Iosua

22 Bena Iosua ese Rubena taudia, Gado taudia, bona Manase iduhu kahana ia boiria mai, 2 bona idia dekenai ia gwau: “Iehova ena hesiai tauna Mose ese umui ia oda henia gaudia ibounai be umui badinaia vadaeni,+ bona umui ese egu hereva umui kamonai bona umui lau oda henia gaudia ibounai umui karaia.+ 3 Umui ese emui tadikaka umui rakatanidia lasi ema bona hari,+ bona Iehova emui Dirava ena oda herevadia umui badinaia noho.+ 4 Iehova emui Dirava ese emui tadikakadia dekenai laga-ani ia henia, idia dekenai ia gwauhamata hegeregerena.+ Vadaeni Iehova ena hesiai tauna Mose ese umui dekenai ia henia tano dekenai umui giroa lou diba, unai be Ioridane ena kahana ma ta ai.*+ 5 To Iehova ena hesiai tauna Mose ese umui dekenai ia henia oda bona Taravatu umui badinaia namonamo totona,+ Iehova emui Dirava umui lalokau henia,+ iena dala ibounai dekenai umui raka,+ ena oda herevadia umui badinaia noho,+ ia dekenai umui tabekau,+ bona mai emui kudouna ibounai bona emui mauri* ibounai ida+ ia umui hesiai henia.”+

6 Bena Iosua ese idia ia hanamoa bona ia siaidia, bona idia be edia noho gabuna dekenai idia giroa lou. 7 Bona Manase iduhu kahana ta dekenai Mose ese Basana ai tano ia henia vadaeni,+ bona unai iduhu ena kahana ma ta dekenai Iosua ese Ioridane ena west kahana ai tano ia henia,+ edia tadikaka ida. Danu, Iosua ese idia ia siaia lao neganai, idia ia hanamoa, 8 bona ia gwau: “Emui palai rumadia dekenai umui giroa lou, bona emui kohu momo, emui animal momo herea, emui golo bona siliva, kopa bona auri, bona dabua momo herea umui abia lao.+ Bona emui inai taudia amo umui abia kohu be emui tadikaka ida do umui haria.”+

9 Unai murinai Rubena taudia, Gado taudia, bona Manase iduhu kahana ese Israela taudia oredia be Silo ai idia rakatania, unai be Kanana tanona ai. Bona idia be Gileada dekenai idia giroa lou,+ guna Iehova ese Mose amo idia ia oda henia unai tano idia noholaia totona.+ 10 Rubena taudia, Gado taudia, bona Manase iduhu kahana ta be Ioridane kahirakahira, Kanana tano ai, idia ginidae neganai, unuseniai boubou patana badana ta idia haginia. 11 Gabeai haida ese Israela taudia haida idia hamaoroa:+ “Rubena taudia, Gado taudia, bona Manase iduhu kahana be Kanana tano ena hetoana ai boubou patana ta idia haginia, unai be Ioridane kahirakahira, Israela taudia idia noho kahana dekenai.” 12 Israela taudia ese unai idia kamonai neganai, idia ibounai be Silo ai idia haboua,+ do idia lao bona tuari henidia totona.

13 Bena Israela taudia ese Eleasara ena natuna, Pineha, hahelaga tauna unai, be Gileada tano dekenai idia siaia lao,+ Rubena taudia, Gado taudia, bona Manase iduhu kahana dekenai, 14 bona gunalaia taudia 10 be ia ida idia lao. Idia be Israela iduhu ta ta edia gwaukau taudia. Idia ibounai be edia tamana ena kahana taudia edia bese kwaradia, Israela taudia tausen momo* edia huanai.+ 15 Idia be Gileada tano ai idia ginidae neganai, Rubena taudia, Gado taudia, bona Manase iduhu kahana dekenai idia gwau:

16 “Iehova ena taunimanima ibounai idia gwau: ‘Dahaka dainai Israela ena Dirava umui badinaia lasi?+ Hari Iehova umui kamonai henia lasi, badina boubou patana umui haginia bona Iehova umui gwau-edeede henia.+ 17 Peoro ai ita karaia kerere be gau maragina sibona, a? Ita be unai kerere dainai hisihisi ita do abia noho, ena be Iehova ena taunimanima ese gorere dikana idia abia.+ 18 Bona umui ura hari Iehova do umui badinaia lasi, a? Bema hari umui ese Iehova umui gwau-edeede henia, vadaeni kerukeru ia be Israela taudia ibounai dekenai do ia badu.+ 19 Vadaeni bema umui noholaia tano be ia goeva lasi, Iehova ena tano dekenai umui hanaia mai,+ iniseniai Iehova ena palai dubu ia noho+ bona ai huanai umui noho, to Iehova umui gwau-edeede henia lasi, bona Iehova iseda Dirava ena boubou patana ena gabunai boubou patana ma ta umui haginia lasi, dika ai be gwau-edeede taudia ai umui halaoa.+ 20 Sera ena natuna Akana+ ia gwau-edeede bona do idia hadikaia ore gauna ia henaoa neganai, Dirava ese Israela taudia ibounai ia badu henia, ani?+ Bona Akana be sibona ena kerere totona ia mase lasi, to taunimanima ma haida danu idia mase.’”+

