Iosua

1 Iehova ena hesiai tauna Mose ia mase murinai, Mose ena hesiai gaukara ia karaia tauna, Iosua,*+ Nunu ena natuna+ dekenai Iehova ia gwau: 2 “Lauegu hesiai tauna Mose be ia mase vadaeni.+ Oi bona inai taunimanima ibounai umui toreisi bona Ioridane umui hanaia lao, bona Israela taudia dekenai do lau henia tano dekenai umui vareai.+ 3 Oiemu aena oi atoa gabudia ibounai be oi dekenai do lau henia, Mose dekenai lau gwauhamata hegeregerena.+ 4 Do oi abia gabu be taunimanima lasi gabuna amo ia daekau lao Lebanona dekenai bona ia lao Euperate Sinavai, unai be Hiti taudia edia tano ibounai,+ ela bona west kahana* ai ia noho Davara Badana.*+ 5 Emu mauri dinadia ibounai lalonai, oi idia tuari henia taudia ibounai do oi halusia.+ Lau be Mose ida lau noho hegeregerena, oi ida do lau noho.+ Lau ese oi do lau rakatania lasi.+ 6 Do oi boga-auka bona goada,+ badina oi ese inai taudia do oi durua edia sene taudia dekenai lau gwauhamatalaia tano idia abia totona.+

7 “Do oi boga-auka bona goada, bona egu hesiai tauna Mose ese oi ia oda henia Taravatu ibounai do oi badinaia namonamo. Unai Taravatu amo oi raka siri lasi, lauri eiava idiba kahana dekenai oi lao totona,+ vadaeni oi lao gabudia ibounai dekenai mai aonega ida do oi kara.+ 8 Inai Taravatu bukana be nega ibounai emu udu bibina dekenai do ia noho,+ bona dina bona hanuaboi ai do oi duahia gado maragina* ai, unai amo unai buka lalonai idia torea herevadia oi badinaia namonamo diba.+ Vadaeni do oi karaia gaudia lalonai do oi kwalimu bona mai aonega ida do oi kara.+ 9 Hari oi lau oda henia lou, ‘Do oi boga-auka bona goada. Do oi gari lasi, badina oi lao gabudia ibounai dekenai Iehova emu Dirava be oi ida.’”+

10 Bena Iosua ese taunimanima idia gunalaia taudia ia oda henia, ia gwau: 11 “Kamepa huana amo umui raka lao bona taunimanima dekenai inai oda hereva umui henia, ‘Umui sibona totona aniani gaudia umui abia hegaegae, badina dina toi murinai umui be Ioridane do umui hanaia lao bona Iehova emui Dirava ese umui dekenai ia henia tano do umui abia.’”+

12 Bona Rubena iduhu, Gado iduhu, bona Manase iduhu ena kahana dekenai, Iosua ia gwau: 13 “Iehova ena hesiai tauna Mose ese umui dekenai ia henia oda hereva umui laloatao:+ ‘Iehova emui Dirava be umui dekenai laga-ani ia henia noho. Ia ese umui dekenai inai tano ia henia vadaeni. 14 Emui hahine, emui natudia, bona emui animal be Mose ese umui dekenai ia henia tano ai do idia noho, unai be Ioridane ena ist kahanai,+ to umui tuari taudia goadadia+ ibounai be tuari oreana bamona emui tadikaka edia vairanai do umui hanaia lao.+ Namona be umui ese idia umui durua 15 ela bona Iehova ese emui tadikaka dekenai laga-ani ia henia, ia ese umui dekenai ia henia bamona, bona Iehova emui Dirava ese idia dekenai ia henia tano do idia abia danu. Bena umui dekenai ia henia bona umui abia tano dekenai do umui giroa lou, Iehova ena hesiai tauna Mose ese umui dekenai ia henia tano unai, ia be Ioridane ena ist kahanai.’”+

16 Idia be Iosua dekenai idia gwau: “Oi ese ai oi oda henia hegeregerena do ai karaia, bona ai oi siaia gabudia ibounai dekenai do ai lao.+ 17 Mose ena hereva ibounai ai kamonai hegeregerena, oi do ai kamonai henia danu. To namona be Iehova emu Dirava be oi ida ia noho, Mose ida ia noho hegeregerena.+ 18 Oiemu oda ibounai ia dadaraia bona oi henia hereva ibounai ia badinaia lasi tauna be do idia hamasea.+ To oi boga-auka bona goada.”+