Iesu ena Mauri bona Gaukara

Ena Aposetolo Ia Abidia Hidi

IOANE Bapatiso ese Iesu na Dirava ena Mamoe Natuna ia gwauraia bona Iesu ese ena haroro gaukara ia hamatamaia neganai, Andrea, Simona Petro, Ioane, bona reana Iakobo (Ioane ena kakana), bona Filipo bona Natanael (iena ladana ta be Batolomeo) be iena hahediba taudia ginigunadia ai idia lao. Gabeai ma haida danu be idia ida Keriso murinai idia raka.

Bena lagani ta mai kahana ia ore murinai, Iesu ese ena aposetolo ia abidia hidi, ia do idia bamoa hanaihanai bona ia ese do ia hadibadia namonamo. Iesu be ororo dekenai ia daekau guna hanuaboi ibounai ia guriguri, reana ia ese Dirava ia noia do ia ha-aonegaia bona do ia hanamoa. Daba ia rere neganai, ena hahediba taudia ia boiridia bona aposetolo 12 ia abidia hidi. To unai murinai Iesu ese ia hadibadia noho dainai, hahediba taudia ia gwauraidia noho.

Ia abidia hidi taudia 6 be ena hahediba taudia ginigunadia, edia ladadia be ataiai ai gwauraia. Mataio, Iesu ese ena takisi opesi amo ia boiria tauna, danu ia abia hidi. Ia abidia hidi taudia oredia 5 be inai: Iuda (iena ladana ma ta be Tadeo), Iuda Isakariote, Simona Kana tauna, Toma, bona Iakobo Alfeo. Hari Iakobo ena ladana idia hatoa Iakobo maragina danu.

Hari tatau 12 be nega daudau Iesu idia bamoa vadaeni, bona idia ia diba namonamo. Iakobo bona iena tadina Ioane bona reana Iakobo Alfeo danu be Iesu ena varavara.

Iesu ena aposetolo edia ladana oi laloatao a? Mani inai oi laloa: rua edia ladana be Simona, rua edia ladana be Iakobo, bona rua edia ladana be Iuda, bona Simona be mai ena tadina Andrea bona Iakobo be mai ena tadina Ioane. Unai dala amo aposetolo 8 do oi lalodiatao diba. Oredia 4 be inai: takisi gogoa tauna (Mataio), gabeai ia daradara tauna (Toma), Iesu ese au ta henuna amo ia boiria tauna (Natanael), bona iena turana Filipo.

Aposetolo 11 be Galilea amo, Iesu danu be unai gabu amo ia mai. Natanael be Kana amo. Filipo, Petro, bona Andrea be Betesaida amo. To gabeai Petro bona Andrea idia lao Kaperanaum, Mataio ena hanua unai. Iakobo bona Ioane be haoda taudia, bona reana idia be Kaperanaum dekenai idia noho. Iuda Iskariote, gabeai Iesu ia hadikaia tauna, sibona be Iuda amo. Mareko 3:​13-19; Luke 6:​12-16.

◆ Edena aposetolo be Iesu ena varavara reana?

◆ Daika daika be Iesu ena aposetolo, bona edia ladana be edena bamona oi laloatao diba?

◆ Aposetolo be edena gabu idauidau amo idia mai?

[Picture on page 9]

Ena aposetolo 12 ia abidia hidi gwauraia neganai, Iesu be hanuaboi ai ia guriguri ela bona daba ia rere