Hagoadaia namonamo

NAMONA be Keristani elda taudia ese ‘hadibaia hereva namodia dekena amo haida do idia hagoadaia.’ (Tito 1:9) Nega haida unai be nega aukadia lalonai idia karaia. Gau badana be idia henia sisiba be Baibel ena hakaua herevadia ida ia hegeregere. Unai dainai, elda taudia ese inai sisiba idia badinaia: “Sisiba goada do oi henidia.” (1 Tim. 4:13) Ena be inai hereva be elda taudia bona unai gaukara idia laloa noho tadikaka dekenai mai anina bada, to nega haida tama sina ese edia natudia idia hagoadaia eiava Baibel stadi idia karaia taudia ese Baibel stiuden taudia idia hagoadaia be namo. Unai neganai, inai hakaua herevadia idia badinaia diba.

Hagoadaia Negadia. Edena nega ai ta ita hagoadaia be namo ita diba totona, Baibel lalonai ma haida idia hagoadaia negadia ita itaia be namo. Aposetolo Petero ese elda taudia ia hagoadaia, edia maduna Dirava ena mamoe oreana naria totona idia laloa namonamo. (1 Pet. 5:​1, 2) Paulo ese Tito ia sisiba henia, tau matamatadia do ia hagoadaia “idia laloa maoromaoro” totona. (Tito 2:6) Paulo ese ena Keristani tadikaka ia hagoadaia, ‘hereva tamona do idia gwauraia’ bona tadikaka idia hapararaia toho taudia amo do idia raka siri. (1 Kor. 1:10; Roma 16:17; Fili. 4:2) Ena be Paulo ese Tesalonika kongregesen taudia be edia kara namodia dainai ia hanamoa, to idia ia hagoadaia idia kamonai hadibaia herevadia badinaia karana do idia habadaia. (1 Tes. 4:​1, 10) Petero ese ena Keristani tadikaka ia hagoadaia, ‘tauanina ena ura dikadia idia karaia lasi’ totona. (1 Pet. 2:11) Iuda ese ena tadikaka ia hagoadaia ‘abidadama lalonai idia gini goada’ totona, badina Dirava idia negea lebulebu karadia idia karaia taudia edia siahu ia noho. (Iuda 3, 4) Keristani taudia ibounai idia hagoadaia, idia ta ta do idia sisiba henia, kara dika ese ia koidia bona edia lalona ia auka garina. (Heb. 3:13) Petero ese Keriso idia do abidadama henia lasi Iuda taudia ia hagoadaia, ia gwau: “Inai nega noho gagevagageva taudia dekena amo umui heau mauri.”​—Kara 2:40.

Dahaka kara ita hahedinaraia be namo, unai bamona negadia lalonai hagoadaia hereva ita gwauraia diba totona? Edena dala ai hagoadaia tauna ese ia hahedinaraia ena hereva idia badinaia be gau badana to idia laloa lasi ia kara auka?

‘Lalokau Dainai.’ Bema “lalokau” be eda hagoadaia herevadia edia badina lasi, reana toana be eda hereva ia auka. (File. 9) Momokani, bema maoromaoro kara ta idia karaia be namo, namona be hereva henia tauna ese karaharaga lalohadaina ia hahedinaraia. Bema ena gado regena be manoka, reana idia laloa hereva ta dainai ia sori. To danu, namona be mai ena ura bada ida ia hereva bona haida edia hemami ia laloa bada. Bema mai lalokau ida ia hereva, kamonai taudia ese do idia badinaia. Paulo ese sibona bona ia idia badinaia taudia ia herevalaia neganai, Tesalonika taudia ia hamaoroa: “Umui diba, ai ese umui ta ta ai durua, tamana ese iena natuna ia durudia hegeregerena.” (1 Tes. 2:11) Unai Keristani naria taudia ese mai lalokau ida tadikaka idia kara henia. Namona be kamonai taudia edia namo oi laloa bada dainai hereva oi gwauraia.

Oi kara namo. Oi ura kara ta idia karaia totona oi hagoadaia taudia oi habadua lasi. To danu, kamonai taudia dekenai “Dirava ena ura ibounai” oi hahedinaraia. (Kara 20:27) Emu hereva idia laloa bada taudia be kara maorona idia karaia totona oi hagoadaia namonamo dainai do idia badu lasi eiava edia lalokau oi dekenai do ia keru lasi.​—Sal. 141:5.

