Revareva ta Galatia Taudia Dekenai

3 Galatia taudia e, umui be kavakava! Iesu Keriso be au dekenai idia kokoa karana be umui itaia,+ to daika ese umui ia koia?+ 2 Lau ura gau tamona lau henanadailaia:* Umui ese taravatu umui badinaia dainai, eiava umui kamonai gauna umui abidadama henia dainai lauma helaga umui abia, a?+ 3 Umui kavakava, a? Guna umui be lauma helaga ena hakaua hegeregerena dala matamatana ai umui raka, to hari umui be taunimanima edia lalohadai amo gaukara umui hagugurua noho, a?+ 4 Hisihisi momo umui abia kava, a? Lau laloa umui be hisihisi umui abia kava lasi. 5 Unai dainai, umui dekenai lauma helaga ia henia bona umui huanai siahu karadia ia karaia+ tauna ese taravatu ia badinaia dainai, eiava ia kamonaia gauna ia abidadama henia dainai, unai ia karaia, a? 6 Aberahamo bamona, ia ese “Iehova* ia abidadama henia, bona ia ese ia gwauraia maoromaoro.”+

7 Umui diba momokani, mai edia abidadama taudia be Aberahamo ena natudia.+ 8 Toretore Helagadia ese ia gwauraia vadaeni, Dirava ese idau bese taudia edia abidadama dainai idia do ia gwauraia maoromaoro. Unai dainai Aberahamo dekenai inai sivarai namona ia gwauraia guna, ia gwau: “Oi amo bese ibounai ese hahenamo do idia abia.”+ 9 Unai dainai mai edia abidadama taudia be abidadama tauna Aberahamo ida hahenamo idia davaria.+

10 Taravatu dekenai idia tabekau taudia ibounai be dika do idia davaria, badina Toretore Helagadia ia gwau: “Taravatu* ena lokua toretore dekenai idia noho gaudia ibounai idia badinaia lasi taudia be do ia panisia.”+ 11 Danu, ia hedinarai goevagoeva taravatu dainai Dirava ese tau ta do ia gwauraia maoromaoro lasi,+ badina “kara maoromaoro tauna be ena abidadama dainai do ia mauri.”+ 12 Taravatu ese abidadama karana ia gwauraia lasi. To ia gwau, “Taravatu ia badinaia tauna be do ia mauri noho.”+ 13 Keriso ese ita ia hoia,+ bona Taravatu ese ia gwauraia dika amo ita ia ruhaia,+ unai amo iseda gabu ia abia bona dika tauna ai ia lao, badina Toretore Helagadia ia gwau: “Au dekenai idia kokoa kau* taudia ibounai be dika taudia.”+ 14 Unai amo Aberahamo ena hahenamo be Iesu Keriso amo bese ibounai dekenai do ia lao,+ vadaeni iseda abidadama dainai Dirava ia gwauhamatalaia lauma helaga do ita abia.+

15 Tadikaka e, lau ura haheitalai ta lau herevalaia: Taunimanima be gwauhamata ta idia hamomokania neganai, ta ese unai do ia haidaua lasi eiava hereva haida do ia atoa kau lasi. 16 Dirava ese Aberahamo bona ena natuna* dekenai gwauhamata ia karaia.+ Toretore Helagadia ia gwau lasi, “emu natudia dekenai,” hegeregere idia be hutuma bamona. To ia gwau, “emu natuna” dekenai, unai be Keriso.+ 17 Danu, lau gwau: Lagani 430 murinai ia vara Taravatu+ ese guna Dirava ia karaia gwaubou be anina lasi gauna ai ia halaoa lasi, bona gwauhamata be ia gini noho. 18 Bema taravatu amo ahuna ita abia, vadaeni unai be gwauhamata amo ita abia lasi, to Dirava be mai hebogahisi ida unai ahuna be gwauhamata ta amo Aberahamo dekenai ia henia.+

19 Vadaeni, dahaka dainai Taravatu ia noho? Taravatu ia noho kara dika ia hahedinaraia totona,+ ela bona natuna ia ginidae,+ ia be unai gwauhamata ia abia tauna. Dirava ese aneru dekenai taravatu ia henia+ bona idia ese medieita* ta amo unai idia gwauraia hedinarai.+ 20 To bema tau tamona sibona ia noho, medieita be lasi. Dirava be tamona, bona ia sibona ese unai gwauhamata ia karaia. 21 Unai dainai Taravatu ese Dirava ena gwauhamata ia koua, a? Lasi momokani! Bema taunimanima ese taravatu ta idia abia, bona unai ese mauri ia henia diba, vadaeni kara maoromaoro be taravatu amo ia mai. 22 To Toretore Helagadia ese taunimanima ibounai be kara dika ena igui dekenai ia henia, unai amo Iesu Keriso idia abidadama henia taudia be Dirava ese ia gwauhamatalaia hahenamo idia abia diba.

23 To, abidadama ia do ginidae lasi neganai, taravatu ese ita ia gimaia, bona kara dika ena igui dekenai ita ia henia, bona do ia hedinarai abidadama ita naria.+ 24 Vadaeni Taravatu be iseda hakaua tauna* ai ia lao, bona Keriso dekenai ita ia hakaua lao,+ unai amo abidadama dainai Dirava ese ita do ia gwauraia maoromaoro.+ 25 Abidadama be ia ginidae vadaeni,+ unai dainai ita be hakaua tauna henunai ita noho lasi.+

26 Oibe, umui ibounai be Dirava ena natudia,+ badina Keriso Iesu umui abidadama henia.+ 27 Umui bapatiso vadaeni taudia ibounai be hari Keriso ida umui lalotamona. Bona Keriso umui tohotohoa.*+ 28 Unai dainai Iuda eiava Grik tauna be lasi,+ igui hesiai tauna eiava ura kwalimu tauna be lasi,+ tau eiava hahine be lasi,+ badina umui ibounai be tamona bona Keriso Iesu ida umui hakapua.+ 29 Danu, bema umui be Keriso ena, umui be momokani Aberahamo ena natudia,+ umui be gwauhamata ahuna do umui abia.+