“Idia Kavakava Momokani”

“TAUNIMANIMA edia lalona ai tuari idia laloa matamaia dainai, namona be edia lalona ai maino ena kohoro aukana ita haginia be namo.” (Charter of the UN Educational, Scientific, and Cultural Organisation) Lagani 1993 lalonai unai hereva idia laloa noho, bona UN ena tuari hadokoa hebouhebouna dekenai idia lao, diba momo taudia 500 ese tomadiho ena maduna unai bamona maino kohorona haginia totona idia kikilaia.

Lawyers’ Alliance for World Security edia gwaukau tauna, Jonathan Granoff, ese hebouhebou ia hakaua. Ia gwau: “Hari, tomadiho bona bese inai heheni karadia dainai idia vara tuaridia ese idia hahedinaraia taunimanima be noho dala maorona idia rakatania bona reana idia kavakava momokani.” Hebouhebou lalonai, John Kenneth Galbraith ena hereva danu idia gwauraia, ia gwau: “Tomadiho ena ladana ai idia hamasedia taudia edia momo be idia vara kava kara dika amo, bona tuari haida amo idia mase taudia edia namba ia hanaia.”

Profesa ta, Dr. Seshagiri Rao ia gwau: “Doketa taudia be gorere taudia idia hanamoa, idia ese gorere idia habadaia lasi. Tomadiho hahediba ese inai henia karana bona ta ta kara dika heheni karadia idia habadaia lasi be maoro. Idia ese maino do idia havaraia be namo. To edia kara amo ia hedinarai, guna bona hari danu, idia ese taunimanima idia do hapararadia noho.”

Lagani haida idia ore vadaeni, London ena Catholic Herald niuspepa ia gwau maino ia vara diba “bema hari idia noho dubu ibounai idia hebou bona nega tamona tuari idia gwauraia dika.” To unai niuspepa ma ia gwau: “Ita diba unai do ia vara diba lasi.” Katolik sista ta be inai bamona ia gwau: “Tanobada be do ia idau momokani bema dabai ta ita noga bona ita ibounai be iseda lalona ita hadaia tuari kohu do ita gaukaralaia lasi totona, . . . Iehova ena Witness taudia idia karaia hegeregerena!”

[Picture Credit Line on page 32]

Tom Haley/Sipa Press