Inai Oi Laloatao, A?

Gima Kohorona, vanegai gaudia, oi duahia neganai edia sivarai oi moalelaia, a? Vadaeni, henuai ai torea henanadaidia mani oi haerelaia toho:

▫ Dahaka dainai Keristani taudia ginigunadia ese Iesu ena vara dinana idia hahelagaia lasi?

The World Book Encyclopedia ia gwau: “Keristani Taudia Ginigunadia ese [Iesu ena] vara dinana idia hahelagaia lasi, badina be idia laloa ta ena vara dinana hahelagaia karana be tomadiho koikoi karana ta.”​—12/15, rau 4.

▫ Iesu ita guriguri henia be maoro, a?

Lasi, badina be guriguri be tomadiho dalana ta, bona unai dala amo Siahu Ibounai Diravana sibona mo ita tomadiho henia be maoro. Iehova Dirava ita guriguri henia negadiai, ita hahedinaraia Iesu ena hereva ita abia dae; ia gwau: “Inai bamona do umui guriguri. ‘Aiemai Tamana e, guba dekenai oi noho.’ ” (Mataio 6:9)​—12/15, rau 25.

▫ Dahaka dainai, ena be King Davida ena kara ena dika ese Anania bona Sapira edia kara ena dika ia hereaia, to ena hahemaoro davana be idau? (2 Samuela 11:​2-24; 12:​1-14; Kara 5:​1-11)

King Davida ia kara dika badina be ia manoka dainai. Iena kara be ta ese ia vairanai ia gwauraia hedinarai neganai, ia helalo-kerehai, bena Iehova ese ena dika ia gwauatao​—to ena kara dika ena anina dikana amo ia roho mauri diba lasi. Anania bona Sapira edia kara dika be inai: Keristani kongregesen do idia koia dalana idia tahua, unai amo ‘idia koikoi lauma helaga dekenai bona Dirava dekenai.’ (Kara 5:​3, 4) Unai ese ia hahedinaraia edia lalona be dika, unai dainai hahemaoro auka idia abia.​—1/1, rau 27, 28.

▫ Dahaka ese ita ia durua diba, Iehova ena hesiai do ita lao henia mai eda lalo-moale ida totona?

Namona be Dirava ese ita ia henia hahenamodia bona gaukaradia ita laloa bada, bona ita laloaboio lasi, Dirava ena Hereva ita badinaia neganai, unai amo ia ita hamoalea.​—1/15, rau 16, 17.

▫ Dahaka gau rua do ita laloa be namo, bena taunimanima hagoadaia herevana namona do ita gwauraia diba?

Ginigunana be, do ia hagoadaia momokani herevana ta do ita laloa guna. Iharuana be, bema ta do ita hanamoa eiava do ita hagoadaia be namo, dala do ita tahua unai do ita karaia totona.​—1/15, rau 23.

▫ Dahaka dainai ‘hutuma bada herea’ be “edia imana dekenai pama au rauraudia idia dogoatao”? (Apokalupo 7:​9)

Unai raurau idia davea, unai amo idia hahedinaraia idia ese Iehova ena Basileia bona ia horoa Pavapavana, Iesu Keriso, idia hanamoa mai edia moale ida. (Levitiko 23:​39, 40 itaia.)​—2/1, rau 17.

▫ Iobu bukana ese dahaka gau namodia be ita ia hadibaia?

Ita ia hadibaia hekwakwanai negadiai edena bamona do ita kara be namo. Hetoho ia davaria tauna sisiba henia daladia maorodia bona kereredia ia hahedinaraia. Inai danu, Iobu sivaraina ese ita ia durua diba, dika do ita davaria neganai do ita kara namonamo totona.​—2/15, rau 27.

▫ Iesu ena hoa karadia ese dahaka idia hadibaia ita dekenai?

Namona be Keristani taudia ese Dirava do idia hanamoa, Iesu ese ena hoa karadia amo ia hanamoa hegeregerena. (Roma 15:6) Unai hoa karadia sivaraidia ese idia hagoadadia, kara namo do idia karaia, do idia hariharibada, bona hebogahisi do idia hahedinaraia totona.​—3/1, rau 8.

▫ Dahaka dainai elda taudia ese idia hegaegaelaia vadaeni henanadaidia be gwauhamata matamata taudia ida idia herevalaia hebou?

Unai amo idia hamomokania idia be Baibel ena badina herevadia bona Iehova ena Witness taudia edia kara korikoridia idia diba.​—3/1, rau 13.

▫ Baibel lalonai idia torea guriguridia ese ita edena bamona idia durua diba?

Unai guriguri bema ita tahua namonamo, ita diba edena idia gwauraia, edia noho be iseda noho hegeregerena neganai. Bema unai bamona guriguridia ita davaria, ita duahia, bona ita laloa namonamo, unai ese ita do ia durua, Dirava do ita hereva henia namonamo totona.​—3/15, rau 3, 4.

▫ Dirava gari henia karana ena anina be dahaka?

Anina be Iehova ita matauraia bada bona do ita habadua garina ita gari. (Salamo 89:7)​—3/15, rau 10.

▫ Edena dala toi ai Baibel ese ia hahedinaraia ita be mai anina bada Dirava ena matana ai?

Baibel ese ita ia hadibaia Dirava ese ita ta ta ibounai ia laloa bada (Luka 12:​6, 7); ia hahedinaraia dahaka dainai Iehova ese ita ia laloa bada (Malaki 3:16); bona Iehova ese ena lalokau ita dekenai ia hahedinaraia vadaeni dalana ia gwauraia. (Ioane 3:16)​—4/1, rau 11, 12, 14.

▫ Dahaka dainai Heberu 10:​24, 25 be Keristani taudia do idia hebou haheganina sibona lasi?

Unai hereva amo Paulo ese Dirava ena lauma ese ia hadibalaia karadia ia gwauraia. Keristen heboudia iboudiai dekenai, bona Keristani taudia idia hebou negadia iboudiai, unai hereva hegeregeredia idia kara be namo.​—4/1, rau 16.