Dirava Ena Ladana

“Iehova ese ruma bema ia haginia lasi neganai, idia haginia taudia idia hekwarahi kava.” Unai be Latin ena toretore ta. Unai hereva be Baibel ena Salamo 127:1 amo idia abia, bona unai hereva be idia momokani: Idia karaia gauna bema Iehova ia hanamoa lasi, idia hekwarahi kava.

Unai toretore, lagani 1780 ai idia atoa, be Colombo, Sri Lanka, ena ruma ta dekenai ia noho, to gau namona be ia lalonai Dirava ena ladana, Iehova, idia torea. (Laulau itaia.) Idaunegai taunimanima momo ese unai ladana idia gaukaralaia. Unai ladana be nega momo bisinesi rumadia, dubu, bona moni dekenai idia atoa. Misinari taudia be idau tanodia dekenai Baibel idia laohaia neganai, Dirava ena ladana idia gaukaralaia, sedira unai dainai Sri Lanka ena ruma ta dekenai unai toretore ia noho.

Hari inai negai be unai bamona lasi! Sibodia idia gwauraia Keristen taudia haida sibona ese unai ladana idia laloa bada. Iehova ena Witness taudia ese unai ladana idia gwauraia bada dainai, sikuli bada taudia haida idia gwau unai be maoro lasi. Dahaka dainai? Haida idia gwau, unai ladana ena Heberu regena korikori ia boio dainai ta ese ia gwauraia maoro diba lasi. To, taunimanima hida ese Iesu ena ladana Heberu gado ai idia gwauraia maoro diba? Herevana dahaka, to tanobada ibounai lalonai iena ladana idia gwauraia bona idia matauraia.

Iesu dekenai, Dirava ena ladana be gau badana. Ita ia hadibaia inai bamona ita guriguri totona: “Oiemu ladana do ai hahelagaia.” (Mataio 6:9) Bona ena mase negana ia kahirakahira neganai, Dirava dekenai ia gwau: “Tanobada dekenai oi henia lau dekenai taudia be oiemu ladana lau hadibaia vadaeni idia dekenai.” (Ioane 17:6) Keristen momokani taudia be Iesu aena gabudia dekenai idia raka. Unai dainai namona be idia ese ‘Dirava ena ladana idia gwauraia hedinarai’ danu, ani? Iehova ena Witness taudia be unai bamona idia karaia, bona Iehova ese edia “ruma” ia hanamoa bada. Idia dekenai salamo ena hereva be ia momokani, ia gwau: “Edia Dirava be Iehova taudia idia moale!”​—Salamo 144:15.