Nega momo, namona be hagoadaia hereva oi do gwauraia lasi neganai hanamoa hereva momokanina ta oi gwauraia. Emu tadikaka ese idia karaia kara namodia oi laloa​—Iehova ia moalelaia karadia: edia kara amo idia hahedinaraia abidadama, gaukara goada totona idia ia hasiahua lalokau, bona nega aukadia lalonai idia hahedinaraia haheauka. (1 Tes. 1:​2-8; 2 Tes. 1:​3-5) Unai amo emu tadikaka do idia diba idia oi laloa bada bona edia mauri oi lalo-pararalaia, bena edia lalona ia namo bona oi henia hagoadaia herevadia idia ura abia dae.

“Mai Oiemu Haheauka Danu.” Hagoadaia herevadia be “mai oiemu haheauka danu” oi henia be namo. (2 Tim. 4:2) Unai ena anina be dahaka? Haheauka be dika ta eiava habadua karana ta lalonai gini goada karana. Ia haheauka tauna ia laloa kamonai taudia ese ena hereva do idia badinaia. Unai dala ai hagoadaia herevadia oi henia neganai, kamonai taudia idia laloa lasi oi ese idia oi lalo-dika henia. Bema oi abia dae momokani emu tadikaka bona taihu idia ura bada Iehova idia hesiai henia goadagoada, do idia ura bada kara maoro idia karaia.​—Heb. 6:9.

“Hadibaia Hereva Namodia Dekena Amo.” Edena dala ai elda tauna ese haida “do ia hagoadaia, hadibaia hereva namodia dekena amo”? “Hereva momokani, ita abidadama henia bona ita hadibaia gauna, do ia badinaia momokani” karana amo. (Tito 1:9) Oi sibona emu lalohadai oi gwauraia lasi, to Dirava ena Hereva ese emu hagoadaia herevadia dekenai siahu ia henia be namo. Namona be do oi gwauraia herevadia oi laloa neganai, Baibel ese oi ia hakaua. Oi herevalaia gauna dekenai Baibel ena hereva idia badinaia karana ena namo oi hahedinaraia. Dirava ena Hereva badinaia lasi karana ena anina dikadia​—hari bona vaira negana ai​—oi laloa, bona unai oi gaukaralaia amo kamonai taudia dekenai oi hahedinaraia kara ta idia karaia be gau badana.

Namona be kamonai taudia dekenai oi hahedinaraia goevagoeva dahaka idia karaia bona dahaka dainai unai idia karaia be namo. Oi hahedinaraia goevagoeva oi herevalaia gaudia be Baibel ena hereva ida idia hegeregere momokani. Bema Baibel ese ia hahedinaraia gau ta idia abia hidi neganai dala tamona lasi to haida idia noho, unai oi hahedinaraia goevagoeva. Bena, hereva dokona lalonai, kamonai taudia oi hagoadaia namonamo, edia lalona do idia hadaia kara ta do idia karaia totona.

‘Oi Hereva Goadagoada Diba.’ Ta ese ma haida ia hagoadaia namonamo totona, ‘ladana namo dainai ia hereva goadagoada diba’ be namo. (1 Tim. 3:13) Dahaka dainai ta ia hereva goadagoada diba? Unai ia karaia diba bema ia karaia “kara namodia” be iena tadikaka ia hagoadaia do idia karaia karadia ida idia hegeregere. (Tito 2:​6, 7; 1 Pet. 5:3) Bema unai bamona ia vara, ia hagoadaia taudia do idia itaia, hagoadaia tauna ia ura lasi idia be kara ta do idia karaia ena be ia ese unai kara ia karaia lasi. Do idia itaia idia ese ena abidadama idia tohotohoa diba, ia ese Keriso ia tohotohoa bamona.​—1 Kor. 11:1; Fili. 3:17.

Dirava ena Hereva amo bona mai lalokau ida ma haida oi hagoadaia karana amo namo bada oi havaraia diba. Namona be ma haida hagoadaia ena maduna idia abia taudia ese unai idia karaia namonamo.​—Roma 12:8.