Diba Momo Tauna ta ese New World Translation Ia Hoalaia

GREEK gado gunana ia diba momo tauna, Dr. Rijkel ten Kate, ia gwau Baibel, Netherlands gado ai idia torea gaudia, edia hereva haida be maoro momokani lasi. Hegeregere, Luka karoa 2 lalonai, Greek gado herevadia toi (breʹphos, pai·diʹon, bona pais) ita davaria, idia amo Luka ese Iesu ia tubu daekau negana ena kahana ta ta ia gwauraia. Unai hereva toiosi ta ta edia anina be taina idau. To, Baibel momo lalonai, hereva tamona, “natuna,” be unai hereva rua eiava toi ida idia hahegeregerea. Dahaka hereva idia toredia be maoro?

Dr. ten Kate ia gwau, Luka 2 siri 12 lalonai Greek gado herevana breʹphos ena anina be “vara matamata natuna, eiava beibi.” Pai·diʹon, Luka 2 siri 27 lalonai ia noho herevana, ena anina be “mero maragina eiava natu maragina,” bona pais, Luka 2 siri 43 lalonai ia noho herevana, ena anina be “mero.” Dr. ten Kate be magasin ta ladana Bijbel en Wetenschap (Baibel Bona Saiens), March 1993 gauna, lalonai ia torea herevana be inai: “Lau laloa Baibel, Netherlands gado ai idia torea gaudia, ta lasi lalonai unai hereva idia torea maoro, Baibel ia torea guna tauna ese ia torea herevadia edia anina korikoridia hegeregeredia.”

Gabeai, ta ese New World Translation of the Holy Scriptures be Dr. ten Kate dekenai ia hahedinaraia. Unai Baibel be gado 12 ai idia printaia vadaeni, idia ta be Netherlands gadona. Ia duahia murinai dahaka ia gwau? Ia gwau: “Baibel ta, Netherlands gado ai idia torea gauna, lalonai, Greek gado herevadia toi, breʹphos, pai·diʹon, bona pais, edia anina korikoridia hegeregeredia hereva maorodia idia torea, be lau hoalaia bada.” New World Translation lalonai unai siri edia anina be Baibel ia torea guna tauna ese Greek gado ai ia torea herevadia edia anina hegeregerena, a? Dr. ten Kate ia gwau: “Idia hegeregere vaitani.”