Basileia Haroro Ripoti

Dirava Ena Orea Taudia ese Sibodia Idia Henia mai Edia Ura Ida

TAU ena ladana be Iosepa, ia be Kupro motumotu tauna. Keristani taudia ginigunadia haida hegeregeredia, ia ese ena tano bona ena ruma ia hoia, ena davana monina do ia henia, Keristani tomadihona durua totona. Iena hebogahisi bona hariharibada dainai, ena ladana idia hatoa Banaba, anina be “Goada henia tauna.”​—Kara 4:​34-37.

Nega ibounai mai momokani ida taunimanima edia namo tahua karana unai bamona, be Iehova tomadiho henia taudia korikoridia edia toana. Hari inai negai Iehova ena Witness taudia edia kara be idau lasi. Henuai ia noho sivaraina Solomon Islands amo ese unai ia hahedinaraia.

Witness taudia 60 mai kahana be Australia bona New Zealand amo idia mai Honiara, Solomon Islands ena taoni badana, Guadalcanal motumotuna ai, Assembly Hall ta haginia gaukarana durua totona. Unai ruma be Keristani taudia edia hebouhebou badadia totona. Unai ruma, taunimanima 1,200 be ia lalonai idia hebou diba rumana, be pura rua bamona mo lalonai idia haginia!

Unai neganai, Munda, New Georgia motumotuna ai, ena gavamani taudia ese tano ta unai taoni maragina bogaraginai be Iehova ena Witness taudia edia kongregesen idia henia. Idia ura Kingdom Hall ta, tomadiho rumana unai, do idia haginia. Ta idia haginia be namo, badina be unai neganai tau ta ena biri rumana maragina ena daiutu ta lalonai idia hebou loulou.a Madi, idia be moni lasi Kingdom Hall ta do idia haginia totona. Kongregesen taudia momo be buruka bona goada lasi taudia bona memero kekeni; ruma haginia gaukarana ia diba momo tauna ta be lasi.

Munda bona ma motumotu ta, Guadalcanal, edia padana ena daudau be kilomita 380 bamona. Witness taudia, unai motumotu ena taoni badana Honiara ai idia noho, ese sibodia idia henia mai edia ura ida. (Salamo 110:3) Idia laloa: “Iseda tadikaka tano ma haida amo bema edia lalona be hegeregere Assembly Hall ta be pura rua lalonai do idia haginia ita eda, namona be ita ese iseda tadikaka Munda ai do ita durua bona pura rua lalonai Kingdom Hall ta do ita haginia, edia.”

Vadaeni unai bamona idia karaia. Dina ta kada ta be Munda ai ia ginidae. Ia lalonai be moale Witness taudia momo, idia be sibodia idia henia mai edia ura ida do idia heduru. Idia iboudiai, tatau bona hahine, burukadia bona matamatadia, idia gaukara goada, edia kohu be kada amo idia kokia, bena idia hegaegae ruma do idia haginia totona. Ruma ena kohu​—au, semenisi, bona auri​—be Munda ai ia ginidae guna, gaukara taudia be gabeai.

Madi, gaukara idia hamatamaia negana sisina murinai, lai-gubana ese taoni ena ranu heau dalana ia koua. To unai hekwakwanai idia hanaia. Ranu gurina ta idia geia, bena ruma haginia negana ibounai lalonai unai guri amo ranu idia utua. Gaukara taudia edia aniani be edena bamona? Unai danu idia hekwarahilaia lasi, badina be Honiara ena kongregesen taudia ese aniani idia siaia, gaukara taudia edia. Kuki taudia danu idia siaia!

Unai gabu kahirakahira dekenai idia noho taudia ese unai ruma haginia gaukarana idia hoalaia bada. Ta ia gwau: “Iniseniai taunimanima ese gaukara badadia be dina haida lalodiai idia karaia ore lasi, to lagani haida lalodiai.” Ma ta, tomadiho gunalaia tauna, ia gwau ena dubu be lagani 20 lalodiai idia haginia noho bona idia do haorea lasi. To, Iehova ena Witness taudia edia Kingdom Hall matamatana Munda ai be dina 10 sibodia lalonai idia haginia ore!

[Footnotes]

[Map on page 24]

(For fully formatted text, see publication)

South Pacific Ocean

SOLOMON ISLANDS

Munda

GUADALCANAL

Honiara

[Map]

AUSTRALIA

NEW ZEALAND