Aposetolo Edia Kara

18 Unai murinai, Paulo be Atena ia rakatania bona Korinto dekenai ia mai. 2 Bona Iuda tauna ta ladana Akwila bona ena adavana Prisikila ia davaria.+ Akwila be Ponto tauna bona vanegai sibona Italia amo ia mai, badina Klaudio ese oda ia henia Iuda taudia ibounai be Roma do idia rakatania. Vadaeni Paulo be idia dekenai ia lao, 3 bona edia gaukara be tamona dainai, ia be edia ruma dekenai ia noho bona palai rumadia turia gaukarana idia karaia hebou.+ 4 Sabati ibounai,+ sinagoga lalonai ia haroro*+ bona Iuda bona Grik taudia edia lalona ia veria.

5 Vadaeni, Sila+ bona Timoteo+ be Makedonia amo idia diho mai neganai, Paulo ese nega bada ia gaukaralaia Dirava ena hereva ia harorolaia totona, bona Iuda taudia dekenai ia hamomokania Iesu be Keriso.+ 6 To ia idia dadaraia loulou bona idia hereva dika henia murinai, ia ese ena dabua amo kahu ia negea oho+ bona idia dekenai ia gwau: “Emui rara be umui sibona emui kwarana latanai do ia noho,+ unai be egu kerere lasi.+ Inai nega amo lau be idau bese taudia dekenai do lau lao.”+ 7 Vadaeni unai gabu* ia rakatania bona tau ta ladana Titio Iusto ena ruma dekenai ia lao. Ia be Dirava tomadiho henia tauna ta bona ena ruma be sinagoga badinai. 8 To sinagoga ena ofesa tauna Krisipo+ be Lohiabada abidadama henia tauna ai ia lao, iena ruma taudia ibounai danu. Bona sivarai namona idia kamonai Korinto taudia momo be abidadama taudia ai idia lao bona idia bapatiso. 9 Ma danu, hanuaboi ai Lohiabada be matahanai ta amo Paulo dekenai ia gwau: “Oi gari lasi, to oi hereva noho bona emu hereva oi hadokoa lasi, 10 badina lau be oi ida+ bona ta ese oi do ia botaia bona hadikaia lasi. Badina inai siti ai egu taunimanima be momo.” 11 Vadaeni unuseniai lagani ta bona hua 6 ia noho bona idia dekenai Dirava ena hereva ia hadibaia.

12 Galio be Akaia ena gavana neganai, Iuda taudia be mai lalotamona ida Paulo idia dagedage henia bona kota gabuna dekenai idia hakaua lao, 13 idia gwau: “Inai tauna be taunimanima edia lalona ia veria noho Dirava do idia tomadiho henia totona, to taravatu hegeregerena idia karaia lasi.” 14 Paulo ia hereva gwauraia neganai, Galio be Iuda taudia dekenai ia gwau: “Iuda taudia e, bema inai tau be kerere haida eiava taravatua utua karana ta ia karaia, umui lau kamonai henia be mai ena badina, 15 to bema umui be hereva haida, ladana haida, eiava emui taravatu umui hepapahuahulaia,+ vadaeni umui sibona ese umui hamaoromaoroa be namo. Lau ura lasi unai gaudia totona hahemaoro lau karaia.” 16 Vadaeni kota gabuna amo idia ia lulua. 17 Unai dainai sinagoga ena ofesa tauna Sositene idia dogoatao,+ bona kota gabuna vairanai idia dadabaia. To Galio be ia ura lasi edia hekwakwanai lalonai ia vareai.

18 To Paulo be dina sisina momo unuseniai ia noho murinai, tadikaka ia bamahuta henidia bona bouti amo Suria dekenai ia lao. Prisikila bona Akwila be ia ida idia lao. Bona Kenekrea dekenai ena huina ia utua kwadogi,+ badina Dirava dekenai gwauhamata ta ia karaia. 19 Vadaeni Efeso dekenai idia ginidae bona unuseniai Paulo ese idia ia rakatania. To ia be sinagoga lalonai ia vareai bona Iuda taudia ida Toretore Helagadia ia herevalaia.+ 20 Ena be ia idia noia loulou do ia noho daudau, to edia ura ia abia dae lasi. 21 Ia bamahuta henidia bona ia gwau: “Bema Iehova* ia ura, umui dekenai do lau giroa lou.” Vadaeni Efeso amo bouti ia guia, 22 bona Kaisarea dekenai ia diho mai. Bena Ierusalema dekenai ia daekau lao, kongrigeisen taudia ia vadivadi henia, bena Antioka dekenai ia diho lao.+

23 Unuseniai nega sisina ia noho murinai, Galatia bona Perigia edia gabu idauidau ia vadivadi+ bona hahediba taudia ibounai ia hagoadaia.+

24 Iuda tauna ta ladana Apolo+ be Efeso dekenai ia ginidae, ia be Alesandria tauna. Ia be hereva namonamo tauna bona Toretore Helagadia ia diba momo. 25 Ia dekenai Iehova* ena dala idia hadibaia vadaeni, bona lauma helaga ena siahu amo ia honu dainai mai ura bada ida ia haroro. Vadaeni ia lao bona Iesu ena sivarai ia herevalaia bona ia hadibaia namonamo, to ia be Ioane ena bapatiso sibona ia diba. 26 Ia be sinagoga ai mai gari lasi ida ia hereva matamaia, bona Prisikila bona Akwila+ be iena hereva idia kamonai neganai, edia ruma dekenai ia idia hakaua lao bona Dirava ena dala be ia dekenai idia hadibaia namonamo. 27 Danu, ia ura Akaia dekenai ia hanaia lao dainai, tadikaka ese hahediba taudia idia tore henia, idia hadibadia Apolo ia mai neganai, mai moale ida ia do idia abia dae. Vadaeni unuseniai ia ginidae neganai, Dirava ena hebogahisi hereadaena amo abidadama taudia ai idia lao taudia ia durua bada. 28 Bona mai ura bada ida taunimanima vairanai ia hahedinaraia goevagoeva, Iuda taudia be idia kerere bona Toretore Helagadia amo ia hahedinaraia, Iesu be Keriso.+