Oi be Inai Gaudia ta Bamona, A?

‘DINA tamona ai leona ai oi lao be namo, lagani handred ai mamoe ai oi lao be dika.’ Taunimanima idia gwau Benito Mussolini, Italy ena biaguna gunana ta, ese unai hereva ia gwauraia.

Mussolini bamona, taunimanima momo idia ura lasi haida ese idia be mamoe natudia eiava mamoe bamona idia gwauraidia. To, idau negai Israel dekenai, salamo torea pavapava tauna David ia gwau: “Iehova be egu Mamoe Naria Tauna. . . . Ranu momo gabudia dekenai lau ia hakaua.” (Salamo 23:​1, 2) Oibe, Iehova Dirava be Mamoe Naria Tauna Badana, ena taunimanima be mai hebogahisi danu ia naridia, idia be dika havaraia lasi mamoedia bamona.

Salamo 95:7 ai, haheitalai dekenai Dirava ena taunimanima ia gwauraidia mamoe, unai siri ia gwau: “Badina [Iehova] be iseda Dirava, bona ita be ia ena tano ai ita aniani taudia bona ena imana ena mamoe.” Reana haida idia laloa namona be salamo torea tauna ia gwau “ena tano ai ita aniani mamoedia” bona “ena imana ena taunimanima.” To unai bamona ia hereva lasi, ia gwau Iehova ena taunimanima be iena mamoe. Dirava ese idia ia henia aniani gabuna idia moalelaia bona iena lalokau imana ese idia ia hakaua.

Iehova ena Natuna, Iesu Keriso, be Mamoe Naria Tauna Namona. Nega momo taunimanima ia gwauraidia mamoe. Hegeregere, Iesu ese “orea maragi” bona “mamoe idaudia” ia gwauraidia. (Luka 12:32; Ioane 10:​14-16) Iena mamoe bamona hahediba taudia ia gwauraidia neganai, Iesu ia gwau: “Egu mamoe ese lauegu gadona idia kamonai, lau diba vadaeni idia, bona idia ese lauegu murina dekenai idia raka. Mauri hanaihanai danu lau henia idia dekenai, idia be do idia mase lasi, lasi bona lasi momokani. Bona tau ta ese lauegu imana dekena amo idia do ia kokia lasi.” (Ioane 10:​27, 28) Lohia tauna namona henunai idia noho neganai, taunimanima be iena siahu, lalo-namo, hakaua, bona naria dalana amo namo do idia davaria diba.​—Apokalupo 1:​16, 20; 2:1.

Tau ta lasi ese mamoe bamona taudia be Iesu ena naria imana amo ia kokidia diba. Hari inai negai, ia ese taunimanima ia hapararaia. Unai orea rua be ia lalo-namo henia lasi “nanigosi” taudia bona Dirava ena guba Basileia lohia siahuna henunai mauri hanaihanai do idia abia “mamoe” taudia. (Mataio 25:​31-46) Oi be hahenamo abia mamoe bamona tauna ta, a?

[Picture Credit Line on page 32]

Garo Nalbandian