Hel Ena Anina Korikorina

CHURCH of England ena hahediba herevadia tahua oreana ena ripoti ia gwau hel be guna idia gwauraia lahi badana gabuna lasi to ia be mauri lasi gabuna ia laulaulaia. Ripoti ia gwau: “Badina momo dainai emai lalohadai ai haidaua. To badina badana be Keristani taudia bona Keristani lasi taudia be mai gari danu idia tomadiho dalana idia abia dae, bona Dirava be taunimanima milioni momo lahi dekenai do ia gabua hanaihanai lalohadaina be Keriso amo ia hahedinaraia lalokau amo ia idau momokani.”

Hel ena hahediba herevana idia garilaia karana be Church of England sibona lalonai lasi. Dubu idauidau dekenai idia lao taudia idia davaria kara dika taudia be lahi dekenai ia gabua Diravana idia tomadiho henia be auka. Tomadiho bona taunimanima edia noho dalana ia stadilaia profesa, Jackson Carroll, Duke University’s Divinity School ai, ia gwau: “Taunimanima ese lalokau bona hebogahisi Diravana idia ura henia. Kara dika bona kerere ita herevalaia be hari inai nega ena lalohadai hegeregerena lasi.”

Nega daudau vadaeni, Iehova ena Witness taudia idia abia dae Baibel ese ia hadibaia hegeregerena hel be mase taudia edia gabu sibona​—ia be lahi araia gabuna lasi. Idia ese unai lalohadai idia abia dae badina ia bada ia lao lasi, to idia abia dae badina Baibel ia gwau: “Mase taudia be gau ta idia diba lasi. . . . mase taudia edia gabu [“hell,” Catholic Douay Version], oi lao gabuna, dekenai be kara ta lasi, laloa ta lasi, diba bona aonega ta lasi.”​—Hadibaia Tauna 9:⁠5, 10.

Inai diba maorona mase taudia dekenai idia abia neganai, Watch Tower Society ena presiden ginigunana, Charles Taze Russell, be lagani 1896 ai inai ia torea: “Hahediba herevadia, ane bukadia, bona haroro taudia momo ese mai kerere ida idia hadibaia hisihisi ania hanaihanai gabuna be [Baibel lalonai] ai davaria lasi. To ai davaria vadaeni ‘hel,’ sheol, hades, be Adamu ena kara dika dainai taunimanima ibounai idia lao gabuna bona Lohiabada ena mase ese ia amo ibounai ia hamauria; bona ‘hel’ be guri gabuna​—⁠mase taudia edia gabu.”

Unai dainai lagani handred ia hanaia vadaeni lalonai, Iehova ena Witness taudia be Baibel amo hel ena anina korikorina idia hadibaia.

[Picture on page 32]

Charles T. Russell