Oi Abidadama Noho Bena Do Oi Mauri!
“IEHOVA oi gwau henia bena oi mase!” Iseda magasin vairana ena laulau ese Iobu ena adavana ia hahedinaraia; ia ese unai hereva aukana ia gwauraia. Unai be lagani 3,600 bamona idia ore vadaeni lalonai ia vara. To, unai hereva aukana Dirava ena abidadama hesiai tauna dekenai ese ia hahedinaraia unai nega amo ema bona hari taunimanima vairanai hepapahuahu ta ia noho. Abidadama tauna Iobu dekenai kara dika bada ia vara—iena boromakau, iena ruma bona ena natudia 10 ia haboiodia. Bona hari iena tauanina dekenai gorere dikana mai hisihisina ta ia abia, unai ese iena haheauka ia tohoa bada. Dahaka dainai unai ia vara? Badina Satana Diabolo, Dirava bona taunimanima edia inai tauna badana, ia ura ia hahedinaraia taunimanima ese Dirava do idia badinaia lasi hetoho bada idia davaria neganai.—Iobu 1:11, 12; 2:4, 5, 9, 10.
Iobu ena nega lalonai bamona, hari inai negai danu “Satani [Diabolo] ese tanobada taudia ibounai ia gunalaia noho.” (1 Ioane 5:19) Oibe, hari inai negai ia momokani vaitani, badina ‘iena ladana be Diabolo bona Satana, ia be tanobada taudia ibounai ia koia noho’ bona guba amo idia negea diho tanobada dekenai. (Apokalupo 12:9) Hari inai nega lalonai taunimanima ese hekwakwanai badadia momo idia davaria ena badina be unai. Lagani 1914 lalonai, tanobada ibounai tuarina ginigunana ia vara neganai, unai be “hisihisi nega ena hamatamaia sibona” bona unai nega amo ema bona hari iseda nega lalonai hisihisi idia vara noho.—Mataio 24:7, 8.
Inai tanobada be hisihisi bona kara dika amo ia honu dainai, oi laloa do oi haheauka noho diba lasi, a? Reana nega haida oi laloa, ‘Mauri be mai ena badina, a?’ Sedira Iobu ena mamina be unai bamona to iena abidadama Dirava dekenai ia haboioa lasi, ena be nega haida ia kerere. Iena goada be inai hereva amo ia hahedinaraia: “Harihari ela bona do lau mase, egu abidadama do lau negea lasi!” Iobu ia diba momokani ‘Dirava ese iena abidadama karana do ia itaia.’—Iobu 27:5; 31:6.
Iesu Keriso, Dirava ena Natuna momokanina, be tanobada dekenai ia noho neganai hetoho momo ia haheaukalaidia danu. Satana ese Iesu ia tohoa dala idauidau ai. Ororo dekenai, Satana ese Iesu ia tohoa tauanina dalanai bona Iena abidadama Dirava ena Hereva dekenai danu ia tohoa. (Mataio 4:1-11) Satana ese hereva momokani idia negea taravatu hadibaia taudia, Farisea taudia bona edia hereva koikoi idia kamonai henia taudia ia gaukaralaidia Iesu idia tohoa totona. Idia dagedage henia, idia gwau ia ese Dirava ia hadikaia, bona hehuni dalanai idia gwaubou Iesu idia hamasea totona. (Luka 5:21; Ioane 5:16-18; 10:36-39; 11:57) Idia ese Iesu idia kara dika henia bada herea. Edia kara dika be Iobu idia durua koikoi taudia toi edia kara dika ia hanaia.—Iobu 16:2; 19:1, 2.
Getesemane umana lalonai, Iesu be kahirakahira ena hetoho badana do ia abia neganai, iena hahediba taudia ia hamaorodia, ia gwau: “Egu lalona ia hisihisi bada, kahirakahira lau mase.” Bena, “tano dekenai ena vairana ia atoa diho, ia guriguri, ia gwau, ‘Egu Tamana e, bema mai dala, inai kapusi lau dekena amo do oi kokia. To lauegu ura lasi, oiemu ura sibona.’ ” Bena satauro ai Iesu ese Salamo 22:1 ena peroveta herevana ia hamomokania, ia taitai ia gwau: “Egu Dirava e, Egu Dirava e, dahaka dainai lau oi rakatania?” To, Dirava ese Iesu ia rakatania lasi. Badina Iesu ese Dirava ia abidadama henia goevagoeva, bona haheitalai namona ia hahedinaraia Keristen momokanidia ese idia tohotohoa totona. Iehova ese ia hanamoa; Iesu ena abidadama noho karana dainai, ia hatorea isi lou bona guba dekenai ladana bada ia henia. (Mataio 26:38, 39; 27:46; Kara 2:32-36; 5:30; 1 Petero 2:21) Dirava ese ia dekenai idia abidadama noho taudia ibounai be unai bamona do ia kara namo henidia.
Iesu ena abidadama karana ese Satana ena hepapahuahu herevana ia haerelaia goevagoeva sibona lasi, to iena mauri goevadaena ia bouboulaia dainai mauri davana korikorina ia henia. Unai dala amo idia abidadama noho taudia ese mauri hanaihanai idia abia diba. (Mataio 20:28) Gau ginigunana be, Iesu ese horoa “orea maragi” taudia ia gogodia, idia be ia danu guba Basileiana lalonai do idia lohia. (Luka 12:32) Unai murinai, “hutuma bada” taudia ia gogodia. Idia be ‘hisihisi badana’ amo do idia roho mauri bona mauri hanaihanai tanobada dekenai do idia abia Dirava ena Basileia henunai.—Apokalupo 7:9, 14-17.
Abidadama tauna Iobu be maino “tanobada matamata” lalonai do idia toreisi lou taudia bilion momo ta. (2 Petero 3:13; Ioane 5:28, 29) Iseda magasin ena murina laulau ia hahedinaraia bamona, Iehova ese abidadama tauna Iobu ia hanamoa. Iehova “ese Iobu ena dina gabedia maurina ia hanamoa bada herea, to matamana ai ia hanamoa maragi.” Lauma dalana ai ia goada dainai “ena uduna bibinadia amo ia hereva kerere lasi.” Dirava ese ma lagani 140 amo Iobu ena mauri laganidia ia habadaia. Tauanina dalanai, Dirava ese Iobu ena kohu ibounai ia henia giroa bona nega rua ai ia habadaia. Iobu “ese natuna memero 7 bona natuna kekeni toi ia havaradia” bona unai tano ibounai lalonai iena natudia kekeni be hairai momokani. (Iobu 2:10; 42:12-17) To unai hahenamo be gabeai abidadama taudia ese “tanobada matamata” lalonai do idia abia hahenamodia ia laulaulaia. Murina rau lalodiai idia hahedinaraia oi ese unai hahenamo oi abia diba danu!
[Picture on page 4]
Iesu ese abidadama karana ia haheitalaia goevagoeva