aria dinana ai,+ idia ibounai be gabu tamona dekenai idia haboua. 2 Karaharaga guba amo rege ta ia mai, lai bada ia toa regena bamona, bona unai rege ese idia helai noho rumana ia hahonua.+ 3 Bona lahi hururu, edia toana be malana ena toana bamona idia itaia, idia parara bona ta ta dekenai idia lao bona edia ataiai idia noho, 4 bona idia ibounai be lauma helaga amo idia honu+ bona gado idauidau ai idia hereva matamaia, Dirava ena lauma helaga ena hakaua hegeregerena idia hereva.+

5 Unai nega ai, Dirava idia gari henia Iuda taudia be Ierusalema dekenai idia noho, idia be tanobada ena bese idauidau amo idia mai.+ 6 Unai dainai unai rege ia vara neganai, hutuma idia haboua bona idia daradara bada, badina idia ta ta idia kamonai hahediba taudia be edia gado ai idia hereva. 7 Oibe, idia hoa dikadika bona idia gwau: “Itaia, idia hereva noho taudia ibounai be Galilea taudia,+ ani? 8 To edena bamona idia be eda gado korikori* ai idia hereva bona ita kamonai diba? 9 Ita be Patia, Media,+ bona Elama taudia,+ Mesopotamia, Iudea, Kapadokia, Ponto, bona Asia provinsi taudia,+ 10 Perigia bona Pamupulia, Aigupito bona Libia ena kahana haida amo idia mai taudia, unai be Kurene siti ena kahirakahira, danu Roma ena vadivadi taudia, haida be Iuda taudia bona haida be Iuda tomadihona idia abia dae taudia,+ 11 danu Kerete bona Arabia taudia. Ita kamonai idia be eda gado korikori ai Dirava ena kara badadia idia herevalaia.” 12 Oibe, idia ibounai idia hoa bona daradara, ta ta dekenai idia gwau: “Inai ena anina be dahaka?” 13 To haida ese hahediba taudia idia kirikirilaia, idia gwau: “Idia be wain matamata amo idia kekero.”

14 To Petero be aposetolo taudia 11 ida ia gini tore+ bona mai gado bada ida idia dekenai ia gwau: “Iudea taudia bona Ierusalema dekenai umui noho taudia ibounai e, namona be inai umui diba bona egu hereva umui kamonai namonamo. 15 Inai taudia be idia kekero lasi, umui laloa bamona, badina inai be daba 9 oklok.* 16 To, peroveta tauna Ioela ese inai hereva ia gwauraia: 17 ‘Dirava ia gwau, “Dina gabedia ai, lau ese egu lauma helaga be taunimanima ibounai latanai do lau bubua, bona emui natudia memero bona kekeni be do idia peroveta bona emui tatau matamatadia be do idia matahanai bona emui tatau burukadia be do idia nihi,+ 18 bona unai negadia ai, egu hesiai tatau bona hahine latanai danu egu lauma helaga do lau bubua bona do idia peroveta.+ 19 Bona guba dekenai kara badadia bona tanobada dekenai toa do lau hahedinaraia, rara, lahi, bona kwalahu bada. 20 Iehova* ena dina badana mai garina ia do mai lasi neganai, dina be do ia dibura bona hua be rara ai do ia lao. 21 Bona Iehova* ena ladanai idia boiboi taudia ibounai be mauri do idia abia.”’+

22 “Israela taudia e, inai hereva umui kamonai: Dirava be umui dekenai ia hahedinaraia goevagoeva ia ese Nasareta tauna Iesu ia siaia. Ia amo umui huanai hoa bona toa karadia ia karaia,+ bona umui be unai umui diba. 23 Dirava ia diba vadaeni Iesu be do idia dogoatao, bona unai be iena ura bona ia laloa vadaeni gauna.+ Bona umui ese taravatu diba lasi taudia edia imana amo au dekenai ia umui kokoa kau bona umui hamasea.+ 24 To Dirava ese ia hatorea isi lou+ neganai, ia be mase ena hisihisi* amo ia ruhaia, badina mase be siahu lasi ia ia dogoatao noho totona.+ 25 Davida ese Iesu ia herevalaia, ia gwau: ‘Lau ese nega ibounai Iehova* lau laloa noho, bona ia be egu imana idibana kahanai dainai, ta ese lau do ia hagaria diba lasi. 26 Unai dainai egu kudouna ia moale bona mai moale bada ida lau hereva. Bona helaro dainai do lau naria noho, 27 badina Mase Gurina* lalonai lau do oi rakatania lasi, danu oi ia abidadama henia tauna be do oi rakatania lasi ia bodaga totona.+ 28 Oi ese mauri ena dala be lau dekenai oi hadibaia vadaeni. Bona mai lalonamo* ida lau oi itaia neganai, egu moale ia bada herea.’+

