Siri Edia Anina Gwauraia Maoro

MA HAIDA ita hadibaia neganai, Baibel ena siri ita duahia sibona be hegeregere lasi. Aposetolo Paulo be ena bamona Timoteo ia tore henia: “Do oi gaukara goada, bona gaukara namona momokani tauna do oi lao, Dirava ese oi dainai do ia moale bada totona. Vadaeni oi ese hereva momokani do oi hadibaia maoromaoro, bona Dirava ena vairanai do oi hemarai lasi.”​—2 Tim. 2:15.

Unai ena anina be Baibel ena hadibaia herevadia hegeregerena siri ena anina ita gwauraia. Unai ita karaia totona badina siridia ita laloa, namo lasi eda lalona idia veria herevadia ita abia hidi bona sibona eda ura hegeregerena anina ita gwauraia. Iehova ese peroveta tauna Ieremia amo taunimanima ia hadibaia do idia naria namonamo, badina peroveta taudia haida idia gwau Iehova ena hereva idia gwauraia, to “sibodia edia laloa sibona idia gwauraia noho.” (Ier. 23:16) Aposetolo Paulo ese Keristani taudia ia hadibaia taunimanima edia aonega herevadia amo Dirava ena Hereva do idia hadikaia lasi, ia gwau: “Ai be hemarai karadia, taunimanima idia hunia gaudia, ai negea vadaeni, bona koikoi karadia be ai karaia lasi. Dirava ena hereva danu ai senisia lasi.” Unai nega ai uaina idia hoihoilaia koikoi taudia ese edia uaina dekenai ranu idia atoa, uaina ia bada bona moni bada idia abia totona. Ita ese taunimanima edia aonega herevadia ida Dirava ena Hereva ita mikisi lasi. Paulo ia gwau: “Ai be haida bamona lasi, Dirava ena hereva ai hoihoilaia lasi. Lasi momokani. Ai be lalona momokani taudia bona inai dagi Dirava dekena amo ai abia. Ai be Keriso ena hesiai taudia dainai, Dirava ena vairana dekenai ai hereva noho, mai laloa maoromaoro danu.”​—2 Kor. 2:17; 4:2.

Nega haida, hakaua herevana ta oi hahedinaraia totona reana siri ta oi gwauraia. Baibel lalonai be nega idauidau lalonai ita badinaia diba hakaua herevadia momo idia noho. (2 Tim. 3:​16, 17) To namona be oi hamomokania siri ena anina oi gwauraia maoro bona oi gaukaralaia kerere lasi, ena anina oi haidaua lasi oi ura henia lalohadaina ida ia hegeregere totona. (Sal. 91:​11, 12; Mat. 4:​5, 6) Gau badana be oi gwauraia anina be Iehova ena ura bona Dirava ena Hereva ibounai ida ia hegeregere.

“Hereva momokani do oi hadibaia maoromaoro” totona, namona be Baibel ena lalohadai badana oi diba danu. Ia be ma haida botaia “auna” lasi. Iesu Keriso idia dagedage henia tomadiho hadibaia taudia ese Baibel ena hereva idia gwauraia, to Dirava ese ia ura henia mai anina bada gaudia​—kota maoromaoro bona hebogahisi bona abidadama​—idia ura lasi itaia. (Mat. 22:​23, 24; 23:​23, 24) Iesu ese Dirava ena Hereva ia hadibaia neganai, iena Tamana ena kara ia hahedinaraia. Iesu ese hereva momokani ia ura henia bada, bona ia hadibaia taudia ia lalokau henia bada danu. Namona be ita hekwarahi, ena haheitalai ita tohotohoa totona.​—Mat. 11:28.

Edena dala ai ita hamomokania diba siri ta ena anina ita gwauraia maoro? Baibel duahia hanaihanai karana ese ita do ia durua. Namona be Iehova ia henia “hesiai tauna mai ena kamonai, bona mai ena kara maoromaoro” ita laloa bada danu, badina unai Keristani taudia, lauma helaga amo ia horoa taudia, ia gaukaralaia abidadama taudia dekenai lauma aniani ia henia totona. (Mat. 24:45) Sibona eda stadi ita karaia, kongregesen heboudia dekenai ita lao, bona hebou lalodiai ita haere neganai, unai hesiai tauna mai ena kamonai bona kara maoromaoro oreana amo ia henia hadibaia herevadia ese ita idia durua.

Bema emu gado ai Buka Helaga Herevalaia bukana ia noho bona oi gaukaralaia namonamo diba, haroro gaukara lalonai ita gaukaralaia siri handred momo edia anina maorona oi davaria haraga. Bema oi diba namonamo lasi siri ta oi gaukaralaia gwauraia, oi lalo-manau dainai ena anina do oi tahua, bena oi hereva neganai, hereva momokani do oi hadibaia maoro.​—Aon. 11:2.

Anina Oi Gwauraia Goevagoeva. Ma haida oi hadibaia neganai, namona be emu hereva lalonai oi duahia siridia oi gaukaralaia ena badina idia diba. Bema siri oi duahia gwauraia neganai henanadai ta oi henia, namona be kamonai taudia do idia itaia edena dala ai unai siri ese emu henanadai ia haerelaia. Bema siri oi gaukaralaia hereva ta ia durua totona, oi hadibaia tauna be siri ese unai hereva ia hamomokania dalana ia itaia be namo.

Nega momo siri oi duahia sibona be hegeregere lasi, herevana hemami danu oi hahedinaraia. Oi laloatao, taunimanima momo be Baibel idia diba namonamo lasi bona siri ta be nega tamona oi duahia sibona neganai ena anina idia itaia lasi. Unai siri ena kahana, oi herevalaia gauna ia durua kahana, oi hahedinaraia namonamo.

