Hadibaia Tauna

4 Tanobada dekenai* idia karaia dagedage karadia ibounai lau laloa lou, bona hisihisi idia davaria taudia edia matana ranu lau itaia bona ta be idia ia hagoadaia lasi.+ Bona idia ia dagedage henia taudia be mai edia siahu, unai dainai ta be hisihisi idia davaria taudia ia durua lasi. 2 Bona lau laloparara idia mase vadaeni taudia be namo, idia mauri noho taudia edia mauri idia hereaia.+ 3 Bona idia ruaosi be ia do vara lasi tauna ese ia hereaia,+ badina ia be tanobada dekenai idia vara hisihisi karadia ia do itaia lasi.+

4 Bona lau itaia taunimanima be ta ta idia halusia totona idia gaukara goada bona idia hekwarahi bada.+ Unai danu be anina lasi momokani, lai idia lulua bamona.

5 Kavakava tauna be ena imana ia lokua, unai dainai ena tauanina ia dika ia lao.*+

6 Laga-ani sisina be mai ena namo, to gaukara goadagoada karana be lai lulua bamona.+

7 Lau ese tanobada dekenai ia vara anina lasi gauna ma ta lau laloa. 8 Tau ta be sibona ia noho, turana ta be lasi, natuna eiava tadikakana ta be lasi, to ia gaukara goadagoada bona ia laga-ani lasi. Iena matana ese kohu momo ia ura henia.+ To sibona ia nanadaia lasi: ‘Lau be daika totona lau hekwarahi noho? Bona dahaka dainai lau sibona hamoalea gaudia lau tahua lasi?’+ Unai danu be anina lasi momokani bona mai ena lalohisihisi.+

9 Taunimanima rua ese tau tamona idia hereaia,+ badina idia gaukara hebou dainai ahuna namona idia davaria. 10 Bema idia ta ia moru, ena turana ese ia abia isi diba. To bema tau ta be sibona bona ia moru, daika ese ia do ia abia isi?

11 Ma danu bema rua idia hekure hebou, do idia siahu, to bema ta be sibona, edena bamona ia siahu diba? 12 Tau ta ese tau tamona ia halusia diba, to bema rua idia gini hebou, idia ese unai tauna idia halusia diba. Bona idia pania hebou varo toi be do ia kokia haraga lasi.

13 Ia ogogami to mai ena aonega merona ese ia buruka vadaeni king ia hereaia,+ badina king be sisiba ia abia dae lasi.+ 14 Badina ia* be dibura ruma amo ia raka-lasi bona king ai ia lao,+ ena be king ma ta ena lohia negana ai ia be ogogami ai ia vara.+ 15 Lau ese tanobada dekenai idia mauri taudia ibounai lau laloa, bona king ena gabu ia abia king matamata dekenai do idia vara gaudia lau laloa danu. 16 Ena be ia idia durua taudia be momo herea, to gabeai idia mai taudia be ia dekenai do idia moale lasi.+ Unai danu be anina lasi, lai ia lulua bamona.