Revareva ta Efeso Taudia Dekenai

4 Unai dainai, lau be Lohiabada dainai dibura ruma ai lau noho.+ Lau ese umui lau noia umui abia boiboi herevana hegeregerena, mai maoromaoro ida do umui raka.+ 2 Nega ibounai do umui manau,+ do umui lalomanada, bona do umui haheauka,+ mai lalokau ida umui ta ta emui kara do umui haheaukalaia.+ 3 Do umui gaukara goada lauma helaga ese ia henia lalotamona karana umui badinaia totona, bona maino ese umui do ia hatamonaia.+ 4 Tauanina be tamona,+ lauma helaga be tamona,+ bona danu helaro be tamona, bona unai helaro abia totona umui ia boiria.+ 5 Lohiabada be tamona,+ abidadama be tamona, bapatiso be tamona. 6 Dirava be tamona bona ia be taunimanima ibounai edia Tamana. Ia be ibounai ataiai, ibounai huanai, bona ibounai lalonai ia gaukara.

7 Vadaeni Keriso ese davana lasi harihari gauna ia henia ena bada hegeregerena, Dirava ese ita ta ta dekenai hebogahisi hereadaena ia henia.+ 8 Badina Toretore Helagadia ia gwau: “Ataiai dekenai ia daekau lao neganai, igui hesiai taudia ia abia lao. Bona taunimanima be harihari gaudia bamona ia henia.”+ 9 Vadaeni inai hereva “ia daekau lao” ena anina be dahaka? Unai ese ia hahedinaraia ia be gunaguna henuna kahana, tanobada unai, dekenai ia diho. 10 Bona ia diho mai tauna be guba ataiai momokani ia daekau lao danu,+ unai amo gau ibounai ia hagugurua diba.

11 Bona ia henia taudia haida be aposetolo taudia,+ haida be peroveta taudia,+ haida be evanelia taudia,*+ haida be mamoe naria taudia bona haida be hadibaia taudia,+ 12 unai amo idia ese helaga taudia do idia hamaoromaoroa,* hesiai gaukara do idia karaia, bona Keriso ena tauanina* do idia haginia,+ 13 ela bona ita ibounai iseda abidadama do ia tamona, bona iseda diba maoromaoro Dirava ena Natuna dekenai be do ia tamona danu, ela bona tau badana* bamona ai ita lao,+ bona Keriso ena bada hegeregerena ita abia. 14 Namo lasi ita be natuna maragidia bamona, kara koikoi badinaia taudia edia hadibaia hereva ita kamonai+ bona koikoi dalanai kerere lalonai ita idia hakaua vareai. Bona namo lasi ita be hurehure ese ia doria lao doria mai bona lai ese ia odaia lao bouti bamona. 15 To hereva momokani ita gwauraia, bona namona be lalokau amo gau ibounai dekenai lo taudia ai ita lao, bona iseda kwarana, Keriso, henunai ita noho.+ 16 Ia dainai tauanina ena kahana ibounai idia tubu,+ bona idia ta ta idia hakapua namonamo bona idia gaukara hebou bona edia gaukara ta ta idia karaia namonamo neganai, tauanina ibounai be lalokau dekena amo ia tubu daekau diba.+

17 Unai dainai, Lohiabada ena ladanai umui dekenai inai lau gwauraia, bona umui lau noia, namo lasi umui be tanobada taudia bamona,+ idia be edia anina lasi lalohadai hegeregerena idia raka.+ 18 Idia edia lalona be ia dibura, bona Dirava ena amo ia mai mauri amo idia daudau, badina idia ura lasi Dirava idia diba bona edia kudouna ia auka. 19 Idia hemarai lasi dainai, gwau-edeede hemarai karadia*+ lalonai idia vareai, mai mataganigani ida kara mirodia idauidau ibounai idia karaia totona.

20 To umui dibaia gaudia amo umui diba Keriso be unai bamona lasi. 21 Iesu lalonai ia noho hereva momokani hegeregerena umui idia hadibaia neganai, reana unai umui kamonai namonamo lasi. 22 Namona be emui kara gunana umui kokia,+ unai be emui mauri gunana ena dala hegeregerena. Bona ura dikadia ese umui idia hakaua kerere dainai, unai kara gunana be ia dika.+ 23 Bona emui lalona do umui hamatamataia noho be namo.+ 24 Bona kara matamata umui atoa be namo.+ Unai kara be Dirava ena ura hegeregerena ia vara, ia maoromaoro momokani bona abidadama dalana ia badinaia.

25 Unai dainai koikoi karana umui atoa siri vadaeni dainai, umui ta ta ese emui dekena tauna dekenai hereva momokani do umui gwauraia,+ badina ita ibounai be tauanina tamona ena kahana ta ta.+ 26 Umui badu neganai, umui kara dika lasi.+ Bona dina ia do diho lasi neganai, emui badu ia ore be namo.+ 27 Namo lasi Diabolo ena dala umui kehoa.+ 28 Namo lasi henaoa tauna ia henaohenao lou, to namona be ia gaukara goada bona iena imana amo gaukara namona ia karaia,+ unai amo ia dabu tauna dekenai gau ta ia henia diba.+ 29 Namo lasi hereva bodagadia umui gwauraia,+ to hereva namodia umui gwauraia, unai amo emui hereva idia kamonai taudia do umui hagoadaia.+ 30 Danu, Dirava ena lauma helaga umui hahisia lasi.+ Dirava ese unai lauma helaga amo dina ta totona umui ia makaia,+ unai dina ai mauri davana amo umui do ia ruhaia.+

31 Namona be inai heheni karana,+ badu, badu dikadika, boiboi badabada, hadikaia herevadia,+ bona dika gaudia ibounai danu umui dadaraia.+ 32 To do umui kara namo heheni bona hebogahisi heheni,+ bona mai kudouna ibounai ida ta ta ena dika do umui gwauatao, Dirava ese Keriso amo umui ia gwauatao hegeregerena.+