Basileia Haroro Ripoti
Memero Kekeni ese Sivarai Namona Idia Harorolaia Africa Ai
IESU ia toreisi lou, bena nega daudau lasi Africa tauna ta ia lao Ierusalema. Baibel ese ena ladana ia gwauraia lasi. Ia be “dagi badana tauna, Kanedake, Etiopia ena kwini hahine ena kohu ia naria tauna.” Badina be dahaka Baibel lalonai idia gwauraia? Badina be aneru ta ese Keristani haroro tauna Filipo ia siaia, “Iesu ena Sivarai Namona” do ia hadibalaia totona. Baibel ena sivarai lalonai, unai Etiopia tauna be Africa tauna ginigunana Keristani ekalesiana lalonai ia vareai.—Kara 8:26-39.
Hari inai negai, Africa dekenai Iehova ena Witness taudia be tausen momo herea. Nega namodia iboudiai Keriso ena sivarai namona be taunimanima dekenai idia gwauraia. Inai ekspiriens ese idia hahedinaraia Africa dekenai memero kekeni danu ese idia gwauraia.
◻ Sandy bona Priya, lagani 11 kekenidia rua, Nairobi, Kenya dekenai, be idia gadara hebou loulou bona edia sivarai bukadia idia senisi. Priya ena tamana sinana be Iehova ena Witness taudia ida Baibel idia stadilaia matamaia. Unai dainai Priya ese buka ma haida ia abia; idia ta, ladana Hadibaia Tauna Badana Ita Kamonai Henia, Watch Tower Bible and Tract Society ese ia halasia gauna, be ia ura henia bada. Unai buka be ena turana Sandy ia hahedinarai henia, bena idia ruaosi ese idia stadilaia loulou.
To, Sandy ena sinana, Una, be Anglikan hahinena, bona ia ura lasi ena natuna ese Iehova ena Witness taudia edia buka do ia duahidia. To kekeni ruaosi be stadi idia karaia noho. Dina ta Sandy ese ena sinana ia noia, ruaosi edia herevahereva be nega tamona mo do ia kamonai. Idia duahia karoana ena ladana be “Vara Dinana Dekenai Pati Idia Karaia Tatau Rua.” Una ia kamonai bona ia hoa bada. Karaharaga ia ese Priya ena sinana be Baibel ia nanadailaia momo.
Priya ena sinana ena noinoi dainai, Witness hahinena ta be Una ida Baibel idia stadilaia. Nega daudau lasi Una ese ia dibaia gaudia be ena turana Dolly ia hamaorolaia. Lagani 11 kekenina Priya be ia goada ia lao noho, ela bona Iehova ia gwauhamata henia bona unai ena toana hegeregerena, bapatiso ia abia, Iehova ena Witness taudia edia distrik hebouhebouna ta dekenai. Ia moale dikadika, badina be unai hebouhebou dekenai Una bona Dolly danu be bapatiso idia abia!
◻ Africa tanodia haida dekenai Iehova ena Witness taudia edia gaukara idia rejista lasi. Unai tano ta dekenai, Witness taudia edia tomadiho karadia bona edia hahediba herevadia idia badulaia lasi. Sikuli ta lalonai, Witness taudia edia natudia rua, lagani 7 merona, mai ena tadina, lagani 6 merona, be tisa ese ia gwaumaoro henidia, guriguri negadiai klas amo do idia raka siri.
Dina ta tisa matamatana ta ese idia ruaosi ia hagania, memero kekeni oredia ida do idia guriguri hebou. Mero badana ia ura lasi dainai, tisa ese ia dadabaia. Ena tadina Shadrack ia gwau ia ura heditisa do ia itaia iena opesi lalonai. Heditisa bona tisa matamatana ese idia nanadaia dahaka dainai ia ura lasi. Idia nanadaia, ena tamana sinana ese do idia dadabaia garina ia gari eiava. Arabia gado namo hereana dekenai ia haere, ia gwau: “Lasi, lau tomadiho henia Diravana be heiriheiri Diravana lasi, to maino Diravana. Ruma dekenai lau be Iehova ena Witness merona ta bona sikuli dekenai lau be tomadiho idauna merona, dalana be lasi!” Unai dainai gwaumaoro idia henia, guriguri amo do ia gini siri.
Etiopia tauna, Kara bukana lalonai idia gwauraia tauna, be bapatiso ia abia murinai, “ena dala dekenai ia lao, mai moale danu.” (Kara 8:39) Unai hegeregerena, hari inai negai Basileia harorolaia taudia Africa dekenai be idia moale, badina be “Iesu ena Sivarai Namona” idia harorolaia diba.—Kara 8:35.