Au ta Bamona

ANE torea tauna ta ladana Joyce Kilmer be ena ane ta ai ia gwau, taunimanima ese ane idia torea diba, to Dirava mo sibona ese au ia karaia diba.

Iehova Dirava ese au idauidau mai toadia idauidau bona mai namodia idauidau ia karadia. Au kwadogidia bona au latadia danu be mai edia hairai bada. Aniani, lahi au, bona ruma karalaia gaudia be au amo ita abidia. Bona diba taudia ese gau matamatadia idauidau be au amo idia karadia.

Baibel lalonai, idia ese au amo basileia, lohia, bona taunimanima ta ta idia laulaulaidia. (Esekiel 31:​1-18; Daniel 4:​10-26) Bona Iehova ena lohia siahuna bona iena bese taudia hanamodia lou karadia dainai idia vara moalena, mainona, bona anina namona idia gwauraidia negadiai, au danu idia gwauraidia. (1 Sisiga 16:33; Isaia 55:12; Esekiel 34:27; 36:30) Buka Helaga be ma ia gwau Dirava ena bese taudia edia mauri dinadia do idia momo, au ena mauri dinadia hegeregeredia. (Isaia 65:22) Unai be mai anina bada, badina be au haida be lagani handred handred idia mauri noho.

Salamo torea tauna ta ia gwau, Dirava ena taravatu ia moalelaia tauna be “sinavai isena ai idia hadoa auna bamona: ena huahua negana ai ena anina do ia atoa, ena rauna danu do idia marai lasi, ia karaia gaudia iboudiai edia anina do idia vara goevagoeva.” Unai bamona auna ia itaia neganai, salamo tauna ese ‘Iehova ena taravatu ia moalelaia’ tauna be lauma dalana ai ia tubutubu dalana ia laloa. (Salamo 1:​1-3) Dirava ena taravatu bona ena Hereva Helagana bema oi moalelaia momokani, emu mauri dinadia be au ta ena mauri dinadia hegeregeredia ai do idia lao. Bema Iehova Dirava bona Iesu Keriso oi dibadia maoromaoro bona unai diba hegeregerena bema oi karaia, mauri hanaihanai do oi laroa diba.​—Ioane 17:3.