Duahia Taudia Edia Henanadai
Keristani bapatisodia negadiai edena bamona ita kara be namo?
Inai be henanadai namona, badina be, ena be inai magasin idia duahia taudia momo be bapatiso idia abia vadaeni, to ia be mai anina idia dekenai bona bapatiso idia abia taudia dekenai danu. Vadaeni, bapatiso be ranu lalonai idia abia taudia do ai herevalaidia guna. Bapatiso be edena bamona idia laloa be namo?
Mataio 28:19, 20 ai, Iesu ese ia murinai idia raka taudia ia hagania do idia lao, taunimanima be hahediba taudia ai do idia halaoa, do idia hadibaia bona do idia bapatisoa. Ia gwau lasi taunimanima edia lalona be karaharaga do idia ha-uraia, bena do idia moale dikadika dainai, maoromaoro bapatiso do idia abia. Iesu ese bapatiso ia abia neganai, ia hahedinaraia bapatiso be mai anina bada. Luka 3:21 ia gwau: “Iesu danu ia bapatiso henia. Vadaeni ia guriguri noho neganai, guba ia kehoa.” Oibe, iseda raka dalana ia hahedinaraia Tauna ese bapatiso ia matauraia bona ia gurigurilaia. Ena be vanegai haida be ranu amo idia daekau murinai edia imana kwakikwakidia amo kwalimu toana idia karaia, eiava edia imana idia hadaedia bona idia hadihodia loulou, eiava idia boiboi, to ita diba momokani Iesu be unai bamona ia karaia lasi. Lasi, unai neganai, Ioane sibona be ia dekenai ia noho neganai, Iesu ese ena Tamana ia guriguri henia.
To Baibel ese ia hahedinaraia lasi ta be bapatiso do ia abia neganai namona be ena vairana do ia huaia, eiava Kerisendom ena dubu oreadia haida edia taravatu hegeregeredia do ia tui diho eiava hereva haida do ia gwauraia be namo. Pentekoste dinana mani oi laloa; unai dina ai, taunimanima 3,000 bamona, Iuda taudia bona Iuda ai idia halaoa taudia, be Keristani bapatisona idia abia. Dirava ena Taravatu idia stadilaia vadaeni bona Ia idia abidadama henia. Unai dainai, Mesia, Iesu, idia dibaia bona idia abia dae vadaeni neganai, bapatiso idia abia diba.
Kara 2:41 ia gwau: “Iena hereva idia abia dae taudia be bapatiso idia abia.” Weymouth Baibel lalonai idia torea herevana be inai: “Ena hereva be mai edia moale ida idia abia dae taudia be bapatiso idia abia.” Mesia sivaraina namona idia abia dae mai edia moale ida, bena taunimanima hutuma edia vairanai bapatiso idia abia neganai, idia do moale noho. Guba lalonai aneru danu ese idia itadia bona idia moale. Iesu ena hereva mani oi laloa; ia gwau: “Lau hamaoroa umui dekenai, dika tauna ta ena lalona ia giroa dainai, Dirava ena aneru be unai bamona do idia moale.”—Luka 15:10.
Bapatiso neganai, hemataurai bona moale be dala idauidau ai ita hahedinaraia diba. Dubu oreadia haida lalodiai, bapatiso abia taudia ese dabua kurokurodia eiava koremadia idia hahedokilaia. Baibel ese unai taravatu ia gwauraia lasi. To, digudigu dabuadia kwadogi hereadia eiava tauanina idia hahedinaraia dabuadia, tatau eiava hahine edia, be hegeregere lasi. Bona ita diba vadaeni hegeregerena, Keristani tauna matamatana be ranu amo ia daekau neganai, namo lasi ena imana amo toa ta ia karaia, hegeregere ia kwalimu bada vadaeni bamona. Bapatiso ia abia dainai Keristani oreana taudia idia moale, to namona be inai ia diba: Ena abidadama be unai bamona ia hahedinaraia neganai, ia be kara maoromaoro dalana ia rakalaia matamaia sibona, bona Dirava ena lalo-namo abia totona nega daudau do ia rakalaia be namo.—Mataio 16:24.
Ita herarai taudia danu ese bapatiso ita moalelaia, bona bema bapatiso tauna be iseda varavara ta eiava iseda Baibel stadi tauna ta, ita moalelaia bada. To bapatiso ena namo do ita abia guguru totona, namona be haroro tauna ese bapatiso idia abia gwauraia taudia dekenai ia harorolaia herevana ibounai ita hakala henia, henanadai idia haere henidia neganai ita kamonai, bona idia ida ita guriguri hebou danu be namo. Bema unai bamona ita karaia, unai ese ita do ia durua, bapatiso do ita laloa maoromaoro totona; Dirava ese ia laloa bamona ita danu do ita laloa. Ena be ita moale, to bapatiso murinai kwalimu toana ta do ita karaia lasi, palaoapalaoa be bapatiso taudia do ita henidia lasi, bona hanamodia totona pati do ita karaia lasi be namo. To namona be iseda tadikaka o taihu matamatana dekenai do ita lao, do ita hamaoroa ita moale badina be unai mai anina bada karana ia karaia, bona iseda Keristani oreana lalonai do ita abia dae mai eda lalo-namo ida.
Inai ibounai ena anina be inai: Namona be ita ibounai, bapatiso be ranu lalonai idia abia taudia danu, be bapatiso neganai do ita kara namonamo mai eda hemataurai ida. Namona be do ita boiboi badabada lasi, pati do ita karaia lasi, bona do ita kiri kava lasi. To iseda vairana do ita huaia lasi danu be namo. Haida be ita ida mauri hanaihanai lao henia dalana idia rakalaia matamaia dainai, ita moale be maoro. Bona iseda tadikaka bona taihu matamatadia ita abia dae diba mai iseda moale ida.