Nega momo unai oi karaia totona hereva badadia, oi herevalaia gauna dekenai mai anina herevadia, oi hahedinaraia. Dala namona be unai lalohadai idia hahedinaraia herevadia oi gwauraia lou. Bema tau ta oi hereva henia, reana henanadai oi henia unai mai anina herevadia ia itaia totona. Unai ia vara totona hereva henia taudia haida be hutuma idia hereva henia neganai, unai bamona hereva ma haida idia gaukaralaia eiava sibona edia hereva amo unai lalohadai idia gwauraia. To, bema unai bamona oi karaia, oi naria namonamo, kamonai taudia ese oi herevalaia gauna bona siri ena hereva oi hakapua dalana idia itaia lasi garina.

Mai anina herevadia oi davaria neganai, badina namona oi atoa vadaeni. Hari oi karaia sibona. Siri oi gwauraia neganai oi gaukaralaia ena badina oi hahedinaraia goevagoeva, a? Bema oibe, oi gwauraia herevadia bona unai dainai kamonai taudia idia laloa gauna oi hahedinaraia. Unai hakapua gauna oi hahedinaraia goevagoeva. Ena be unai dala ai siri oi gwauraia lasi, oi duahia murinai gau haida oi herevalaia be namo.

Farisea taudia idia laloa Iesu dekenai henanadai aukana idia henia, idia gwau: “Tau ta ese iena adavana ia negea diba bema ia ura neganai, o bema mai badina?” Iesu ese ena haere lalonai Genese 2:24 ia gaukaralaia. Oi itaia edia lalona ia veria unai siri ena kahana ta sibona idia laloa totona, bena anina ia herevalaia. Iesu ia hahedinaraia tau bona ena adavana be “tamona,” bona murinai ia gwau: “Dirava ese ia hakapua taudia, be taunimanima ese do idia hapararaia lasi.”​—Mat. 19:​3-6.

Hereva momo oi gaukaralaia siri ena anina hahedinaraia totona be namo, a? Kamonai taudia bona oi herevalaia gauna ena anina ena bada hegeregerena unai oi abia hidi. To namona be hereva ia auka lasi bona oi hahedinaraia maoromaoro.

Baibel Oi Herevalaia. Kara 17:​2, 3 ese aposetolo Paulo ena hesiai gaukara Tesalonika dekenai ia herevalaia neganai, ita ia hadibaia ‘Buka Helaga ia herevalaia.’ Iehova ena hesiai taudia ibounai ese unai kara idia hanamoa be namo. Hegeregere, Paulo ese Iesu ena mauri bona hesiai gaukara lalonai idia vara gaudia ia herevalaia, ia hahedinaraia Heberu Revarevadia ese unai gaudia idia perovetalaia, bena hereva dokona goadana ia henia, ia gwau: “Inai Iesu, umui dekenai lau herevalaia tauna, ia be Keriso.”

Paulo ese Heberu taudia ia tore henia neganai, hanaihanai Heberu Revarevadia edia hereva ia torea hanai. Gau ta ia herevalaia goada eiava ia hahedinaraia goevagoeva totona, nega momo hereva ta eiava haida sibona ia hahedinaraia bena anina ia gwauraia. (Heb. 12:​26, 27) Heberu karoa 3 ai ita davaria sivarai lalonai, Paulo ese Salamo 95:​7-11 ena hereva haida ia gwauraia lou. Oi itaia ena kahana toi ia herevalaia: (1) lalona (Heb. 3:​8-​12), (2) inai hereva “hari dina” ena anina (Heb. 3:​7, 13-​15; 4:​6-​11), bona (3) inai hereva, “lauegu laga-ani gabuna dekenai do idia vareai lasi,” ena anina (Heb. 3:​11, 18, 19; 4:​1-​11). Siri ta ta edia anina oi gwauraia neganai unai haheitalai oi tohotohoa.

Luka 10:​25-37 dekenai ia noho sivaraina lalonai Iesu ese Baibel ia herevalaia namonamo dalana mani oi itaia. Taravatu hadibaia tauna ta ia henanadai: “Hadibaia tauna e, lau be edena bamona do lau karaia mauri hanaihanai abia totona?” Iesu be ia haere neganai unai tauna ia noia ena lalohadai ia gwauraia guna, bena gabeai Iesu ese ia hahedinaraia Dirava ena Hereva ita badinaia be gau badana. Iesu ia itaia unai tauna ese ena hereva ena anina ia lalo-pararalaia lasi neganai, siri ena hereva tamona​—“badibadinai tauna”​—ia herevalaia badabada. Unai hereva ena anina ia gwauraia sibona lasi, to haheitalai ta amo unai tau ia durua ena hereva ena anina ia lalo-pararalaia totona.

Ia hedinarai, Iesu ese henanadai ia haerelaia neganai, haere ia hahedinaraia siridia edia hereva ia gwauraia sibona lasi. Idia ia herevalaia guna bena edia anina edia henanadai dekenai ia gwauraia.

Sadukea taudia ese toreisi lou helarona idia hepapahuahulaia neganai, Iesu ese Esodo 3:6 ena kahana tamona ia herevalaia. To unai siri ena hereva ia gwauraia murinai ena hereva ia haorea lasi. Ia herevalaia bona ia hahedinaraia goevagoeva toreisi lou be Dirava ena palani ena kahana ta.​—Mar. 12:​24-27.

Anina ia havaraia dalanai Baibel oi herevalaia maoro karana ese oi do ia durua bada, hadibaia tauna namona ai oi lao totona.