Hahine, Tanobada Hegegemadai Ai

TAUNIMANIMA ginigunadia ruaosi ese Iehova Dirava idia gwau-edeede henia neganai, ia ese ia hamaorodia, idia bona edia natudia ese davana dikana do idia abia. Iehova ese Heva ia hamaoroa: “Oiemu adavana do oi ura henia noho, bona ia ese oi do ia biagua.” (Genese 3:16) Baibel ese hahine matauraidia karana ia herevalaia bada, bona hahine milioni momo be edia mauri lalonai idia moale bona edia lalona ia namo badina idia bona edia ruma bese ese Baibel ena hakaua herevadia idia badinaia.

To, taunimanima edia maoro herevalaia ripoti matamatana ta ia gwau ma hahine momo be idia hahemaraia, gaukaralaia, bona idia laloa maragi. International Herald Tribune be unai ripoti ia herevalaia, bona ia gwau: “Unai ripoti, tano 193 ia sivarailaia ripotina ese ia hahedinaraia goevagoeva . . . dina ta ta hahine dadaraia bona dagedage henia karadia dikadia idia vara.”

Haheitalai haida be inai: Africa ena ihuana tanodia ai, uma gaukara metaudia momo be kekeni ese do idia karaia, bona idia sikuli taudia iboudiai amo toi toi be memero to tamona tamona be kekeni. Unai tano ta dekenai, hahine idia heudahanai be taravatu to tatau idia heudahanai be taravatu lasi. Africa ena tano ma ta ena taravatu ese panisi amo tau ia ruhaia, bema ena adavana ia heudahanai dainai ia alaia neganai, to unai taravatu ese hahine ia ruhaia lasi bema unai bamona kara dainai ena adavana ia alaia.

Unai ripoti ia gwau South America ena kahana haida ai, edia adavadia ese idia botaia hahinedia dekenai pulisi be idia hebogahisi lasi. Bona moni gaukara idia karaia hahinedia be edia davana, 30 ia lao 40 pesen tatau edia davana henunai, idia haheaukalaia sibona.

Asia ena tano haida dekenai, hahine idia doridia natuna havaraia lasi totona operesen do idia abia bona bogana lalonai natuna do idia hamasea. Tano ta ai, ariara hahinedia be 500,000 bamona, idia momo be edia tama sina ese unai kara lalonai idia atodia badina idia ura moni idia abia bena edia ruma matamata idia hoia. Tano ta ena pulisi ese idia laloa hanaihanai karana badana be “dowry ena mase”​—hahine be ena tau eiava tau ena bese ese idia alaia badina ia abia mai moni bona kohu be edia ura hegeregerena lasi.

Baibel be Iesu ia herevalaia neganai, ita ia hadibaia: “Ogogami taudia be ia dekenai idia boiboi neganai, ia ese do ia durua. Edia gau be lasi, bona edia durua be lasi taudia, be king ese do ia hamauria. Ia ese manoka taudia, bona ogogami taudia dekenai do ia bogahisihisi, bona gau lasi taudia be mase dekena amo, ia ese do ia hamauria. Bema unai ogogami taudia, be haida ese idia dagedage henia neganai, king ese unai ogogami taudia do ia hamauria. Ia ese edia mauri do ia naria namonamo noho, badina edia mauri be gau namo herea ia dekenai.” (Salamo 72:​12-14) Gabeai namo do ia vara lalohadaina ita abia be mai ena badina; hahine, tanobada hegegemadai ai, be unai nega ena mauri namona idia laloa noho diba.