“Oi Durua Taudia Tamona Sibona”

JANUARY 1996 ai, Carol ia gorere badina ena kwara harana ai gau ta ia tubu. Iena mauri lagani be 60 ia hanaia bona ela bona unai negai ia be moale hahinena mai ena goada bona taunimanima ibounai dekenai ia be mai ena hereva namona. To hari doketa idia hekwarahi ena kwara harana ai ia tubu gauna idia koua totona. Iena hekwarahi lalonai, Carol ese inai revareva ia abia:

“Carol e:

“Lau sori bada oi gorere dainai. To ita be mai eda helaro korikorina, Baibel ese ita ia durua unai helaro ita diba bona ita ura henia totona. Unai helaro be Iehova ena Basileia ese tanobada do ia lohiaia dainai paradaiso dekenai do ita noho diba, ita ibounai ese unai nega ita naria noho.

“Lau egu ura be do oi diba oiemu haroro gaukarana ese mase hanaihanai amo taunimanima momo ia hamauria. Lau be unai taudia ta. Lau diba lasi bema ita hedavari negana ginigunana oi laloatao eiava lasi. Unai neganai egu mauri lagani be 20. Egu huina ia lata, drag lau hoihoilaia, bona raskol taudia lau bamoa. Ai ibounai be ipidi ai dogoatao bona ai sibona ai lalokau henia.

“Ma Witness hahinena ta ida egu iduara ai oi pidipidi bona Gima Kohorona bona Awake! oi hariharilaia. Lau ura moni lau henia oi dekenai bona lau gwau magasin lau ura lasi. Lau oi hadibaia umui be moni gogoa totona umui haroro lasi. Oi gwau emui gaukara be taunimanima umui durua Baibel do idia duahia totona. Lau diba momokani lasi magasin lau abidia o duahidia eiava lasi. To, oi ese hereva momokani ena uhe oi hadoa egu mauri lalonai.

“Lagani haida murinai Witness tauna ma ta, Gary, be lau noho neganai egu sinana ena ruma dekenai ia mai. Ia lau hadibaia lagani haida gunanai lau oi vadivadi henia. Nega daudau lalonai, Gary be lau ida Baibel ia stadilaia ela bona lagani 1984 ai lau bapatiso. Hari lau ese egu natudia dekenai Dirava ena Basileia ena hereva momokanina lau hadibaia.

“Lau diba lau be oiemu hesiai laganidia lalonai oi durua taudia tamona sibona. To, unai hebogahisi lalokauna dainai, oi ese lau bona egu famili oi durua Dirava Badana, Iehova, bona ena Natuna, Keriso Iesu, ai diba totona. Tanobada matamatana ai oi do lau itaia negana, Iehova ese matana ranu ibounai iseda matana amo ia dahua bona mase be do ia ore negana, lau naria noho.​—Apokalupo 21:4.

“Lau bona egu famili, ai moale bada oi ai diba bona ai oi haroro henia dainai. Tanikiu bada.

“Tadikaka dalanai lalokau lau siaia inai,

Peter”

Carol be hua 6 ia gorere murinai, March 1996 ai, ia mase. Ia be lagani 35 evanelia gaukarana ia goadalaia lalonai, hereva momokani ena uhe momo ia hadoa. Ia diba gauna be inai, ta ia gwau diba lasi edena negai uhe ese anina do ia havaraia, reana lagani momo murinai do ia vara.​—Mataio 13:23.