29 “Tadikaka e, mai gari lasi ida umui dekenai iseda sene tamana, Davida, mani lau herevalaia. Ia be ia mase bona idia guria+ bona ena guria gabuna be ita ida ia noho ema bona inai nega. 30 Davida be peroveta tauna ta bona ia diba Dirava be ia dekenai ia gwauhamata iena bese tauna ta be ena terona latanai do ia atoa,+ 31 Davida be Keriso ena toreisi lou ia diba guna bona unai ia herevalaia, ia gwau, Dirava ese Keriso be Mase Gurina* dekenai ia rakatania lasi bona ena tauanina be ia bodaga lasi.+ 32 Dirava ese inai Iesu ia hatorea isi lou bona ai ibounai be unai ai itaia.+ 33 Unai dainai, Iesu be guba dekenai ia daekau bona Dirava ena imana idibana kahanai ia helai+ bona Tamana ese ia gwauhamatalaia lauma helaga ia abia+ bona hari ia bubua, umui itaia bona kamonai inai. 34 Momokani, Davida be guba dekenai ia daekau lasi, to ia sibona ia gwau, ‘Iehova* be egu Lohiabada dekenai ia gwau: “Egu imana idiba kahanai oi helai 35 ela bona emu inai taudia be emu aena atoa gauna ai lau halaoa.”’+ 36 Unai dainai, namona be Israela taudia ibounai idia diba momokani, inai Iesu, umui ese au dekenai umui kokoa kau tauna, be Dirava ese Lohiabada bona Keriso ai ia halaoa vadaeni.”+

37 Vadaeni unai idia kamonai neganai, unai hereva ese edia kudouna ia gwadaia, bena Petero bona aposetolo taudia ma haida dekenai idia gwau: “Tadikaka e, dahaka ai karaia be namo?” 38 Petero be idia dekenai ia gwau: “Umui helalo-kerehai,+ bona Iesu Keriso ena ladanai bapatiso umui abia be namo,+ unai amo emui kara dika ia gwauatao diba,+ bona lauma helaga, davana lasi harihari gauna unai, do umui abia. 39 Unai gwauhamata+ be Iehova* iseda Dirava ese ia boiria taudia ibounai totona. Unai be umui, emui natudia, bona daudau gabudia ai idia noho taudia ibounai totona.”+ 40 Bena ia hereva noho, bona hereva momo edia anina ia hahedinaraia goevagoeva bona idia ia hagoadaia noho, ia gwau: “Inai uru gagevana amo umui heau mauri.”+ 41 Vadaeni, mai moale ida ena hereva idia abia dae taudia be bapatiso idia abia,+ bona unai dina ai taunimanima 3,000 bamona be edia orea lalonai idia vareai.+ 42 Bona idia ese aposetolo taudia edia hahediba herevadia idia kamonai namonamo noho, idia hebamo heheni noho,* idia aniani hebou,+ bona idia guriguri hebou.+

43 Oibe, taunimanima ibounai be idia gari matamaia, bona aposetolo taudia ese hoa kara badadia momo idia karaia.+ 44 Hahediba taudia matamatadia ibounai be idia noho hebou bona edia gau ibounai be ta ta ida idia haria, 45 bona edia tano bona edia kohu ibounai idia hoihoilaia+ bona moni be ibounai dekenai idia haria, ta ta ena dabu gauna hegeregerena.+ 46 Bona dina ta ta ibounai idia be dubu helaga dekenai idia hebou, bona ta ta edia ruma ai idia aniani, bona mai moale bada bona kudou namo ida edia aniani idia haria, 47 Dirava idia hanamoa bona taunimanima ibounai ese idia lalonamo henidia. Dina ta ta ai Iehova* ese taunimanima ia hamauria bona idia be hahediba taudia ai idia lao.+