“Unai Hahine Iesebel”

“INAI gauna dekenai oi be oi kerere. Oi ese unai hahine, ladana Iesebel, ena kara dika oi koua lasi. Ia ese sibona ia gwauraia peroveta hahine. Lauegu hesiai taudia ia hadibaia kerere bona idia ia hakaua kerere, vadaeni matabodaga [kara] idia karaia, bona kaivakuku dekenai henia vamuna idia ania.” (Apokalupo 2:20) Iesu be unai bamona ia hereva Tuatira ena Keristen elda taudia dekenai. Unai kongregesen idia gaukara goadagoada, bona lalokau, abidadama, bona haheauka idia hahedinaraia. To Iesebel bamona kara ese haida ia hakereredia neganai unai kongregesen ese ia koua lasi. Badina be dahaka? Bona hari inai negai, unai bamona kara ia vara diba, a?​—Apokalupo 2:19.

Reana, Tuatira dekenai hahine ta, ladana Iesebel, ia noho momokani lasi. Iesu ese unai ladana ia gaukaralaia ita be gunaguna ia noho Pavapava Hahine Iesebel, Pavapava Ahaba ena hahine, ena kara ita laloa totona. Unai lalo-auka hahinena ese Dirava ena taunimanima ia hakereredia momokani. Ia ese Israel taudia dekenai Baal tomadiho karana ia hadibaia, bona ia be mai ena ura bada danu, tomadiho goevana ia haorea toho.​—1 Hanua Pavapavadia 16:​31-33; 21:​1-7.

Tuatira dekenai ia noho Iesebel​—reana hahine tamona eiava hahine edia orea ta​—ese Dirava ena taunimanima ia hagoadaia sihari kava bona kaivakuku tomadiho henia karana idia karaia totona. Kongregesen lalonai, haida ese idia kamonai henia, badina Iesu ese ‘ena natudia,’ reana ena murinai idia raka taudia unai, ia herevalaidia. (Apokalupo 2:​22, 23) Iena siahu ese Tuatira kongregesen ia hadikaia toho, Ahaba ena negai Israel taudia idia dika hegeregerena.

Badina be dahaka Tuatira dekenai ia noho Iesebel be mai ena siahu bada? Gunaguna ia noho Iesebel danu idia hahegeregerea dainai, haida idia laloa ia be Tuatira ena gunalaia tauna ena hahine. To, Bible be unai bamona ia hereva lasi. Sedira, iena kara goadana dainai, bona ia gwau ia be peroveta hahine dainai, kongregesen lalonai, iena ladana be bada.

Haida idia gwau iena kara kerere be gaukara biagua orea haida dekenai ia hanaia. Doketa W. M. Ramsay ia gwau, “Tuatira dekenai gaukara biagua orea momo herea idia noho, to Asia ena hanua ma haida dekenai idia be momo lasi.” The Interpreter’s Dictionary of the Bible ia gwau: “Unai orea ta ta iboudiai be mai edia dirava ta, mai edia aria negadia, mai edia moale dinadia, bona unuseniai nega haida idia sihari kava bona idia lebulebu. Reana ‘Iesebel’ ia gwau . . . namo lasi unai negadia idia gwauraia dika badina gaukara taudia iboudiai be moni idia abia totona gaukara biagua oreana dekenai idia vareai be gau badana.” The Expositor’s Greek Testament bukana be unai bamona ia hereva danu, ia gwau Iesebel murinai idia raka taudia “idia laloa idia lalo-parara dainai, taunimanima edia ura karadia idia koua momo lasi.”

Iesebel ena hadibaia hereva Tuatira dekenai be Peregamo dekenai ia noho “Balama ena hadibaia hereva” bamona. (Apokalupo 2:14) Peregamo kongregesen ese dagedage bada ia haheaukalaia, to haida be Balama ena kara idia tohotohoa dainai, idia be heudahanai bona kaivakuku tomadiho henia karana idia habadaia. Haida idia gwau Peregamo dekenai, Balama ena siahu dainai, haida be edia abidadama idia negea dagedage bada idia dekenai ia mai garina, bona Tuatira dekenai edia noho moni dalana dekenai idia hegeregere totona Iesebel ese abidadama negea karana ia habadaia. To, herevana edena hereva be maoro, unai hadibaia herevadia rua be hereva momokani dadaraia karana, bona mase idia havaraia.

Hari inai negai, Iesebel​—eiava Balama​—bamona siahu ia noho diba, a? Oibe, ia noho diba. Kerisendom ena gunalaia taudia momo be Iesebel ena kara idia tohotohoa, badina edia kongregesen lalodiai, tatau be tatau danu idia mahuta hebou karana, sihari kava, heudahanai, bogana dekenai natudia hamasea karana, bona Dirava ese ia gwauraia dika karadia idia koua lasi. Keristen kongregesen lalonai danu, tomadiho momokani dekenai, taunimanima haida be “idia laloa idia lalo-parara dainai, taunimanima edia kara idia koua momo lasi be namo.” Idia ese Keristen taudia idia hagoadaia Bible ena taravatu idia badinaia momokani lasi totona, bona sihari kava karana idia habadaia danu.

Idia ura Iehova idia hamoalea taudia iboudiai ese unai bamona lalohadai idia dadaraia be namo, ena be taunimanima​—tatau eiava hahine​—be mai kara goadana danu idia veria toho. Aposetolo taudia edia negai hegeregerena, unai bamona lalohadai ese mase ia havaraia.​—Apokalupo 2:​22, 23.