Mai Manau ida Iehova Ena Hesiai Gaukara Ia Karaia
“OIEMU hesiai gaukara ena gabu oi laloa bada lasi, to oi laloa gau badana be daika ena hesiai gaukara oi karaia.” John Booth be unai hereva ia gwauraia mai ena moale ida, bona ena mauri lalonai ia badinaia. Iena mauri tanobada dekenai be Monday, January 8, 1996 ai ia ore, bona ena mauri dalana ese ia hahedinaraia ia be daika ena hesiai gaukara ia abia hidi.
Lagani 1921 ai, John Booth be tau matamata neganai, ia ese mauri ena anina ia tahua. Dutch Reformed Church dekenai ia be Sunday sikuli dekenai ia hadibaia, to ia ura lasi haroro tauna ai ia lao totona do idia hadibaia, badina ia laloa dubu gunalaia taudia be sibona edia namo idia tahua taudia. “Millions Now Living Will Never Die” herevana ena pepapepa maragina ia itaia neganai, karaharaga ia hahedinaraia bukadia ia oda karaia. Ia duahia gaudia ese iena lalona idia veria, bona daudau lasi murinai ena baisikele amo kilomita 24 ia lao Bible Student taudia edia hebou idauidau dekenai, unai neganai Iehova ena Witness taudia be unai bamona idia gwauraia. Lagani 1923 ai, bapatiso ia abia bona ruma-ta-ruma-ta haroro gaukarana ia matamaia Wallkill, New York ai, unuseniai ena famili ese boromakau idia ubua.
April 1928 ai, Tadikaka Booth ese ful-taim hesiai gaukarana ia hamatamaia. Ia noho gabuna ai ia haroro bona South ena gunika kahanai danu, Baibel bukadia ia henia aniani bona mahuta gabuna edia davana bamona. Hekwakwanai haida ia davaria dainai ia boga-auka danu, hegeregere gavamani idia taravatua kekero muramura karaia gabudia edia biagudia ese ipidi amo idia luludia, idia ta ese John Booth ena painia turana ia pidia bona ia haberoa. Lagani 1935 ai, Tadikaka Booth be loaloa naria tauna ai idia halaoa bona kongregesen bona grup maragidia ia vadivadi henia matamaia. Hebouhebou ia hegaegaelaidia bona tadikaka bona taihu ia durua dagedage lalonai idia haheauka totona. Badu dikadika taudia oreadia ia hereva henia, kota lalonai ia gini auka, bona dibura negadia ia haheaukalaia karadia be hanaihanai Tadikaka Booth dekenai idia vara gaudia. Nega ta ia torea: “Bema unai neganai idia vara gaudia iboudiai lau torea, reana buka ta do ia honu.”
Lagani 1941 ai, Joseph F. Rutherford, unai neganai ia be Watch Tower Society ena presiden tauna, ese Tadikaka Booth ia siaia Kingdom Farm, Ithaca kahirakahira, New York dekenai ia gaukara totona. Unuseniai mai abidadama ida lagani 28 ia gaukara. Haroro gaukara ia laloa bada noho dainai, lagani momo lalodiai Watchtower Bible School of Gilead ena stiuden taudia tausen momo edia hebamo ia moalelaia bada, unai sikuli be Kingdom Farm dekenai ia noho ela bona lagani 1961. Lagani 1970 ai, Tadikaka Booth idia boiria Watchtower Farms, Wallkill, New York ai, do ia gaukara totona, lagani 45 gunanai ia be unai gabu dekenai painia gaukara ia matamaia.
Lagani 1974 ai, Tadikaka Booth idia abia hidi Iehova ena Witness taudia edia Hakaua Oreana ena memba tauna ta ai ia lao Brooklyn, New York ai. Mai abidadama ida unai gaukara ia karaia ela bona ena mauri lagani be 93 neganai ia mase. John Booth ena manau momokani karana bona Keristani kara namodia dainai idia lalokau henia bada. Ia be ruma ta ruma ta ai bona dala ai haroro gaukarana ia rakatania lasi ela bona ia gorere bona iena goada ia ore.
Ena be ia ida idia gaukara taudia ese ia mase dainai idia lalohisihisi, to Baibel ena hereva horoa Keristani taudia dekenai, hegeregere guba toreisi louna do idia abia bona “edia kara namodia ena sivarai, be idia danu nega tamona do ia lao,” ese edia lalona idia hanamoa. (Apokalupo 14:13; 1 Korinto 15:51-54) Momokani, unai be noho gabuna matamatana, to unuseniai John Booth be Iehova ena hesiai gaukara ia karaia diba ela bona hanaihanai!
[Picture on page 32]
John Booth 1903-1996
[Picture on page 32]
HERALD-AMERICAN, ANDOVER 1234
76 Jehovites Jailed in Joliet
[Credit Line]
Chicago Herald-American