Samuela Iharuana

9 Bena Davida ia gwau: “Saulo ena bese tauna ta ia do mauri noho, a? Lau ura Ionatana dainai ia dekenai lalokau* lau hahedinaraia.”+ 2 Vadaeni Saulo ena bese lalonai hesiai tauna ta ia noho, ena ladana be Siba.+ Bena ia idia boiria Davida dekenai ia lao totona, bona king ese ia nanadaia: “Oi be Siba, a?” Ia haere: “Lau inai emu hesiai tauna.” 3 King ma ia gwau: “Saulo ena bese tauna ta ia do mauri noho, a? Lau ura ia dekenai Dirava ena lalokau* lau hahedinaraia.” Bena Siba be king dekenai ia gwau: “Ionatana ena natuna mero ta ia noho. Iena aena ruaosi be idia dika.”+ 4 King ese ia nanadaia: “Ia be edeseni?” Bena Siba ese king ia haere henia: “Ia be Amiele ena natuna Makiri ena ruma ai ia noho,+ Lo-debara dekenai.”

5 King Davida ese maoromaoro hereva ia siaia Amiele ena natuna Makiri ena ruma amo ia idia mailaia totona, unai be Lo-debara amo. 6 Ionatana ena natuna bona Saulo ena tubuna Mefiboseta be Davida dekenai ia mai neganai, maoromaoro ia goru diho. Bena Davida ia gwau: “Mefiboseta e!” Ia haere: “Lau inai emu hesiai tauna.” 7 Davida be ia dekenai ia gwau: “Oi gari lasi, badina lau ese oi dekenai lalokau* do lau hahedinaraia,+ emu tamana Ionatana dainai, bona lau ese emu tubuna Saulo ena tano ibounai be oi dekenai do lau henia lou, bona oi be nega ibounai egu teibolo ai do oi aniani.”+

8 Unai neganai ia goru diho bona ia gwau: “Lau, emu hesiai tauna be daika bona lau dekenai unai bamona oi karaia? Lau be ia mase sisia ta bamona.”+ 9 Vadaeni king ese Saulo ena hesiai tauna Siba ia boiria, bona ia dekenai ia gwau: “Saulo bona ena bese taudia ese idia biagua gaudia ibounai be emu biaguna Saulo ena tubuna dekenai lau henia.+ 10 Bona oi, emu natudia, bona emu hesiai taudia be ia totona tano do umui birulaia, bona tano ena anina do umui haboua, emu biaguna ena tubuna ena famili ese idia ania totona. To emu biaguna ena tubuna, Mefiboseta, be nega ibounai egu teibolo dekenai do ia aniani.”+

Siba ena natudia memero be 15, bona ena hesiai taudia be 20.+ 11 Bena Siba be king dekenai ia gwau: “Lauegu lohia bona king e, lau, emu hesiai tauna dekenai oi henia oda ibounai do lau badinaia.” Vadaeni Mefiboseta be Davida ena teibolo dekenai ia aniani, king ena natuna ta bamona. 12 Mefiboseta be mai ena natuna maragina ta, iena ladana be Maika.+ Bona Siba ena ruma ai idia noho taudia ibounai be Mefiboseta ena hesiai taudia ai idia lao. 13 Bona Mefiboseta be Ierusalema ai ia noho, badina ia be nega ibounai king ena teibolo ai ia aniani.+ Bona ena aena ruaosi be idia dika.+