21 Unai neganai Rubena taudia, Gado taudia, bona Manase iduhu kahana be Israela taudia tausen momo* edia gunalaia taudia dekenai idia gwau:+ 22 “Iehova, dirava ibounai edia Dirava ia diba!* Oibe, Iehova, dirava ibounai edia Dirava ia diba,+ bona Israela taudia ibounai do idia diba danu. Bema ai be Iehova ai gwau-edeede henia bona ia ai badinaia lasi, hari dina ai umui hamasea ore. 23 Bema inai boubou patana be ai sibona totona ai haginia, unai amo Iehova ai kamonai henia lasi, bona bema inai pata latanai gabua bouboudia, aniani bouboudia, bona maino karaia bouboudia ai henia, vadaeni Iehova ese ai do ia panisia.+ 24 To lasi, ai be badina ma ta dainai unai bamona ai karaia, badina ai laloa, ‘Emui natudia be emai natudia dekenai do idia gwau: “Umui dekenai dahaka maoro ia noho ai ida Iehova, Israela ena Dirava umui tomadiho henia totona? 25 Iehova ese Ioridane be hetoana ta bamona ia atoa, ai bona umui, Rubena bona Gado taudia huanai. Iehova tomadiho henia karana lalonai umui be mai emui kahana ta lasi.” Bona emui natudia ese emai natudia do idia koua Iehova idia tomadiho henia totona.’

26 “Unai dainai ai gwau, ‘Namona be ita sibona totona boubou patana ta ita haginia, to unai be gabua bouboudia eiava boubou gaudia ma haida henia totona lasi, 27 to ia be hamomokania gauna umui, bona ai+ bona iseda murinai idia vara besedia huanai, ai ese Iehova vairanai emai hesiai gaukara do ai karaia noho, ai ese gabua bouboudia, boubou gaudia ma haida, bona maino karaia bouboudia do ai henia noho,+ unai amo vaira negai emui natudia be emai natudia dekenai do idia gwau lasi: “Iehova tomadiho henia karana lalonai umui be mai emui kahana ta lasi.”’ 28 Ma ai gwau, ‘Bema vaira negai, ai bona emai bese taudia dekenai unai bamona idia hereva, ai be do ai gwau: “Emai sene taudia ese idia karaia boubou patana umui itaia, ia be Iehova ena boubou patana hegeregerena, ia be gabua boubou eiava boubou ma haida henia totona ai karaia lasi, to ia be hamomokania gauna ta umui bona ai huanai.”’ 29 Ai be Iehova do ai gwau-edeede henia diba lasi eiava hari Iehova do ai rakatania lasi,+ bona Iehova iseda Dirava ena palai dubu vairanai ia noho boubou patana ena gabunai boubou patana ma ta do ai haginia lasi, gabua boubou, aniani boubou, bona boubou ma haida ai henia totona!”+

30 Hahelaga tauna Pineha, Israela edia gunalaia taudia, bona ia idia bamoa Israela taudia tausen momo* edia gunalaia taudia ese Rubena bese, Gado bese, bona Manase bese edia hereva idia kamonai neganai, idia moale.+ 31 Eleasara ena natuna, Pineha, hahelaga tauna unai, ese Rubena bese, Gado bese, bona Manase bese dekenai ia gwau: “Hari ai diba Iehova be iseda huanai ia noho, badina umui ese Iehova umui gwau-edeede henia lasi. Bona Israela taudia be Iehova ena imana amo umui hamauria.”

32 Bena Eleasara ena natuna, Pineha, hahelaga tauna unai, bona gunalaia taudia be Gileada ai Rubena taudia bona Gado taudia idia rakatania bona Kanana dekenai idia giroa lou, bona Israela taudia ma haida dekenai sivarai idia abia lao. 33 Bona Israela taudia be unai sivarai dekenai idia moale. Idia ese Dirava idia hanamoa, bona hereva ta idia gwauraia lasi Rubena taudia bona Gado taudia tuari henia bona edia tano hadikaia ore totona.

34 Vadaeni Rubena taudia bona Gado taudia ese unai boubou patana ena ladana idia hatoa, Hamomokania Gauna. Badina idia gwau, “Umui bona ai huanai inai boubou patana ese ia hamomokania Iehova be Dirava momokanina.”