Basileia Haroro Ripoti
Iehova Ena Goada ese Ena Inai Taudia Edia Goada Ia Hanaia
DIABOLO bona ena demoni be nega daudau lalonai tomadiho koikoi bona babalau karadia amo sivarai namona harorolaia gaukarana idia koua tohoa. Baibel ese Satana ena ura dikana ia hahedinaraia 2 Korinto 4:4 dekenai, ia gwau, “inai tanobada ena dirava ese edia lalona ia hadiburaia. Vadaeni Keriso ena hairaina bona iena Sivarai Namona ena diari idia itaia diba lasi.”
To Iehova Dirava ena goada ese Satana ena goada ia hanaia. Iehova ena inai taudia ese gau ta idia karaia diba lasi iena ura idia koua totona. Ena ura be “taunimanima ibounai ese mauri do idia davaria, bona hereva momokani do idia diba.” (1 Timoteo 2:4) Australia amo idia mai Basileia haroro ripoti ese unai idia hahedinaraia.
◻Hahine ta be lagani 20 bamona ia ura lasi tomadiho ta dekenai ia vareai, bena gabeai Baibel ia duahia hamatamaia lou. Baibel ia laloa bada lou dainai ia be mai ena henanadai momo, bona Dirava ia guriguri henia heduru ia abia haere ia davaria totona. Ia ura hereva momokani ia tahua, to ia diba bema ia giroa lou ena tomadiho gunana dekenai ena hekwakwanai do ia hanamoa lasi. Unai dainai, ia lao buka gunadia idia hoihoilaia sitoa ta dekenai bona tomadiho bukadia totona ia henanadai.
Sitoa biaguna ia laloatao ia be mai ena tomadiho buka ta, sitoa dekenai lasi, to ruma dekenai. Unai buka be Iehova ena Witness taudia ese idia halasia bona ena ladana be Mauri Hanaihanai Paradaiso Lalonai. Unai hahine ese unai buka ia duahia bona ena henanadai momo edia haere ia davaridia. Telefon buka lalonai Iehova ena Witness taudia edia namba ia tahua bona ia davaria murinai, ia hereva henidia bena nega ibounai Baibel stadilaia karana ia matamaia.
◻Hahine matamata ta ese niuspepa ta ia gaukaralaia ena lauma dikadia lulua gauna hoihoilaia herevana idia halasia totona. Ena hereva ese unai gauna ia gwauraia, ‘guna momokani lauma dikadia lulua gauna mai ena siahu bada herea.’ Iehova ena Witness hahine ta ese unai hoihoi herevana ia itaia. Hoihoi herevana dekenai ia noho telefon namba ia gaukaralaia unai hahine ia rini henia bena unai lauma dikadia lulua gauna ena siahu be edeseni amo ia mai idia kikilaia. Idia ese Baibel ena lalohadai demoni edia gaukara dekenai idia herevalaia. Unai hahine matamatana mai ena lauma dikadia lulua gauna ia gwau, demoni amo hekwakwanai ia davaria dainai vanegai sibona Dirava ia guriguri henia ia durua totona. Witness hahine ese ma nega ta ia hegaegaelaia telefon dekenai do idia herevahereva lou totona.
Ia rini henia lou neganai, unai hahine matamatana ia noho lasi ruma dekenai. To iena sinana ese telefon ia abia isi bena ia gwau: “Lau diba lasi dahaka oi hereva lauegu natuna hahine dekenai to ia vara gauna be hoa gauna momokani!” Bena ia hamaoroa ia gwau nega ginigunana ai ia rini henia murinai, iena natuna kekeni ese Satana ena kara idia hahedinaraia laulau bona buka iboudiai ia negedia bona Baibel ia duahia matamaia.
Unai murinai, Witness hahine ese nega ia hegaegaelaia unai hahine matamatana ia vadivadi henia totona. Iehova ena Witness taudia ida Baibel stadilaia karana ia abia dae haraga. Bona Keristen hebou dekenai ia lao, bona Witness taudia ida ia hebamo matamaia. Oibe, Iehova ese Baibel amo diba bona hereva momokanidia ia hahedinaraidia dainai demoni ia halusidia lou.