Iesu ese Saulo Ia Abia Hidi

Saulo be Roma ena sitisen, ena vara gabuna be Tarasisi. Ia be Farisea tauna, Iuda Taravatu ia diba namonamo, bona Keristani taudia ia inai henia. Keristani tatau bona hahine be edia ruma ai ia veridia raka-lasi bona dibura ruma dekenai ia atodia. Danu hutuma ese mai badu ida nadi amo Stefano idia hodoa mase lalonai ia gini bona ia itaia.

To Saulo be Ierusalema ai idia noho Keristani taudia sibona ia hadiburaia lasi. Danu hahelaga taudia ia noia Damaseko dekenai ia idia siaia totona, unai amo siti ai idia noho Keristani taudia do ia tahua. Saulo be siti kahirakahira ia lao noho lalonai, diari ta ese ia hagegea, bona tano dekenai ia moru. Gadona ta ia kamonai, ia gwau: ‘Saulo e, dahaka dainai lau oi dagedage henia noho?’ Saulo ia henanadai: ‘Oi be daika?’ Ia haere: ‘Lau be Iesu. Damaseko dekenai oi lao, bona do oi karaia gauna do oi dibaia.’ Maoromaoro Saulo be ia matakepulu, bona ena imana idia dogoatao bona siti dekenai idia hakaua lao.

Damaseko ai, abidadama Keristani tauna Anania ia noho. Iesu ese matahanai amo ia hamaoroa: ‘Dala ladana Maoromaoro dekenai oi lao bona Saulo oi tahua.’ Anania ia gwau: ‘Lohiabada e, unai tauna ena sivarai lau diba! Ia ese emu hahediba taudia be dibura ai ia atodia noho!’ To Iesu ia gwau: ‘Oi lao. Badina Saulo lau abia hidi bese idauidau dekenai sivarai namona ia harorolaia totona.’

Unai dainai Anania ese Saulo ia davaria bona ia hamaoroa: ‘Egu tadikaka Saulo e, Iesu ese lau ia siaia emu matana kehoa totona.’ Maoromaoro, Saulo ia itaia lou diba. Iesu ena sivarai ia dibaia bona ena hahediba tauna ai ia lao. Hari Saulo be bapatiso ia abia Keristani tauna, bona sinagoga ai ena Keristani tadikaka ida ia haroro matamaia. Iuda taudia mani oi laloa, idia itaia Saulo ese Iesu ena sivarai ia hadibaia neganai idia hoa. Idia gwau: ‘Inai tauna sibona ese Iesu ena hahediba taudia ia dagedage henia, ani?’

Lagani toi lalonai, Saulo be Damaseko ai idia noho taudia ia haroro henidia. Iuda taudia be Saulo idia inai henia bona ia hamasea totona palani idia karaia. To tadikaka ese unai palani idia dibaia bona Saulo durua totona bosea lalonai ia idia udaia. Bona siti ena haba ai matu amo idia hadihoa.

Saulo be Ierusalema dekenai ia lao neganai, ia ura tadikaka do ia bamoa. To idia be ia dekenai idia gari. Bena Banaba ese ia hebogahisi henia bona aposetolo taudia dekenai ia abia lao bona ia hamaorodia ena mauri ia haidaua vadaeni. Saulo be Ierusalema kongrigeisen ida sivarai namona ia harorolaia goadagoada matamaia. Gabeai, ena ladana idia gwauraia Paulo.