Ia Maragi to mai Ena Siahu

ROBERT, Canada tauhauna ta, be Europe ena tano dekenai ia loaloa iena mauri ena anina ia tahua totona. Ia itaia gau idauidau momo dainai ia lalohisihisi, ia laloa dina vaira totona helaro be lasi.

Seville, Spain dekenai, aniani gabuna ta dekenai ia helai neganai, ta ese Iehova ena Witness taudia idia halasia pepapepana ta ia henia. Robert ia gwau lau abia neganai lau laloa bada lasi, “to lau duahia.” Ma ia gwau: “Bena lau lalo-parara unai. Egu loaloa lalonai, taunimanima edia lalohisihisi bona moru daladia idauidau lau itaia, bona lau lalohisihisi badina unai kara lau haidaua diba lasi. Unai pepapepa lau duahia murinai, inai bamona lau laloa, ‘Unai “tanobada matamatana” do ia vara diba, a?’ Bena murinai inai bamona lau laloa, ‘Oibe, reana do ia vara diba.’ ”

Mai ena helaro matamatana danu, Robert be Iehova ena Witness taudia edia opesi Canada dekenai ia tore henia, bona ia gwau hanua dekenai do ia giroa lou neganai, ia ura ta ese do ia vadivadi henia bona ia durua Baibel ena hereva do ia lalo-pararalaia totona.

Momokani, uduna amo ia mai herevana be mai ena siahu bada. To, hereva idia printaia be mai ena siahu danu. Herevana idia maragi eiava, to Baibel idia herevalaia bukadia ese taunimanima edia lalona idia veria diba. Unai hereva ese taunimanima edia lalona bona kudouna idia hamareredia, bona dina vaira totona helaro momokani ia henidia.​—Heberu 4:12.