Edia Goada be Edeseni amo Idia Abia?

BEMA inai laulau dekenai ia noho kaubebe oi itaia namonamo, do oi davaria iena apena hani amo ta be ia dika momokani vadaeni. To, inai kaubebe be ia aniani noho bona ia roho loaloa noho. Unai be nega haida sibona ia vara gauna lasi. Haida idia itaia ena be kaubebe edia apena ena kahana 70 pesen bamona ia boio, to edia gaukara dina ta ta ai idia karaia noho.

Unai hegeregerena, taunimanima momo be goada idia karaia noho. Ena be tauanina dalanai eiava lalona ai idia gorere, to idia hesiku lasi.​—⁠2 Korinto 4:​16 itaia.

Aposetolo Paulo ese iena misinari loaloa negadiai, hekwakwanai dikadia idauidau ia davaria. Ia idia kwadia, idia dadabaia, nadi amo idia hodoa, bona dibura dekenai idia atoa. Danu, gau ta ese iena tauanina ia hahisia, reana hekwakwanai ia davaria ena matana dekenai bona ia be “ginigini ta” bamona ia dekenai.​—⁠2 Korinto 12:​7-9; Galatia 4:⁠15.

Keristani elda tauna ta, ladana David, lalo-metau gorerena ia hekwarahilaia tauna, ia laloa Iehova ena heduru dainai ia namo ia lao diba. Ia gwau: “Lau hekwarahi bada lau namo totona, to nega momo lau gorere lou. Unai daradoko negadia ai, Iehova dekenai lau tabekau momokani bona ia ese lau ia durua. Nega momo lauegu guriguri edia lata be hora momo. Iehova lau hereva henia neganai, lau sibona lau noho mamina bona lau be anina lasi mamina idia boio. Lau manoka negadia amo lau hekwarahi bada bona Iehova lau tanikiu henia badina unai manoka negadia amo goada ia vara​—⁠ma haida lau durua diba goadana danu.”

Iehova Dirava ese Paulo ia hagoadaia. Unai dainai ia gwau: “Lau manoka neganai, unai be Dirava ena goada lau abia.” (2 Korinto 12:10) Momokani, iena manoka gaudia ese Paulo idia hadibaia Dirava ese ia henia goadana dekenai do ia tabekau. Unai aposetolo ia gwau: “Lau dekenai siahu ia henia Diravana dainai, lau be mai egu goada gau iboudiai karaia totona.” (Filipi 4:​13, NW) Iehova ese momokani iena hesiai taudia ia hagoadaia.