Herevahereva Dalanai

TAUNIMANIMA be turadia ida idia herevahereva neganai edia lalona ia namo. Edia hereva iboudiai idia gwauraia sibona. Haida idia hereva momo; haida be idia hereva momo lasi. To, sibona eda hereva dalana ai ita hereva ena mamina be namo.

To, oi diba lasi tauna ta oi hereva henia neganai, ia oi diba namonamo bamona oi hereva be namo lasi. Momokani, bese momo ai edia kara be idia diba lasi taudia idia hereva henia matamaia neganai hereva gwauraia dalana tamona idia badinaia. Unai bamona hemataurai karana idia hahedinaraia murinai, mai aonega ida unai dala idia rakatania bena herevahereva dalanai idia hereva.

Platfom amo oi hereva neganai, oi laloa namonamo danu. Bema hereva dalana namona oi badinaia lasi, toana be Keristani hebou oi matauraia lasi bona emu hereva ena anina oi hamanokaia. Gado haida ai, hereva haida be tau badana, tisa tauna, ofesa tauna, eiava tama o sina sibona idia hereva henia neganai idia gaukaralaia. (Kara 7:2 bona 13:16 ai idia gaukaralaia herevadia mani oi itaia.) Adavana eiava turana namona hereva henia neganai, hereva ma haida idia gaukaralaia. Ena be platfom amo ita hereva neganai hereva gwauraia dalana tamona ita badinaia kava lasi, to namona be hemataurai dalanai ita hereva.

To, gau haida dainai reana ta ena hereva toana be hereva gwauraia dalana ta ia badinaia auka bamona. Badina ta be sentens karaia dalana. Bema hereva henia tauna ese lalohadai ta be idia torea hegeregerena ia gwauraia toho, hekwakwanai ia vara. Nega momo idia torea herevana bona ita gwauraia herevana be idau. Momokani, hereva oi hegaegaelaia neganai idia printaia buka bona magasin amo hereva haida oi tahua. Reana idia printaia autlain amo emu hereva oi henia. To bema lalohadai ta be idia printaia hegeregerena oi gwauraia eiava idia printaia autlain amo oi duahia, emu hereva ena toana be herevahereva bamona lasi. Herevahereva dalanai oi hereva totona, sibona emu hereva amo lalohadai oi gwauraia bona sentens aukadia oi gaukaralaia lasi.

Gau ma ta be hereva ia haraga bona ia metaira karana. Nega momo ta be hereva gwauraia dalana ta ia badinaia auka neganai hereva ta ta ia gwauraia ena haraga be tamona. Herevahereva lalonai, hereva gwauraia ena haraga be idauidau bona laga-ani edia lata be idauidau danu.

Momokani, bema taunimanima hutuma oi hereva henia, namona be herevahereva dalanai oi karaia, to danu, gado regena, siahu, bona hemami oi habadaia be namo, emu hereva idia kamonai noho totona.

Haroro gaukara ai ia hegeregere herevahereva dalana oi diba totona, dina ta ta ai oi hereva namonamo be namo. Unai oi karaia diba ena be edukeisen bada oi abia lasi. To namona be hereva dalana namona oi manadalaia, unai amo ma haida ese oi gwauraia sivaraina do idia matauraia. Unai oi laloa noho lalonai, mani oi itaia bema dina ta ta ai oi herevahereva neganai inai gaudia oi hanamoa be namo.

1. Grama namona ena taravatu idia hadikaia hereva dalana bona Dirava ena taravatu be edia mauri dalana amo idia utua taudia edia hereva dalana oi dadaraia. Kolose 3:8 ena sisiba hegeregerena, hereva dika bona hereva miro oi dadaraia. To, dina ta ta ai oi badinaia hereva dalana be dika lasi. Iseda dina ta ta hereva daladia, eiava ita gwauraia herevadia, be hereva gwauraia dalana badana ta bamona lasi, to unai be taunimanima ese idia abia dae hereva dalana hegeregerena.

2. Emu lalohadai iboudiai be dala tamona ai oi gwauraia lasi. Emu lalohadai edia anina idia hahedinaraia goevagoeva herevadia oi gaukaralaia.

3. Emu hereva oi gwauraia loulou kava lasi, to oi laloa namonamo guna; murinai oi hereva matamaia.

4. Lalohadai namodia be hereva momo amo oi hunia lasi. Oi ura idia laloatao lalohadai be sentens kwadogina bona namona amo oi hahedinaraia.

5. Ma haida matauraia dalanai oi hereva.