Apokalupo—Ioane Ia Abia Herevana

13 Bona huala be davara ena kone dekenai ia gini noho.

Bona lau itaia dagedage animal+ ta be davara amo ia daekau,+ iena doana be 10, iena kwarana be 7, bona iena doana ta ta dekenai be korona 10 idia noho, to iena kwarana ta ta dekenai be Dirava hadikaia ladadia idia noho. 2 Lau itaia dagedage animal ena toana be lepadi bamona, to iena aena be bea ena aena bamona, bona iena uduna be laiona ena uduna bamona. Bona huala+ ese ena goada, ena terona, bona siahu bada be unai animal dekenai ia henia.+

3 Lau itaia iena kwarana ta dekenai bero badana ia noho. Ena be unai bero be dika momokani, to ia namo lou.+ Bona tanobada taudia ibounai be idia hoa bona unai dagedage animal murinai idia raka. 4 Bona idia ese unai huala idia tomadiho henia, badina ia ese unai dagedage animal dekenai siahu ia henia. Bona dagedage animal idia tomadiho henia, idia gwau: “Daika be inai dagedage animal hegeregerena, bona daika be ia ida ia tuari diba?” 5 Huala ese dagedage animal dekenai siahu ia henia, ena uduna amo hekokoroku herevadia bona Dirava hadikaia herevadia ia gwauraia totona. Bona ia dekenai siahu ia henia hua 42 lalonai ia gaukara totona.+ 6 Bona dagedage animal ese ena uduna ia kehoa, Dirava hadikaia herevadia ia gwauraia totona,+ bona Dirava ena ladana, ena noho gabuna, bona guba ai idia noho taudia ia gwauraia dika.+ 7 Ia be maoro ia abia helaga taudia ia tuari henia bona halusia totona.+ Bona siahu ia abia, iduhu ibounai, kopi idauidau, gado ibounai, bona bese ibounai ia biagua totona. 8 Bona tanobada ai idia noho taudia ibounai ese ia do idia tomadiho henia. Taunimanima be tanobada ai idia vara negana amo, unai dagedage animal idia tomadiho henia taudia amo idia ta ena ladana be mauri bukana ai idia torea lasi,+ unai buka be idia hamasea vadaeni Mamoe Natuna ena.+

9 Mai ena taiana tauna ia kamonai be namo.+ 10 Bema ta be dibura ruma dekenai ia lao, vadaeni dibura ruma dekenai do ia lao. Bema ta be tuari kaia amo do ia ala-ala, vadaeni tuari kaia amo idia alaia mase be namo.+ Unai dainai gau badana be helaga taudia+ idia haheauka+ bona idia abidadama noho.+

11 Bena dagedage animal ma ta lau itaia, ia be tano amo ia daekau, bona iena doana be rua, mamoe natuna ena doana bamona, to huala ta bamona ia hereva matamaia.+ 12 Ia ese dagedage animal ginigunana ena siahu ibounai be iena vairanai ia gaukaralaia.+ Bona ia ese tanobada bona tanobada ai idia noho taudia ia oda henia, bero dikana amo ia namo lou dagedage animal ginigunana idia tomadiho henia totona.+ 13 Bona ia ese hoa kara badadia ia karaia, bona taunimanima vairanai lahi be guba amo tanobada dekenai ia hadihoa.

14 Dagedage animal iharuana ese tanobada ai idia noho taudia ia hakaua kerere, badina maoro ia abia dagedage animal ginigunana ena vairanai hoa karadia ia karaia totona, bona tanobada ai idia noho taudia ia hamaoroa, dagedage animal, guna tuari kaia amo bero dikana ia abia bona ia namo lou gauna,+ ena laulau do idia karaia.+ 15 Bona ia ese maoro ia abia, dagedage animal ginigunana ena laulau dekenai laga do ia henia, unai amo ia hereva diba bona oda ia henia iena laulau idia ura lasi tomadiho henia taudia ibounai ia hamasea totona.

16 Dagedage gauna iharuana ese taunimanima ibounai, ladana maragi bona ladana bada taudia, taga taudia bona ogogami taudia, ura kwalimu taudia bona igui hesiai taudia, ia oda henia edia imana idibana eiava edia baguna ai maka do idia atoa.+ 17 Bona tau ta be gau ta ia hoia eiava ia hoihoilaia diba lasi, to maka ia abia tauna sibona, unai maka be dagedage animal ena ladana+ eiava ena ladana ena namba.+ 18 Namona be tau ta be mai ena aonega inai ia lalopararalaia totona: Namona be laloparara tauna ese dagedage gauna ena namba ia duahia namonamo, badina unai namba be tau ta ena namba, bona ena namba be 666.+