“Taravatu Gunana” Eiava “Heberu Revarevadia”—Edena?
HARI inai negai Kerisendom taudia ese Baibel be Heberu/Aramia gadodia ai idia torea kahana idia gwauraia “Taravatu Gunana” bona Greek gado ai idia torea kahana idia gwauraia “Taravatu Matamatana.” To Baibel ena hereva ta dainai unai bamona idia gwauraidia be maoro eiava? Bona dahaka dainai Iehova ena Witness taudia be edia buka lalodiai unai ladadia idia gaukaralaia lasi?
Momokani, Baibel haida, hegeregere King James Version bona German Baibel ta ladana Septembertestament, Martin Luther ese ia torea guna gauna (1522), lalonai, toana be 2 Korinto 3:14 ena hereva ese unai kara ia durua. King James Version Baibel lalonai, unai siri ia gwau: “To edia laloa be idia koua: badina be taravatu gunana idia duahia negadia lalonai unai muko be ia do noho, ia mai bona hari, idia kokia lasi; unai muko be Keriso lalonai ia kokia.”
To, unai siri lalonai aposetolo ese buka 39, taunimanima momo ese idia gwauraidia “Taravatu Gunana” gaudia, ia herevalaia a? Unai siri lalonai, Greek gado herevana, di·a·theʹke, be Motu gado ai idia hahanaia neganai, “taravatu” idia torea. Germany ena ensaiklopidia bukana ladana Theologische Realenzyklopädie ese 2 Korinto 3:14 inai bamona ia gwauraia: Unai siri lalonai ia gwauraia karana, ‘di·a·theʹke gunana duahia karana,’ be siri gabena lalonai ia gwauraia karana, ‘Mose duahia karana,’ hegeregerena. Unai dainai, unai buka be ma ia gwau, ‘di·a·theʹke gunana’ ena anina be Mose ena Taravatu, eiava Pentateuch, Mose ese ia torea bukadia imaosi sibodia mo. Momokani, ena anina be Keristani negana vairanai Dirava ena lauma amo idia torea Revarevadia iboudiai lasi.
Aposetolo ese Heberu Revarevadia edia kahana tamona sibona, gwauhamata Taravatuna gunana, Pentateuch lalonai Mose ese ia torea gauna, ia herevalaia; ia ese Heberu bona Aramia Revarevadia ibounai ia herevalaia lasi. Bona ena hereva ena anina be inai lasi: Lagani 100 C.E. vairanai lauma ena siahu amo idia torea Keristani revarevadia be “taravatu matamatana.” Lasi.
Unai siri lalonai Paulo ese ia torea Greek gado herevana, di·a·theʹke, ena anina be “gwauhamata” o “kontraka.” (Hereva ma haida be inai buka lalonai oi itaia diba: New World Translation of the Holy Scriptures—With References, Appendix 7E, rau 1585, Watchtower Bible and Tract Society of New York, Inc., 1984, ese ia halasia gauna.) Baibel matamatadia momo ese unai hereva idia hahanaia maoro; “gwauhamata gunana” idia torea, “taravatu gunana” idia torea lasi.
Magasin ta ladana “National Catholic Reporter” ia gwau: “Ena ladana idia hatoa ‘Taravatu Gunana’ dainai, taunimanima idia laloa ia be hegeregere lasi bona matamatana ese ena gabu ia abia be namo. To Baibel be gaukara tamona; ena kahana ta be “gunana” lasi. Ena hereva be hegeregere, Heberu kahana bukana ginigunana amo ela bona Greek kahana bukana ginigabena. (Roma 15:4; 2 Timoteo 3:16, 17) Vadaeni, ai be unai ladadia, lalohadai kereredia dainai idia gwauraia ladadia, ai gwauraia lasi be mai badina korikoridia, bona ai ura inai ladadia maorodia, “Heberu Revarevadia” bona “Keristani Greek Revarevadia” do ai gaukaralaia.